بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتاتتار ەۋرازيالىق ەكونوميكالىق وداق تۋرالى شارتقا قىرعىزستاننىڭ قوسىلۋىنا قاتىستى بىرقاتار تۇزەتۋلەر ەنگىزەتىن حالىقارالىق كەلىسىمدەردى قارادى.

وسى رەتتە، ءماجىلىس توراعاسى نۇرلان نىعماتۋلين حالىقارالىق شارتتاردى راتيفيكاتسيالاۋ راسىمدەرىنىڭ مەرزىمدەرى كەيبىر مينيسترلىكتەر تاراپىنان جۇيەلى تۇردە بۇزىلاتىنىنا نازار اۋداردى.

مىسالى، ەۋرازيالىق ەكونوميكالىق وداق شەڭبەرىندە وسى ماڭىزدى راتيفيكاتسيانى كەلىسۋدىڭ مەملەكەتىشىلىك راسىمدەرىن وتكىزۋ ءبىر جىلدام استام ۋاقىتقا سوزىلعان.

وسى ورايدا، نۇرلان نىعماتۋلين، ارينە، كوروناۆيرۋس ىندەتىن العا تارتۋعا بولار، بىراق ول ءبىزدىڭ ەلدە عانا ەمەس، بۇكىل الەمدى جايلاعانىن ايتا كەلىپ:

- پاندەميا مينيسترلىكتەر جۇمىسىنىڭ قارقىنىن، ساپاسىن جانە جاۋاپكەرشىلىگىن تومەندەتۋگە سەبەپ بولماۋعا ءتيىس. بۇل جەردە باستى ماسەلە، قۇزىرلى مينيسترلىكتەر مەن قۇرىلىمداردىڭ بىرلەسكەن جۇمىسىنا بايلانىستى. جالپى ايتقاندا، حالىقارالىق كەلىسىمدەردى ۋاقىتىلى راتيفيكاتسيالاۋ ينتەگراتسيالىق پروتسەستەر ءۇشىن وتە ماڭىزدى, -  دەدى نۇرلان نىعماتۋلين.

Abai.kz