بۇگىنگى تاڭدا كۇن وتكەن سايىن ءوسىپ-وركەندەپ كەلە جاتقان قازاق ەلى تۋرالى اڭگىمە ايتا سالۋ ەرىككەن ەرمەگىنە اينالعانىنا تاڭعالمايتىن بولدىق. ىشكى جاۋدى قويىڭىز، كەشە عانا قازاقستان تۋرالى ىشىندەگىسىن ءبىر «قۇسىپ» العان ستەيسي حانىمنىڭ ءسوزى اناۋ. ەندى بولعان شىعار دەپ «ۋھ!» دەپ وتىرا بەرگەنىمىز سول ەدى، «Sport.kz» سايتىندا (newskaz.ru) تاعى ءبىر ازاماتتىڭ ءبىزدىڭ ەلدەگى حال-احۋال تۋرالى پىكىرى جالت ەتتى.

بىراق بۇل بورات ەمەس، ستەيسي دە ەمەس، فۋتبولدان يزرايل جاستار قۇراماسىنىڭ جانە «قايرات» (الماتى) كومانداسىنىڭ بۇرىنعى قاقپاشىسى يوسسي شەكەل دەگەن سپورتشى. اينالايىن يوسسي، نيەتى ءتۇزۋ، ىشكەن اسىنا، جەگەن تاماعىنا ادال ءارى يماندى ازامات ەكەن. «ءيتىڭ جامان» دەگەن ءسوزدىڭ وزىنە نامىستاناتىن حالىقپىز عوي. ەڭ باستىسى، ول بىزگە جەرگىلىكتى حالىقتىڭ قوناقجايلىلىعىن، ىنتا-ىقىلاسىن سىيلايتىنىمەن ۇنادى.

بۇگىنگى تاڭدا كۇن وتكەن سايىن ءوسىپ-وركەندەپ كەلە جاتقان قازاق ەلى تۋرالى اڭگىمە ايتا سالۋ ەرىككەن ەرمەگىنە اينالعانىنا تاڭعالمايتىن بولدىق. ىشكى جاۋدى قويىڭىز، كەشە عانا قازاقستان تۋرالى ىشىندەگىسىن ءبىر «قۇسىپ» العان ستەيسي حانىمنىڭ ءسوزى اناۋ. ەندى بولعان شىعار دەپ «ۋھ!» دەپ وتىرا بەرگەنىمىز سول ەدى، «Sport.kz» سايتىندا (newskaz.ru) تاعى ءبىر ازاماتتىڭ ءبىزدىڭ ەلدەگى حال-احۋال تۋرالى پىكىرى جالت ەتتى.

بىراق بۇل بورات ەمەس، ستەيسي دە ەمەس، فۋتبولدان يزرايل جاستار قۇراماسىنىڭ جانە «قايرات» (الماتى) كومانداسىنىڭ بۇرىنعى قاقپاشىسى يوسسي شەكەل دەگەن سپورتشى. اينالايىن يوسسي، نيەتى ءتۇزۋ، ىشكەن اسىنا، جەگەن تاماعىنا ادال ءارى يماندى ازامات ەكەن. «ءيتىڭ جامان» دەگەن ءسوزدىڭ وزىنە نامىستاناتىن حالىقپىز عوي. ەڭ باستىسى، ول بىزگە جەرگىلىكتى حالىقتىڭ قوناقجايلىلىعىن، ىنتا-ىقىلاسىن سىيلايتىنىمەن ۇنادى.

«وتىرىكشىنىڭ كۋاسى قاسىندا» دەمەكشى، ەندىگى ءسوزدى يوسسيگە بەرەيىك: «قازاقستانعا بارۋ تۋرالى ۇسىنىس تۇسكەندە، كەز كەلگەن ادام سياقتى مەن دە قاباعىمدى كوتەردىم دە قويدىم. مەن ءۇشىن بۇل - جەردىڭ شالعاي ءبىر تۇپكىرى. ويىما بىردەن «بورات» ءفيلمى كەلدى. «وندا ءالى تاس عاسىرى ەمەس پە؟» دەپ ويلاعانىم راس. ءتىپتى كوز الدىما ەسەك پەن ات ەلەستەپ ۇلگەردى. الايدا كەلگەن بەتتە كوزىمە بىردەن «ينفينيتي» مەن «مەرسەدەستەر» تۇسكەندە تاڭعالمادىم دەسەم، سەنبەسسىزدەر. بۇل - وتە باي، ادەمى مەملەكەت ەكەن، ونداعى ءومىر دە مەنىڭ بۇعان دەيىن ويلاعانىمداي، قارادۇرسىن دە، جۇپىنى دا ەمەس، وركەنيەتتى ەلدەردەگىدەي ونەگەلى».

سپورتشىنىڭ جەرگىلىكتى جانكۇيەرلەر تۋرالى پىكىرى دە وڭدى. «ءبىز الماتىدا وزىمىزدەن الدەقايدا مىقتى كوماندادان 0:1 ەسەبىمەن ۇتىلىپ قالدىق. ويىن سوڭىندا سپورتسۇيەر قاۋىم ءبىزدى باس سالىپ «تەپكىلەۋدىڭ» ورنىنا، ريزاشىلىعىن ءبىلدىرىپ جاتىر. جانىمىزدى سالىپ ويناعانىمىز ءۇشىن. بىرگە سۋرەتكە تۇستىك، قۋانا-قۋانا قولتاڭبا الدى. ال يزرايلدە جەڭىلىپ قالساڭ، بۇرىنعى اتاق-داڭقىڭا قاراماي، ىسقىرىپ-قىشقىرىپ، ءيتىڭدى شىعارار ەدى».

قازاق فۋتبولى تۋرالى دا لەبىزى جىلى: «يسپانيامەن سالىستىرۋعا كەلە قويماس، بىراق يزرايلمەن دەڭگەيى تەڭ. قاقپاعا كوپ سوققى جاسايدى. ءبىر وكىنىشتىسى، مۇندا ءالى دە 2010 جىلعى الەم چەمپيوناتىندا تۇڭعىش رەت ۇسىنىلعان دوپپەن وينايدى. بۇل دوپ قاقپاشىلارعا ارناپ جاسالعان، سوندىقتان قاقپاعا 25 مەتر قالعاندا ەش ويلاماي سوعۋعا تىرىسادى. ويتكەنى «اديداس» فيرماسى جاساپ شىعارعان بۇل دوپ ۇشىپ كەلە جاتقاندا تراەكتورياسىن وزگەرتىپ، قاقپاشىلاردى قاپى قالدىراپ جاتاتىنىن ءبارى بىلەدى».

شەكەل سيناگوگاداعى جاعدايعا تاڭدانىسىن جاسىرا الماپتى: «سيمحات تورا مەن شميني اتسەرەتتى (سۋككوت مەرەكەسىنىڭ سوڭعى كۇنى) ءيزرايلدىڭ وزىندە ءدال بۇلاي تويلاي قويماس، ءسىرا. يوم كيپپۋردە دە يۆريتتە ءلام دەي الماسا دا قۇدايعا قۇلشىلىق جاساپ جاتقاندار كوپ، - دەيدى قاقپاشى. - سيناگوگادا وتىرىپ، تەلەفونمەن سويلەسە سالادى ەكەن، ال كەلەسى بىرەۋلەر سىرتقا كىرىپ-شىعىپ جۇرە بەرەدى». بۇل - ەندى وزدەرىنىڭ ىشكى تىرلىگى. ال دوپ تۋرالى پىكىرى بىزگە جاناشىرلىق دەپ ويلايمىن. باپكەرلەردىڭ قۇلاعىنا جەتسە، كانە.

جيىرما سەگىز جاستاعى شەكەل جاراقات السا دا، ايىعىپ، كوماندانىڭ جوعارى توپتا قالۋىنا ءبىر كىسىدەي ەڭبەك ءسىڭىردى. ماۋسىم اياقتالعاندا بۇرىنعى دەمەۋشى كوماندادان كەتىپ، بيۋدجەت قىسقارعان. «جاڭا دەمەۋشىلەر بۇدان بىلاي جالاقىمنىڭ ەكى ەسە قىسقاراتىنىن ەسكەرتتى. بىراق وعان مەن كەلىسە قويمادىم»، - دەيدى يزرايل ازاماتى.

بۇدان بايقاعانىمىز، شەكەلدىڭ كوماندا باسشىلارىنا «ەپتەپ» وكپەلەگەنى انىق. بىراق «بيتكە وكپەلەپ، تونىن وتقا جاقپاعانى»، ەڭ باستىسى، ءوزى از ۋاقىت بولسا دا، اسىن ءىشىپ، تاماعىن جەگەن ەل تۋرالى جامان ايتپاي، ءادىل سويلەگەنى ونىڭ تەكتىلىگىنەن دەپ بىلەيىك.

د.ادىلبەك

«حالىق ءسوزى» گازەتى