بۇگىن پرەزيدەنت قاسىم-جومارت توقاەۆتىڭ باستاماسىمەن قۇرىلعان جەر كوميسسياسىنىڭ بەسىنشى وتىرىسى ءوتتى. وندا نەگىزىنەن قازاقستاننىڭ اۋىل شارۋاشىلىعى ماقساتىنا ارنالعان جەرلەرگە قاتىستى جەكە مەنشىك ينستيتۋتىن قالدىرۋ يا قالدىرماۋ ماسەلەسى قارالدى. 

جەر كوميسسياسىنىڭ مۇشەسى مۇحتار تايجاننىڭ ايتۋىنشا، كوميسسيا وتىرىسىندا جەردى جەكە مەنشىككە بەرۋ ماسەلەسىنە تاعى 5 جىل موراتوري جاريالاۋ تۋرالى شەشىم قابىلدانعان.

«جاڭا عانا جەر كوميسسياسىنىڭ 5-ءشى وتىرىسى اياقتالدى. الداعى 5 جىلدا اۋىل شارۋاشىلىعىنا ارنالعان، ياعني، ميلليونداعان گەكتار جەرلەر جەكە مەنشىككە بەرىلمەيدى. موروتوري تاعى 5 جىلعا ۇزارتىلدى. بىراق، ماسەلە ءالى تۇبەگەيلى شەشىلگەن جوق. سوندىقتان، ءبىز بۇل ماسەلەنى ءارى قاراي دا قاداعالاپ وتىرۋىمىز كەرەك.

الداعى 5 جىلدا ميلليونداعان جەرلەرىمىز، ياعني، قازاقستاننىڭ 80 پايىزى جەكە مەنشىككە كەتپەيدى. بۇل دا ناتيجە»، - دەدى مۇحتار بولاتحانۇلى.

ەستەرىڭىگزە سالا كەتەيىك، بۇعان دەيىن 17 ساۋىردە وتكەن جەركومنىڭ جۇمىس توبىنىڭ وتىرىسىندا ەكى جۇمىس توبىنىڭ ناقتى ۇسىنىستارى داۋىسقا سالىنعان. ناقتى قانداي ۇسىنىستار تالقىعا ءتۇسىپ، داۋىسقا سالىنعانىن جەر كوميسسياسىىنڭ توراعاسى، قر ۇكىمەت باسشىسىنىڭ ورىنباسارى ەرالى توعجانوۆ مالىمدەگەن. ولار:

ءبىرىنشى ماسەلە – قولدانىستاعى ا/ش جەرلەرىن قازاقستان ازاماتتارىنا جالعا بەرۋدى جاڭا مەرزىمگە ۇزارتۋعا باسىمدىق بەرۋ ارقىلى ا/ش جەرلەرىن 49 جىلعا دەيىن جالعا بەرۋ بويىنشا ءتيىستى زاڭ نورمالارىنا وزگەرىستەر مەن تولىقتىرۋلار ەنگىزۋ تۋرالى ۇسىنىس.

ەكىنشى ماسەلە – قازاقستان ازاماتتارىنا ا/ش ماقساتىنداعى جەر ۋچاسكەلەرىن جالداۋ قۇقىعىن مەملەكەتتەن ساتىپ الماي، يەلىكتەن شىعارۋ مۇمكىندىگىن بەرەتىن زاڭ نورمالارىن ساقتاپ قالۋ، ءتيىستى زاڭ نورمالارى مەن اكتىلەرىنە وزگەرىستەر مەن تولىقتىرۋلار ەنگىزۋ تۋرالى ۇسىنىس.

ءۇشىنشى ماسەلە – قر تۇتاس اۋماعى بويىنشا ەلدى مەكەندەر توڭىرەگىندەگى جايىلىمدى جەرلەر تاپشىلىعى ماسەلەسى بويىنشا ارنايى تالداۋ جۇرگىزىلىپ، جايىلىمدىق جەرلەردىڭ جەتىسپەۋشىلىگى پروبلەمالارىن شەشۋ تۋرالى ۇسىنىس.

ءتورتىنشى ماسەلە – قولدانىستاعى قر جەر كودەكسىنىڭ 50 بابىنىڭ 4 تارماعىنداعى قر ا/ش ماقساتىنداعى جەر ۋچاسكەلەرىنىڭ شەكتىك مولشەرى تۋرالى نورمالاردى بەكىتۋ، سول ارقىلى ءىرى جەر يەلەنۋشىلەرىن بولدىرماۋ ماسەلەسى. بۇل ۇسىنىستىڭ ناقتى شەشىمى زاڭنامادا بار بولعاندىقتان، بۇل ۇسىنىس كوميسسيا تالقىسىنان الىنىپ تاستالدى.

بەسىنشى ماسەلە – قر مەملەكەتتىك ورگاندارىنىڭ شەشىمدەرىنە سايكەس، اكىمشىلىك شەكارالار وزگەرگەن جاعدايدا جەكە جانە زاڭدى تۇلعالارعا جەر ۋچاسكەلەرىنىڭ قۇجاتتارىن سايكەستەندۋرى، قايتا دايارلاۋ ءۇشىن بيۋدجەتتەن ارنايى قاراجات ءبولۋدى كوزدەيتىن زاڭ نورماسىن ەنگىزۋ تۋرالى ۇسىنىس.

التىنشى ماسەلە – سۋبارەندا ماسەلەسى. قر اۋىل شارۋاشىلىعى ماقساتىنداعى جەر ۋچاسكەلەرىن سۋبارەنداعا بەرۋ قولدانىستا بار زاڭنامادا قاراستىرىلماعاندىقتان، ول سۇراق كوميسسيانىڭ كۇن تارتىبىنەن الىنعان.

جوعارىدا اتالعان ماسەلەلەر ءبىر اپتا بويى جەر كوميسسياسىنىڭ ارنايى قۇرىلعان جۇمىس توپتارىندا تالقىلانعان. وعان كوميسسيا مۇشەلەرى تۇگەل دەردىك اتسالىسقان. كوميسسيا وتىرىسنا قاتىسقانداردىڭ كوپشىلىگى اتالعان ۇسىنىستاردى قولداپ داۋىس بەرگەن. قارسى داۋىس جوق. 4 ادام قالىس قالعان.

«شەشىم كوپشىلىك داۋىسپەن قابىلداندى. شىندىعىن ايتقاندا، بۇگىن ۇلكەن ماڭىزى بار شەشىم قابىلداندى. بۇل شەشىم جەردى ەكونوميكالىق اينالىمعا ەنگىزۋگە تولىقتاي مۇمكىندىك بەرەدى دەپ ايتا الامىن»، - دەدى كوميسسيا توراعاسى ەرالى توعجانوۆ.

ايتپاقشى، وسىعان دەيىن 3 ساۋىردە وتكەن جەر كوميسسياسىنىڭ وتىرىسىندا ۆيتسە-پرەمەر ەرالى توعجانوۆ جەردىڭ شەتەلدىكتەرگە بەرىلمەيتىنى جونىندە ناقتى شەشىم قابىلدانعانىن ايتقان ەدى.

«25 اقپاندا ۇلتتىق قوعامدىق سەنىم كەڭەسىنىڭ كەزەكتى وتىرىسىندا مەملەكەت باسشىسى قاسىم-جومارت توقاەۆ قازاقستاننىڭ ا/ش ماقساتىنداعى جەرلەرىن شەتەلدىكتەر مەن شەتەلدىك كومپانيالارعا بەرۋگە تولىق تىيىم سالۋ تۋرالى شەشىم شىعارىپ، ول زاڭ جوباسى رەتىندە پارلامەنتتىڭ قاراۋىنا ەنگىزىلگەن»، - دەگەن ەدى.

اتالعان زاڭ جوباسى بويىنشا قازاقستاننىڭ ا/ش جەرلەرىن شەتەلدىكتەرگە، شەتەلدىك كومپانيالارعا، ازاماتتىعى جوق ادامدارعا، حالىقارالىق عىلىمي ورتالىقتارعا جانە قانداستارعا بەرۋگە زاڭ جۇزىندە تىيىم سالۋدى كوزدەيتىن باپتار ەنگىزىلگەن.

Abai.kz