دەموكراتيالىق پارتيا باستاماشىل توبىنىڭ جەتەكشىسى جانبولات ماماي Nur Otan پارتياسى توراعاسىنىڭ ورىنباسارى باۋىرجان بايبەكتىڭ تالاپ ارىزى نەگىزىندە وتكەن ازاماتتىق پروتسەسستە بايبەك تاراپىمەن تاتۋلاسۋدان باس تارتتى.

ازاماتتىق بەلسەندى قازاقستان سوتىنا سەنبەيتىنىن، بۇعان دەيىن وزىنە قاتىستى قوزعالعان ىستەر مەن وزگە دە پروتسەسستەردە ءادىل شەشىم شىققانىن كورمەگەنىن جەتكىزىپ، ۇستانىمىنان قايتپايتىنىن مالىمدەدى. ول بۇعان دەيىن دە ايتقانىنداي باۋىرجان بايبەكتى اشىق، تىكەلەي ەفيردە وتەتىن دەباتقا شىعۋعا، سول جەردە ءوز ويىن ايتۋعا شاقىردى. "سوندا عانا حالىق ءوز باعاسىن بەرەدى" دەيدى ول.

بايبەك-ماماي تەكەتىرەسى بەلسەندىنىڭ NurOtan پارتياسى توراعاسىنىڭ ورىنباسارى تۋرالى ۆيدەوماتەريال جاريالاۋىنان باستالعان. جانبولات ماماي ول جەردە UZUN Qulaq تەلەگرام كانالىنداعى، اشىق دەرەككوزدەردەگى، بىرقاتار ءباسپاسوز بەتتەرىندە جاريالانعان اقپاراتتاردى نەگىزگە الىپ، بايبەكتى "بيۋدجەت اقشاسىن "جەپ" ميللياردەر اتاندى" دەپ ايىپتايدى. بۇعان جاۋاپ رەتىندە بايبەك NurOtan پارتياسىنىڭ ەكس-دەپۋتاتى، بۇگىندە youtube جەلىسىندە ۆيدەوبلوگ تۇسىرۋمەن اينالىسىپ جۇرگەن تاڭىربەرگەن بەردوڭعارعا سۇحبات بەرىپ، وپپوزيتسيونەردىڭ ايىپتارىن تەرىستەپ، ونى سوتقا بەرەتىنىن ءمالىم ەتتى. مۇنان سوڭ ماماي قازاقستان سوتى ءوزىن جىعىپ بەرەتىنىن ءمالىم ەتىپ، بايبەكتى تىكەلەي ەفير رەجيمىندە اشىق دەباتقا شىعۋعا شاقىردى. ۇزاماي NurOtan پارتياسى اتىنان ءماجىلىس دەپۋتاتى اتانعان ەلنۇر بەيسەنباەۆ Qazaqstan ارناسىنىڭ ءجۋرناليسى نارتاي ارالبايۇلىنىڭ youtube ارناسىنا سۇحبات بەرىپ، مامايدىڭ بايبەكتى دەباتقا شاقىرۋىن سىناپ، مامايدىڭ ءوزىن دەباتقا شاقىرادى. بۇعان جاۋاپ رەتىندە ماماي دەباتقا باسقا-باسقانى ەمەس، ءوزىنىڭ سوزدەرىن "وتىرىك" دەگەن، سوتقا بەرەتىنىن ايتقان بايبەكتى شاقىرعانىن ءمالىم ەتەدى.

Abai.kz