وتكەن اپتادا قر اقپارات جانە قوعامدىق دامۋ مينيسترلىگى ەلىمىزدەگى ەڭ ءىرى جوبالاردىڭ ءبىرى «قازاقستاننىڭ 100 جاڭا ەسىمى» بايقاۋىنىڭ باستالعانىن مالىمدەدى. بيىلعى جوبانىڭ ەرەكشەلىگى – ەل تاۋەلسىزدىگىنىڭ 30 جىلدىعى اياسىندا وتپەك.

جوباعا وتىنىشتەردى قابىلداۋ 22 اقپان مەن 15 ناۋرىز ارالىعىندا جۇزەگە اسىرىلادى. ال، بايقاۋ تۋرالى 100janaesim.ruh.kz سايتىنان ءبىلىپ وتىرۋعا بولادى.

ايتا كەتەيىك، اتالعان جوبا ەلباسى نۇرسۇلتان ءابىشۇلى نازارباەۆتىڭ ۇيىتقى بولۋىمەن العاش رەت 2017 جىلى وتكەن بولاتىن. تۇڭعىش پرەزيدەنتتىڭ ايتۋىنشا، بۇ جوبا جاستاردىڭ كاسىبي تۇرعىدا ءوسۋى مەن تۇلعالىق دامۋى ءۇشىن جانە ۋاقىتىن ءتيىمدى پايدالانۋعا سەپتىگىن تيگىزەدى.

ەلباسى ءوز سوزىندە بۇل بايقاۋعا قاتىساتىندار بولاشاق ۇرپاق ءۇشىن ۇلگى بولاتىنىن اتاپ ءوتتى.

-ءبىز كوزدەگەن ماقساتىمىزعا جەتۋ ءۇشىن ۇنەمى ارەكەت ەتۋگە جانە ارمانداي بىلۋگە ءتيىسپىز. ءبارى دە ادامنىڭ ەرىك جىگەرىنە بايلانىستى. بۇل جوباعا قاتىسۋشىلار – بولاشاق ۇرپاق ءۇشىن ۇلگى ونەگە. قاتىسۋشىلار ءوز ەڭبەكتەرىنىڭ ناتيجەسى ارقىلى ومىردە بارىنە قول جەتكىزۋگە بولاتىنىن دالەلدەدى،- دەدى نۇرسۇلتان ءابىشۇلى.

2021 جىلى دا اتالعان جوبا جالعاسىن تاپتى. بيىل IV ماۋسىم جەڭىمپازدارىنىڭ ەسىمدەرى بەلگىلى بولادى.

ال، بيىلعى ماۋسىمنىڭ ەرەكشەلىگى – ەڭ اۋەلى ەل تاۋەلسىزدىگىنىڭ 30 جىلدىعى اياسىندا ءوتىپ وتىر. دەمەك، بايقاۋ جەڭىمپازدارىنىڭ جەتىستىكتەرىن ەل دامۋىنىڭ ايعاعى دەۋگە نەگىز بار. سەبەبى، جوبا قاتىسۋشىلارىنىڭ بارلىعى دەرلىك ەلىمىزدىڭ دامۋىنا وزىندىك ۇلەس قوسقان، ەل بولاشاعىنا بەي-جاي قارامايتىن جاستار.

ايتا كەتەيىك، بۇگىندە اتالعان بايقاۋعا قازاقستاننىڭ بارلىق وڭىرىنەن 2 790 ءوتىنىش كەلىپ ءتۇستى.وتىنىشتەر نەگىزىندە 7 نوميناتسيا بولىنگەن. ساۋالناما ناتيجەسى بوىنشا، سپورت جانە مادەنيەت، قوعام جانە ءبىلىم نوميناتسيالارىنا ۇمىتكەرلەر كوپ بولعان. سونىمەن قاتار، بيىل «ەكولوگيا» دەپ اتالاتىن جاڭا نوميناتسيا قوسىلدى. ءوتىنىش سانى بويىنشا وڭىرلەر اراسىندا الدىڭعى ورىندا شىعىس قازاقستان وبلىسى، اقمولا مەن ماڭعىستاۋ وبلىستارى بەلسەندىلىك تانىتۋدا.

نەگىزىنەن جوبا ماقساتى – ەلىمىزدىڭ ءار وڭىرىندە تۇراتىن، تاۋەلسىزدىك جىلدارىندا تابىسقا جەتكەن جاستاردى تانىستىرۋ، جاستارعا ۇلگى رەتىندە كورسەتۋ.

بۇل تۋرالى اقپارات جانە قوعامدىق دامۋ ءمينيسترى ايدا بالاەۆا وسىنداي جاستارىمىز وسىنداي تابىستى ادامداردان ۇيرەنۋ كەرەك ەكەنىن العا تارتتى.

-بيىلعى جوبا – قازاقستان تاۋەلسىزدىگىنىڭ 30 جىلدىعى اياسىندا ۇيىمداستىرىلىپ جاتىر. 30 جىل ىشىندەگى ەلىمىز جەتكەن تابىستار – وسىنداي ەل ازاماتتارىنىڭ ەرەن ەڭبەگىنىڭ ناتيجەسى. سوندىقتان حالقىمىز جاقسىدان ۇيرەن دەگەندى جاس ۇرپاققا وسىنداي ادامدار ارقىلى ۇلگى ەتىپ وتىرعان،- دەدى قر اقپارات جانە قوعامدىق دامۋ ءمينيسترى.

بۇل جوباعا قازاقستان ازاماتتارى مەن ەلدەن تىس جەردە تۇراتىن وتانداستارىمىز دا قاتىسا الادى. قاتىسۋشىلاردىڭ ءوتىنىشى 7 نوميناتسيا بويىنشا ىرىكتەلگەن. ولار: عىلىم جانە يننوۆاتسيا، سپورت جانە مادەنيەت، مەديتسينا، ەكولوگيا، ءبىلىم بەرۋ، قوعام مەن بيزنەس.

ال، جوباعا قاتىسۋشى ازامات شارتتا كھرسەتىلگەندەي، سەنىمدى اقپارات بەرۋگە مىندەتتى. ەگەر، جالعان اقپارات نەمەسە داۋىس بەرۋ كەزىندە بۇرمالاۋشىلىققا بارسا، ياكي قانداي ءدى ءبىر قۇقىق بۇزۋشىلىقتار انىقتالسا، قاتىسۋشى جوبادان شىعارىلادى.

كەلىپ تۇسكەن بارلىق وتىنىشتەر مودەراتسيادان ءوتىپ، كەيىننەن 100janaesim.ruh.kz سايتىندا جاريالانادى. ءوتىنىش قابىلادۋ اياقتالعان سوڭ، جالپىحالىقتىق داۋىس بەرۋ باستالادى. ول ونلاين فورماتتا وتپەك. سونىمەن قاتار، وتىنىشتەردىڭ بىرقاتار بولىگى تانىمال تۇلعالاردىڭ، مادەنيەت جانە قوعام قايراتكەرلەرىنىڭ، بيزنەس پەن سپورت وكىلدەرىنەن تۇراتىن قازىلار القاسىنىڭ نازارىنا ۇسىنىلادى. تاعى ءبىر ايتا كەتەرلىگى – بيىلدان باستاپ، جوبا جەڭىمپازى كەلەسى ماۋسىمنىڭ قازىلار القاسىنىڭ قۇرامىنا كىرەدى.

ونلاين داۋىس بەرۋ ارقىلى ەڭ كوپ ۇپاي جيناعان جانە قازىلار القاسىنىڭ تاڭداۋىنا ىلىككەن جوبا قاتىسۋشىسى بيىلعى ءساۋىر ايىندا جوبا جەڭىمپازى اتانباق.

Abai.kz