رەسەي فەدەراتسياسى ءىىم-ءنىڭ تالابىنا سايكەس رەسەيدە زاڭسىز جۇرگەن قازاقستان ازاماتتارى وسى جىلدىڭ 15 ماۋسىمىنا دەيىن ەلدەن كەتۋگە نەمەسە رەسەي فەدەراتسياسىندا ودان ءارى بولۋىن زاڭداستىرۋ بويىنشا شارالار قابىلداۋى ءتيىس. بۇل تۋرالى قر سىرتقى ىستەر مينيسترلىگى مالىمدەدى.

زاڭسىز جۇرگەن ازاماتتار ساناتىنا:

- مۇلدەم تىركەۋگە تۇرماعان;

- ۋاقىتشا تىركەۋىنىڭ، ۋاقىتشا تۇرۋعا رۇقساتىنىڭ (رۆپ) جانە تۇرعىلىقتى تۇرۋعا رۇقساتىنىڭ (ۆنج) ۋاقىتى ءوتىپ كەتكەن ازاماتتار جاتادى.

«سونىمەن قاتار، زاڭدى نەگىزدەر بولعان جاعدايدا (جۇمىس، وقۋ جانە ت.ب.) قازاقستاندىقتار رەسەيدەن شىقپاي، ەلدە ۋاقىتشا بولۋ مەرزىمدەرىن ۇزارتۋ ءۇشىن ءىىم ورگاندارىنا جۇگىنۋگە قۇقىلى. بۇل جاعدايدا ازاماتتارعا قاتىستى جاۋاپكەرشىلىككە تارتۋ شارالارى قولدانىلمايدى», - دەدى مينيسترلىك وكىلدەرى.

ەگەر رەسەيدە بولۋ مەرزىمىن زاڭدى تۇردە ۇزارتۋدان باس تارتسا جانە ەلدەن ءوز ەركىمەن كەتكىسى كەلمەسە، قۇقىق بۇزۋشىلاردى ەلدەن ماجبۇرلەپ شىعارۋ جانە رەسەيگە كىرۋگە شەكتەۋ قويۋ شارالارى قولدانىلۋى مۇمكىن.

Abai.kz