ەكىنشى دۇنيەجۇزىلىك سوعىستىڭ اياقتالۋىنا 76 جىل تولۋىنا وراي، سوعىس ارداگەرلەرى مەن ولارعا تەڭەستىرىلگەن تۇلعالارعا ءبىر رەتتىك جاردەماقى تولەنەتىنى جونىندە شەشىم قابىلداندى.

وعان سايكەس، قازاقستاننىڭ بارلىق ايماعىنداعى ەكىنشى دۇنيەجۇزىلىك سوعىسقا قاتىسقان ارداگەرلەرگە 1 ميلليون تەڭگە كولەمىندە جاردەماقى تاعايىندالماق.

ال، تاعايىندالعان جاردەماقىنى الاتىندار قاتارىندا سوعىس ارداگەرلەرى مەن مۇگەدەكتەرى جانە ەكىنشى دۇنيەجۇزىلىك سوعىسقا قاتىسۋشىلار مەن مۇگەدەكتەرىنە تەڭەستىرىلگەن ازاماتتار سونىمەن قاتار، تىل ارداگەرلەرى بار.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇسىنىسىنا ساي، ەكىنشى دۇنيەجۇزىلىك سوعىس ارداگەرلەرىمەن ولارعا تەڭەستىرىلگەن ازاماتتارعا اقشالاي تولەم بولعان كەزدە، قارجىلاي ىنتالاندىرۋ بارلىق وڭىردە بىردەي مولشەردە بولۋى قامتاماسىز ەتىلگەن. سونىمەن بيىل ەكىنشى دۇنيەجۇزىلىك سوعىستىڭ اياقتالعانىنا 76 جىل تولۋىنا وراي، بارلىق وڭىردەگى قازاقستاندىق سوعىس ارداگەرلەرىنە ءبىر رەتتىك ءبىر ميلليون تەڭگە كولەمىندە ماتەريالدىق جاردەم بەرىلەدى.

سوعىس ارداگەرلەرىنە ءبىر رەتتىك الەۋمەتتىك جاردەم بەرۋ تۋرالى ۇسىنىستى الماتى قالالىق ءماسليحاتى دا كوتەرگەن. ونى 2021 جىلعى 30 ءساۋىر كۇنى وتكەن IV سەسسياسىنىڭ بارىسىندا قالالىق الەۋمەتتىك ءال-اۋقات باسقارماسىنىڭ باسشىسى نازيرا توعىزباەۆا ۇسىنعان بولاتىن.

ءسويتىپ، سوعىس ارداگەرلەرىنە 1 ميلليون تەڭگەدەن، ال، بەيبىت كەزەڭدە قازا تاپقان ارداگەرلەردىڭ جۇبايلارىنا جانە ەڭبەك مايدانىنا قاتىسۋشىلارعا 50 مىڭ تەڭگەدەن ءبىر رەتتىك جاردەماقى بەرىلمەك.

ال، الماتى قالاسىنداعى ەكىنشى دۇنيەجۇزىلىك سوعىسىنا قاتىسقان 123 ارداگەر مەن مۇگەدەكتەرىنىڭ ارقايسىنا 1 ميلليون تەڭگەدەن، 12 مىڭنان استام ادام 50 مىڭ تەڭگەدەن، سونىمەن قاتار، 4 مىڭعا جۋىق ادامنىڭ ءاربىرى 100 مىڭ تەڭگەدەن الۋ تۋرالى شەشىم قابىلدانعان.

ناقتىراق ايتا كەتسەك،

- ەكىنشى دۇنيەجۇزىلىك سوعىسىنا قاتىسقان ازاماتتار مەن مۇگەدەكتەرگە، 123 ادامعا 1 ميلليون تەڭگەدەن بەرىلەدى.

- ەكىنشى دۇنيە جۇزىلىك سوعىسىنىڭ ارداگەرلەرىنە تەڭەستىرىلگەن تۇلعالارعا جەڭىلدىكتەر بويىنشا، 1709 ادامعا 100 مىڭ تەڭگەدەن بەرىلەدى.

- ەكىنشى دۇنيەجۇزىلىك سوعىسىندا قايتىس بولعان (حابارسىز كەتكەن، قازا تاپقان) ازاماتتاردىڭ ەكىنشى رەت نەكەلەسپەگەن جەسىرلەرىنە 100 مىڭ تەڭگەدەن تاعايىندالعا.

سونىمەن قاتار، شەت مەملەكەتتەردىڭ اۋماعىنداعى جاۋىنگەرلىك ۇرىس قيمىلدارىنىڭ ارداگەرلەرىنە، ياعني،، 2 725 ادامعا 100 مىڭ تەڭگەدەن بەرىلەدى.

ودان بولەك، ەكىنشى دۇنيەجۇزىلىك سوعىسىندا قايتىس بولعان، جەڭىلدىكتەر نەمەسە مۇگەدەكتىگى بويىنشا سوعىس مۇگەدەكتەرىنە تەڭەستىرىلگەن ادامنىڭ جۇبايى، سونىمەن قاتار، جۇمىستا مەرتىگك، جالپى اۋرۋعا شالدىعۋ جانە باسقا دا سەبەپتەردىڭ سالدارىنان مۇگەدەك اتانعان، ەكىنشى دۇنيەجۇزىلىك سوعىسىندا قازا تاپقان استىرتىن ارەكەت ەتۋشىنىڭ، پارتيزاننىڭ، لەنينگراد ءۇشىن مەدالىمەن ماراپاتتالعان جاۋىنگەرلەردىڭ ەكىنشى رەت نەكەگە تۇرماعان جۇبايلارىنا، ياعني، 590 ادامعا 50 مىڭ تەڭگەدەن تاعايىندالاتىن بولادى.

جانە، ەكىنشى دۇنيەجۇزىلىك سوعىس كەزىندە تىلدا ەڭبەك ەتكەن مايدان قاتىسۋشىلارىنا، سونىڭ ىشىندە كسرو وردەندەرى مەن مەدالدارىمەن ماراپاتتالعاندارعا، سونىمەن قاتار ماراپاتتالماعان 12 مىڭ ادامعا 50 مىڭ تەڭگەدەن بەرىلەدى.

سونداي-اق، شەت مەملەكەتتەردەگى ۇرىس قيمىلدارى كەزىندە مەرتىگۋى، اۋرۋعا شالدىعۋى، جارالانۋى سالدارىنان قايتىس بولعان نەمەسە حات-حابارسىز كەتكەن اسكەري قىزمەتشىلەردىڭ قايتا نەكەگە تۇرماعان جۇبايلارىنا جانە اتا-انالارىنا، ياعني، 29 ادامعا 100 مىڭ تەڭگەدەن تاعايىندالماق.

ايتا كەتەيىك، قر ەڭبەك جانە حالىقتى الەۋمەتتىك قورعاۋ مينيسترلىگىنىڭ وتكەن جىلعى مامىر ايىنداعى ەسەبى بويىنشا، قازاقستاندا ەكىنشى دۇنيەجۇزىلىك سوعىسىنا قاتىسقان 1025 ارداگەر مەن مۇگەدەكتەرى تۇرادى. سونىمەن قاتار، ەكىنشى دۇنيەجۇزىلىك سوعىستاعى جەڭىسكە ۇلەس قوسقان باسقا ساناتتاعى ازاماتتاردىڭ سانى 123 مىڭنان اساتىنى ايتىلعان. مينيسترلىك مالىمەتىنشە، 2015 جىلى، ياعني، سوعىستىڭ اياقتالعانىنا 70 جىل تولۋىنا وراي، ارداگەرلەردىڭ بارلىعى تۇرعىن ۇيمەن قامتىلىپتى. ال، 2020 جىلى سوعىس ارداگەرلەرى مەن مۇگەدەكتەرىنە تەڭەستىرىلگەن 2100-گە جۋىق ازامات باسپانا كەزەگىندە بولعان.

سونىمەن قاتار، 2020 جىلى قر ماجىلىسىندە “ارداگەرلەر تۋرالى” زاڭ جوباسى ءبىرىنشى وقىلىمدا ماقۇلدانعان بولاتىن. زاڭ جوباسىندا قولدانىستاعى زاڭناما بويىنشا سوعىس ارداگەرلەرىنە تاعايىندالاتىن بارلىق دەرلىك كەپىلدىكتەر مەن جەڭىلدىكتەر كىرىكتىرىلگەن.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، اتالعان زاڭ جوباسىنىڭ اياسىندا بىرنەشە شارالار ۇسىنىلعان. ولاردىڭ قاتارىندا: ارداگەرلەردىڭ الەۋمەتتىك قورعالاتىن بەس ساناتىن انىقتاۋ، باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرىنىڭ ساناتتارىن كەڭەيتۋ، اۋعانستانداعى جانە باسقا ەلدەردەگى ۇرىس قيمىلدارىنا قاتىسقان اسكەري قىزمەتشىلەردى باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرىنە جاتقىزۋ; چەرنوبىلدەگى اپات سالدارىن جويۋعا قاتىسۋشىلارىن، سونىمەن قاتار سوتسياليستىك ەڭبەك ەرلەرىن، ينتەرناتسيوناليست-جاۋىنگەرلەردى  الەۋمەتتىك قولداۋ بويىنشا شارالاردى كۇشەيتۋ سەكىلدى شارالار ۇسىنىلعان.

ال، 5 الەۋمەتتىك قورعالاتىن ساناتتاعى ارداگەرلەر قاتارىنا: ەكىنشى دۇنيەجۇزىلىك سوعىسقا قاتىسقان ارداگەرلەر، كەپىلدىكتەر مەن جەڭىلدىكتەر بويىنشا ەكىنشى دۇنيەجۇزىلىك سوعىسىنىڭ ارداگەرلەرىنە تەڭەستىرىلگەن ازاماتتار، باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرى، زاڭ كۇشى قولدانىلاتىن باسقا دا ساناتتاعى ادامدار مەن ەڭبەك ارداگەرلەرى جاتادى.

سونداي-اق، 2020 جىلدان باستاپ ەكىنشى دۇنيەجۇزىلىك سوعىس ارداگەرلەرىنە بەرىلەتىن مەملەكەتتىك جاردەماقى 4,8 اەك كولەمىندە ياعني،  12 725 تەڭگە بولىپ بەلگىلەنگەن بولاتىن.

Abai.kz