قازاقستاننىڭ بۇرىنعى دەنساۋلىق ساقتاۋ ءمينيسترى ەلجان ءبىرتانوۆ سوتقا كەلىپ، ءوزىنىڭ سىبايلاس جەمقورلىق قىلمىستارىنا قاتىسى جوق ەكەنىن مالىمدەدى.

كەشە سوتتا پروكۋرور تولەگەن جاراسباەۆ 2020 جىلدىڭ قازانىنان بەرى قاماۋدا وتىرعان بۇرىنعى دەنساۋلىق ساقتاۋ ءمينيسترى ەلجان بىرتانوۆقا تاعىلعان ايىپتار تۋرالى ايتقان. الايدا ءبىرتانوۆ تەرگەۋ ورگاندارى وعان ءالى ايىپ تاقپاعانىن ايتتى.

- كەشە بىرقاتار بۇقارالىق اقپارات قۇرالى پروكۋروردىڭ ماعان ايىپ تاققانى تۋرالى قاتە نەمەسە ادەيى جازىلعان اقپارات تاراتتى. سوتقا قاتىسقان باق وكىلدەرىنە ماعان ءالى ايىپ تاعىلماعانىن، تەرگەۋ ءالى ءجۇرىپ جاتقانىن حابارلاعىم كەلەدى. بۇگىنگى تاڭدا كۇدىكتىڭ نەگىزدىلىگى مەن كۇدىكتى رەتىندە مەنىڭ قۇقىعىمدى شەكتەۋ تۋرالى ماسەلە عانا قارالىپ جاتىر. 

ارىزدى زەردەلەپ، ۇرلىق پەن جىمقىرۋ كۇدىكتەرىنىڭ زاڭدىلىعى مەن نەگىزدىلىگىن راستايتىن سەنىمدى دەرەكتەر جوق ەكەنىن ايتقىم كەلەدى. سەبەبى ۇرلىق جاسالعان جوق. مەن دەنساۋلىق ساقتاۋ ءمينيسترىنىڭ مىندەتتەرىن اتقارعاندا وسى ىستە دە، باسقالارىندا دا قانداي دا ءبىر سىبايلاس جەمقورلىققا قاتىسىم جوق ەكەنىن تاعى دا جاريا تۇردە مالىمدەيمىن,- دەدى ءبىرتانوۆ.

ال، پروكۋرور جاراسباەۆتىڭ سوزىنشە، ەكس-مينيسترگە بىرنەشە ايىپتار تاعىلعان. ماسەلەن، 2015 جىلى دەنساۋلىق ساقتاۋ مينيسترلىگى حورۆاتيالىق Ericsson Nikola Tesla كومپانياسىمەن "دەنساۋلىق ساقتاۋ اقپاراتتىق جۇيەلەرىن اقپاراتتاندىرۋ جانە ءوزارا ارەكەتتەسۋ پلاتفورماسى" اۆتوماتتاندىرىلعان اقپاراتتىق جۇيەسىن جەتكىزۋ ءۇشىن 17,8 ميلليون دوللارعا كەلىسىمشارت جاساسقان.

- دەنساۋلىق ساقتاۋ ءمينيسترى ەلجان ءبىرتانوۆ پلاتفورما جۇمىس ىستەمەيتىنىن بىلسە دە، ولجاس ابىشەۆپەن الدىن-الا كەلىسىپ، 2018 جىلدىڭ قازانىندا نۇر-سۇلتان، باتىس قازاقستان جانە شىعىس قازاقستان وبلىستارىنىڭ 17 مەديتسينالىق مەكەمەسىندە پلاتفورمانى پيلوتتىق پايدالانۋ تۋرالى بۇيرىققا قول قويدى. ءىس جۇزىندە پيلوتتىق پايدالانۋ جۇرگىزىلگەن جوق", - دەدى پروكۋرور.

سونداي-اق، 2019 جىلدىڭ قاڭتارىندا ءبىرتانوۆ پرەمەر-مينيسترگە 17 دەنساۋلىق ساقتاۋ ۇيىمىندا پلاتفورمانىڭ پيلوتتىق جۇمىسى تۋرالى جالعان اقپارات ايتىپ، ۇكىمەت باسشىلىعىن الداعان.

- سونىمەن قاتار، ۆيتسە-مينيستر ولجاس ابىشەۆ ەلجان ءبىرتانوۆتىڭ نۇسقاۋىمەن 2018 جىلدىڭ قازانىندا مەملەكەتتىك ساتىپ الۋ تۋرالى زاڭدى قولدانباي، Ericsson Nikola Tesla-مەن 9 ميلليون دوللار سوماسىنا تىكەلەي كەلىسىم جاساستى, - دەدى پروكۋرور.

ايىپتاۋشى تاراپتىڭ مالىمەتىنشە، ابىشەۆ ءبىرتانوۆتىڭ بۇيرىعىمەن 2018 جىلدىڭ جەلتوقسانىندا كومپانياعا اتقارماعان جۇمىسى ءۇشىن 6,8 ميلليون اقش دوللارىن اۋدارعان.

سونداي-اق، پروكۋرور ەلجان ءبىرتانوۆ پەن ولجاس ابىشەۆ سەنىپ تاپسىرىلعان بيۋدجەت قاراجاتىن جىمقىردى جانە مەملەكەتكە اسا ءىرى - 1,5 ميلليارد تەڭگە نەمەسە 4,1 ميلليون دوللار كولەمىندە ماتەريالدىق شىعىن كەلتىردى دەگەن كۇدىككە ىلىنگەن دەگەن ايىپتار تاعىلعانىن ايتقان.

Abai.kz