قازاق رۋحانياتىنىڭ قارا شاڭىراعى، قالامگەرلەردىڭ قاسيەتتى ورداسى جازۋشىلار وداعىنىڭ ماڭايىندا تاعى ءبىر «كۇڭكىل» پايدا بولدى.  بۇل جولى قابدەش ءجۇمادىلوۆ، بەيبىت قويشىباي، مىرزان كەنجەباي، ساعىنگەرەي بايمەنوۆ سىندى ءبىر توپ زيالى: «جازۋشىلار وداعىنىڭ توراعاسى نۇرلان ورازالين ورنىنان كەتسىن»، - دەپ وتىر. وسىدان ءبىر-ەكى جىل ىلگەرىدە «نۇرلان ورازالين «ماڭگىلىك توراعا» بولعىسى كەلە مە؟» دەگەن اڭگىمە تاعى قوزداپ، ءبىراز جەرگە بارىپ باسىلعان ەدى. بۇل جولى بىلەك تۇرگەن ءبىر توپ جازۋشى: «الداعى جازۋشىلار قۇرىلتايىندا ءورازاليننىڭ ورنىندا قالۋىنا جول بەرمەۋىمىز قاجەت»، - دەيدى.  بىز وسى باستامانىڭ باسى-قاسىندا جۇرگەن قابدەش جۇمادىلوۆپەن كەزدەسىپ، كوك ءۇي تۋرالى «كۇڭكىلگە» قۇلاق ءتۇرىپ، جازۋشىلاردىڭ تالاپ-تىلەگىن تىڭداپ قايتقان ەدىك.

قابدەش ءجۇمادىلوۆ، جازۋشى:

- اعا، ءبىر توپ جازۋشى جازۋشىلار وداعىنىڭ توراعاسى نۇرلان ءورازاليننىڭ جۇمىسىنا كوڭىل تولمايتىندىقتارىڭىزدى جەتكىزىپ، جۇمىستان كەتۋىن تالاپ ەتىپسىزدەر. «ورازالين ادەبيەتتى قورلاۋمەن كەلەدى»، - دەپ قالدىڭىزدار. وسى تۋرالى تاراتىپ ايتىڭىزشى...

قازاق رۋحانياتىنىڭ قارا شاڭىراعى، قالامگەرلەردىڭ قاسيەتتى ورداسى جازۋشىلار وداعىنىڭ ماڭايىندا تاعى ءبىر «كۇڭكىل» پايدا بولدى.  بۇل جولى قابدەش ءجۇمادىلوۆ، بەيبىت قويشىباي، مىرزان كەنجەباي، ساعىنگەرەي بايمەنوۆ سىندى ءبىر توپ زيالى: «جازۋشىلار وداعىنىڭ توراعاسى نۇرلان ورازالين ورنىنان كەتسىن»، - دەپ وتىر. وسىدان ءبىر-ەكى جىل ىلگەرىدە «نۇرلان ورازالين «ماڭگىلىك توراعا» بولعىسى كەلە مە؟» دەگەن اڭگىمە تاعى قوزداپ، ءبىراز جەرگە بارىپ باسىلعان ەدى. بۇل جولى بىلەك تۇرگەن ءبىر توپ جازۋشى: «الداعى جازۋشىلار قۇرىلتايىندا ءورازاليننىڭ ورنىندا قالۋىنا جول بەرمەۋىمىز قاجەت»، - دەيدى.  بىز وسى باستامانىڭ باسى-قاسىندا جۇرگەن قابدەش جۇمادىلوۆپەن كەزدەسىپ، كوك ءۇي تۋرالى «كۇڭكىلگە» قۇلاق ءتۇرىپ، جازۋشىلاردىڭ تالاپ-تىلەگىن تىڭداپ قايتقان ەدىك.

قابدەش ءجۇمادىلوۆ، جازۋشى:

- اعا، ءبىر توپ جازۋشى جازۋشىلار وداعىنىڭ توراعاسى نۇرلان ءورازاليننىڭ جۇمىسىنا كوڭىل تولمايتىندىقتارىڭىزدى جەتكىزىپ، جۇمىستان كەتۋىن تالاپ ەتىپسىزدەر. «ورازالين ادەبيەتتى قورلاۋمەن كەلەدى»، - دەپ قالدىڭىزدار. وسى تۋرالى تاراتىپ ايتىڭىزشى...

- جازۋشىلار وداعى، ونىڭ توراعاسى نۇرلان ورازالين تۋرالى اڭگىمە قالامگەرلەر اراسىندا كوپتەن بار. ال قازىر ءتىپتى قىزىپ جاتىر. سەبەبى، بيىل ماۋسىم ايىندا  جازۋشىلاردىڭ بەس جىلدا ءبىر رەت بولاتىن قۇرىلتايى ءوتۋى ءتيىس. ماۋسىمدا وتۋگە ءتيىس سەزد قىركۇيەك ايىنا شەگەرىلىپتى. بەيبىت قويشىباي بار، مىرزان كەنجەباي، ساعىنگەرەي بايمەنوۆ، ءامىرحان مەڭدەكە - ءبارىمىزدىڭ باسىمىز جيىلىپ، الداعى سەزدە  نۇرلان ءورازاليننىڭ قايتا سايلانباۋىن قالاپ وتىرمىز.  ورازاليننىڭ وداقتىڭ توراعاسى بولعانىنا بيىل  16 جىل بولدى. وداقتىڭ تاريحىندا 16 جىل باسشى بولعان ەشكىم جوق. ەكى مارتە سايلانعان عابيت مۇسىرەپوۆ پەن ءسابيت مۇقانوۆتاردىڭ ءوزى  بىرى سەگىز جىل، ءبىرى توعىز جىل عانا باسقارعان.  ماسەلە ءورازاليننىڭ ورىنتاقتا كوپ جىل وتىرعانىندا ەمەس، ارينە. ەگەر جاقسى باسشى بولىپ، دۇرىس ءىس تىندىرسا مەيلى عوي.  بۇل كىسىنىڭ ءىس باسقارۋىنا، جازۋشىلارعا دەگەن قامقورلىعىنا كوڭىلىمىز تولمايدى. قالامگەرلەردىڭ اعا بۋىنى اقساقال جازۋشىلارمەن ساناسۋدى قويدى. بۇرىندارى «اقساقالدار القاسى» دەگەن بار-تۇعىن. ونى مۇلدەم تاراتىپ جىبەردى. حالىقارالىق «الاش» سىيلىعىن بەرەتىن كوميسسيانىڭ قۇرامىن وزىنشە وزگەرتتى. مەن  دە سول كوميسسيانىڭ قۇرامىندا ەدىم. بىرنەشە جىلدان بەرى مەنى دە سىزىپ تاستادى. ادىلەتىن ايتاتىن ءبىراز ادام كوميسسيالىققا كىرمەي قالدى. قىسقاسى، ورازالين ءوز ماڭايىنا ءوزىنىڭ «سىبايلاس» ادامدارىن توپتاپ الدى. تالعاممەن ساناسۋدى قويدى. قازىر  جازۋشىلار وداعىندا 700-گە جۋىق جازۋشى بار دەسەك، سونىڭ قاق جارتىسى وسى ءورازاليننىڭ تۇسىندا وداق مۇشەلىگىنە قابىلداندى. ءبىر-ەكى شىعارما جازىپ، جازۋشىمىن دەپ كەۋدە سوعىپ جۇرگەندەردى دە، زەينەتكە شىققاسىن ەستەلىك جازىپ جازۋشى بولىپ كەتكەندەردى دە مۇشەلىككە وتكىزىپ جىبەردى.  جازۋشىلار ولاردى «ءورازاليننىڭ جازۋشىلارى» دەپ اتايدى سىرتتاي. جازۋشى مەن ءجۋرناليستىڭ اراسىنداعى ارا جىك تە جويىلىپ كەتتى. تالعامنىڭ تومەندەپ كەتكەنىنىڭ تاعى ءبىر كورىنىسى بيىل حالىقارالىق «الاش» سىيلىعىن 42 ادامعا ۇستاتا سالدى. «الاش» سىيلىعىن العانداردىڭ قاتارىندا، سىيلىق  الماق تۇگىلى جازۋشىلار وداعىنا مۇشە بولۋعا شارتى  تولمايتىن ادامدار ءجۇر. «بۇل ءورازاليننىڭ سەزد الدىندا وزىنە داۋىس بەرۋشىلەردىڭ سانىن ارتتىرۋ ءۇشىن جاساپ وتىرعان ارەكەتى»، -  دەيدى مەنىمەن ۇندەس جازۋشىلار. ايتپەسە ءبىر جىلدا 42 ادامعا سىيلىق ۇلەستىرۋ ەشبىر ەلدە بولماعان شىعار. سۇمدىق قوي مۇنىسى. ادەبيەتتى قورلاۋ دەگەنىمىز - وسى. «الاش» دەگەن ۇلى ۇعىمنىڭ اتىنداعى ۇلكەن حالىقارالىق سىيلىقتى قورلاۋ. ودان بولەك، ورازالين جازۋشىلار وداعىنىڭ عيماراتىنداعى ءبىراز كابينەتتى جالعا بەرىپ، وداق قازىر سونىمەن كۇن كورىپ وتىر.  جازۋشىلاردىڭ 40 بولمەلى شىعارماشىلىق ءۇيىن دە قىتايلارعا جالعا بەرىپ جىبەردى. قازىر ول ءۇي اركىمدەر تۇنەپ شىعاتىن قوناقۇيگە اينالدى. ودان ءتۇسىپ جاتقان تابىس جايىندا جازۋشىلارعا ەسەپ بەرمەيدى. جازۋشىلار وداعىنىڭ اتىندا جەر تەلىمى، بازار دا بار كورىنەدى. قىسقاسى مەن بىلمەيتىن نارسەلەر دە كوپ ەكەن. وتكەندە جىگىتتەر ايتىپ وتىر. مەنى قوزعاعانى بيىلعى «الاش» سىيلىعىن تاعايىنداۋدا تالعامنىڭ ەسكەرىلمەۋى. قاراپ وتىرساڭ، وداقتى باسقارعان ءار باسشى  ارتىنا ءىز قالدىرعان.  ماسەلەن، ءانۋار ءالىمجانوۆ كەزىندە جازۋشىلارعا بار جاعدايدى جاسادى. شىعارماشىلىق ءۇي سالدىرىپ، جازۋشىلاردىڭ  شىعارماشىلىقپەن ەركىن اينالىسۋىنا مۇمكىندىك تۋعىزدى.  ەلۋ شاقتى جازۋشىعا باسپانا  الىپ بەردى. ال ەرتەڭ ءورازاليننىڭ قانداي ءىسىن ايتامىز؟ قايدان شىعارعانىن بىلمەيمىز،  انا جىلى ءوزىنىڭ جاقتاستارىن جيىپ الىپ، «قۇرمەتتى توراعا» دەگەن ۋستاۆ جاساپ الدى. ول ۋستاۆپەن مەن، ماسەلەن، تانىس ەمەسپىن. جيىنىنا شاقىرعان دا جوق. «قۇرمەتتى توراعا» دەگەنى - ەرتەڭ وداققا باسقا بىرەۋ باسشى بولسا دا، بيلىك ءورازاليننىڭ قولىندا بولادى ەكەن.  بۇل قالاي  سوندا؟ نۇرلان «ماڭگىلىك توراعا» ەكەن دەپ سونىڭ اۋزىنا قاراپ وتىرۋ كەرەك پە؟ قىسقاسى، بىزگە وزگەرىس قاجەت. وسى سەزدە 16 جىلدىق قىزمەتىنە راحمەت ايتىپ، ءورازاليندى جولعا سالۋىمىز كەرەك.

- جاڭا ءبىر سوزىڭىزدە «الاش» سىيلىعىن 42 ادامعا بەرۋى الداعى سەزدە داۋىس جيناۋ ءۇشىن جاساعان ارەكەتى  دەدىڭىز. نۇرلان ءورازاليننىڭ بۇدان بۇرىن دا سەزد الدىندا وسىنداي قادامدارعا بارعانىن بايقادىڭىزدار ما؟ دەگەنمەن بارلىق كەزدە ادىلەتسىز ءوتتى دەي الماسسىز. ءاۋ باستا جازۋشىلار وداعىنىڭ توراعالىعىنا بۇل كىسى قالاي كەلدى؟

- نۇرلاندى 1996 جىلى ءوزى دە شىعارماشىلىق ادامى بولعاندىقتان، جازۋشىلاردىڭ جاعدايىن دۇرىستار دەگەن ۇمىتپەن سايلاپ ەدىك. ونىڭ ۇستىنە  دەپۋتات بولدى. جوعارى جاقپەن قارىم-قاتىناس جاساي الادى. قانشا دەگەنمەن ءىستىڭ ادامى عوي دەپ ويلاعانبىز. بەس جىلدان كەيىن قايتا سايلاندى. ودان كەيىن تاعى بەس جىل ورنىنان جىلجىمادى.  سوڭىندا جاعداي وسىنداي بولدى. جىل سايىن ورازالين جازۋشىلار وداعىنا مۇشەلىككە جازۋشىلاردى كوپ تارتتى. ونى ءار سەزدە سول جاڭا جازۋشىلار قولداپ وتىردى.  وتكەن سەزدە دە ءورازاليندى كەتىرەمىز دەگەندەر بولىپتى. ول كەزدە مەن ارالاسقان جوق ەدىم. «ورازالين جوعارى جاقتىڭ كەلىسىمىن الىپ كەلىپتى، جوعارى جاق ونىڭ ورنىندا قالعانىن قۇپتايدى ەكەن»، - دەگەن ءار ءتۇرلى اڭگىمەلەرمەن، ءارى قارسى شىققان ءبىراز جازۋشىنى جيىپ الىپ، باسۋ ايتىپ، ىراقايلاستىرۋمەن قايتا سايلانعان كورىنەدى.

- 16 جىل بويى ەشبىر وزگەرىس جاسامادى دەيسىز. جالپى زيالى قاۋىم قانداي وزگەرىستى قالايسىزدار سوندا؟

- بۇرىن جازۋشىلار وداعىنىڭ بەدەلى كەرەمەت-تۇعىن. كەڭەس ۇكىمەتى تۇسىندا تىركەلمەگەن ۇلتتىق پارتيانىڭ ءرولىن اتقاراتىن. ورتالىق كوميتەت پەن وكىمەتتىڭ ءوزى جازۋشىلار وداعىنا  جالتاقتاپ وتىراتىن. قازىر جازۋشىلار وداعىنىڭ بەدەلى ءتۇسىپ كەتتى. بەدەل دەگەنىڭىز باسقارۋشىعا بايلانىستى عوي. باسشىمىز ۇندەمەي تۇرعاسىن جازۋشىلارمەن كىم ساناسسىن؟! ورازالين كوپ ءىستى «جاعىنۋ» جولىمەن شەشەمىن دەپ ويلايدى. ءوزى جوعارى جاقپەن، بيلىكتەگىلەردىڭ بىرازىمەن جاقسى. ولار تۇرعاندا مەنى كىم الادى دەيتىن بولۋى كەرەك. ءوزى بيلىككە بەيىم ادام. سوندىقتان بۇل جىگىتتىڭ باعىن بايلاماي، ءوزىنىڭ بەيىمى بار جاققا جىبەرۋ كەرەك. دەپۋتات بولا ما، جوق الدە باسقا قىزمەت اتقارا ما، جوعارىلايمىن دەسە ءوزى بىلەدى. ولاي دەيتىنىم، جازۋشىلار وداعى مەملەكەتتىك مەكەمە ستاتۋسىنان ايرىلىپ، قازىر قوعامدىق ۇيىم بولىپ قالدى. قالامگەرلەرگە ءبىر تيىن قالاماقى تولەنبەيدى. اقىن-جازۋشىلار كىتابىن شىعارۋ ءۇشىن كىم كورىنگەنگە الاقان جايىپ، قايىرشىنىڭ كۇنىن كەشىپ ءجۇر. توراعا بولعان سوڭ ورازالين وسى ءۇشىن كۇرەسۋى كەرەك قوي. قوعامدىق ۇيىمعا جاتقىزاتىنداي ەمەس، جازۋشىلار ۇلتتىڭ رۋحاني بايلىعىن جاساپ وتىرعان ادامدار عوي، بىلە بىلسە. ءبىز - ەڭبەكشىلەرمىز. ەڭبەكشىلەردىڭ ەڭبەگى وتەلۋى ءتيىس ەمەس پە؟ ۇكىمەتتىڭ جىل سايىن بىرنەشە جازۋشىعا تاعايىنداعان پرەزيدەنتتىك ستيپەندياسى بار ەدى. سول ستيپەندياعا دا سۇرىپتاپ، وزىنە جاعىمدى ادامداردى كىرگىزەدى. ءلابباي تاقسىر دەپ وزىنە دە، بيلىككە دە ءبىر اۋىز قارسى ءسوز ايتپايتىنداردى ستيپەندياعا جاقىنداتادى. كەيىنگى ءۇش جىلدا مەنى مەن مۇحتار ماعاۋيندى وسى ستيپەنديادان سىزىپ تاستاپتى. ماقتانعانىم ەمەس، قازاق پروزاسىندا  ماعاۋين ەكەۋىمىزدىڭ الدىمىزعا تۇسەتىن قايسىسى بار؟! ەڭبەك ەتپەي جاتقانىمىز جوق، مۇحتار قازىر «شىڭعىس حان»  اتتى ءتورت تومدىق رومان جازىپ جاتىر. مەن 2011 جىلى «كوكجال»،  2010 جىلى «توزاق وتى»، 2008 جىلى «ماڭگىلىك مايدان» اتتى ءۇش كىتابىمدى جارىققا شىعاردىم. قازىر «ابىلايدىڭ اقىرعى كۇنى» اتتى تاريحي حيكايات جازىپ جاتىرمىن. سونى كورىپ تۇرىپ، قالاي ستيپەنديادان قاعادى؟ ماسەلە ستيپەنديادا دا ەمەس. ەڭبەكتى ەلەۋ، باعالاۋ كەرەك. مەن ءوزىم نۇرلاندى شىعارماشىلىقتا دا جولى بولعان ادام دەپ ويلامايمىن. جاسى، مىنە، الپىستان استى عوي. بىردە-ءبىر ەستە قالاتىن ولەڭى جوق. ءبىر جاعىنان ولاي ايتايىن دەسەڭ وبال. شىعارماشىلىعىن قالىپتاستىرا الماۋى - تراگەديا.  ورازالينمەن ەشبىر  جەكە باس ارازدىعىم جوق. مۇنىڭ ءبارىن ادەبيەتتىڭ اينالاسىندا ءجۇرىپ، شىعارماشىلىقتىڭ قازانىندا كۇيىپ-پىسكەندىكتەن ايتىپ وتىرمىن.

- «الاش سىيلىعىن» 42 ادامعا ۇستاتا سالدى دەدىڭىز. «الاشتى» نەگىزسىز العاندار كىمدەر؟ اتىن اتاپ بەرىڭىزشى؟

- اتىن اشىق تۇردە اتاي المايمىن. بىراق كىمنىڭ لايىقتى، كىمنىڭ لايىقسىز ەكەنىن سول سىيلىقتى يەمدەنگەن جازۋشى دا، وقىرمان دا بىلەدى.  42 ادامعا بىردەن سىيلىق ۇلەستىرۋ دەگەنىڭ ادەبيەتتى اياققا باسۋشىلىق، تالعامدى اياققا تاپتاۋ. وسىدان كەيىن كىمنىڭ «الاش» سىيلىعىن العىسى كەلەدى دەيسىڭ؟! ءتاپ-ءتاۋىر سالماعى بار سىيلىقتى كىم-كورىنگەنگە بەرىپ، ءبىر-اق كۇندە بەدەلىن ءتۇسىردى. وداقتا ءار ءتۇرلى ادەبي كەشتەردى جۇرگىزىپ جۇرگەن جاستار دا «الاش» سىيلىعىن الىپتى. سول اقىنداردىڭ تۆورچەستۆوسى قانشالىقتى دارەجەدە ەكەنى بەلگىسىز. ونداي جىگىتتەر وداققا مۇشەلىككە وتكەنىنىڭ وزىنە تاۋبە دەۋ كەرەك قوي. «الاش» الۋ قايدا ءالى ولارعا؟ مەنىڭ ءوزىم جازۋشىلار وداعىنا مۇشەلىككە وتۋدە ءبىر رەت سەكرەتارياتتان قۇلاپ بارىپ ارەڭ وتكەنمىن. ايتپەسە سول كەزدە ءبىر ۇلكەن رومانىم، ءبىر كىتاپ اڭگىمەلەرىم، ءبىر كىتاپ بولىپ ولەڭدەر جيناعىم شىققان.  جازۋشىلار وداعىن ءبىز كەزىندە قاسيەتتى ورىن ساناپ، قاعباعا كىرگەندەي يمەنەتىنبىز. ال قازىر كىم كورىنگەن  ەسىگىنەن ەنىپ، مۇشەلىككە ءوتىپ، «الاش» سىيلىعىن يەمدەنىپ جاتىر. بۇيتە بەرسەك نە بولعانىمىز؟ ادەبيەتتى  قورلاۋ، قولدان قۇلدىراتۋ عوي مۇنىمىز. ءوزىمىز قورلاپ وتىرعان ادەبيەتتى وسىدان كەيىن سىيلامادىڭ دەپ كىمگە وكپەلەيمىز؟

- اعا، وزگەرىس پەن جاڭاشىلدىقتى قالاپ وتىرعاندارىڭىزدى تۇسىندىك. سىزدىڭشە جازۋشىلاردىڭ اراسىنان بۇل ورىنتاققا كىم لايىق؟ كىم كەلسە جازۋشىلار وداعىندا جاڭاشىلدىق جاساي الادى دەپ ويلايسىز؟

- ءورازاليندى ورنىنان الۋ كەرەك دەگەنىمە جۇرت قابدەش ءوزى توراعا بولۋدى كوكسەپ  جۇرگەن جوق پا دەپ ويلاۋى مۇمكىن. ونداي ويىم جوق. مۇنىڭ ءبارىن ادەبيەتكە دەگەن شىن جاناشىرلىقپەن ايتىپ وتىرمىن. اربىردەن سوڭ مەن ءوزىم  جەتپىس التىعا كەلگەنشە ءۇش كىسىنىڭ ۇستىنەن قارايتىن ءبولىم باستىعى دا بولىپ كورمەپپىن. باستىق بولۋعا يكەمىم دە جوق. جەتپىستەن اسقان ادامدى بۇل ورىنعا قويماۋ كەرەك.   كارىلىك جەلكەسىنەن تارتىپ تۇرعان كىسى نە بىتىرەدى؟ ال توراعالىققا كىم لايىق دەگەنگە كەلەر بولساق،  باسشى بولۋعا نۇرلاننان باسقا كىم بار دەيتىندەي ەمەس. توراعا بولۋعا جارايتىن 50 مەن 60-تىڭ ىشىندە تالانتتى جىگىتتەر بار.

- وسى اڭگىمە شىققالى  «وداقتىڭ توراعالىعىنا كىم لايىق؟» دەگەن ساۋال عالامتوردا قىزۋ تالقىلانىپ جاتىر. بىرەۋلەر توراعالىققا دۋلات يسابەكوۆ بارادى ەكەن دەپ جازىپتى. ەندى ءبىرى بۇل ورىنعا ۇلىقبەك ەسداۋلەت پەن ەسەنعالي راۋشانوۆ لايىق دەيدى. تاعى بىرەۋلەر ءورازاليننىڭ ورنىندا ورىنباسارى عالىم جايلىباي قالاتىن شىعار دەپتى. ءسىز جازۋشىلاردىڭ اراسىندا باسشى بولۋعا لايىق ادامدار بار دەپ وتىرسىز. ءسىزدىڭ ويىڭىزداعى تىزىمدە وسى ازاماتتار بار ما ەدى؟

- دۋلات - جاقسى دراماتۋرگ، جاقسى پروزايك. شىعارماشىلىعىن قالىپتاستىرعان، جۇرتتى مويىنداتقان جازۋشى. ەگەر توراعا بولىپ جاتسا، بەس جىل وتىرۋىنا بولادى. جاسى جەتپىسكە كەلىپ قالدى عوي ويتكەنى.

- بىراق  بۇل ورىنعا لايىق كورگەنىمىزبەن دۋلات اعامىز پرەزيدەنتپەن كەزدەسىپ كەلگەننەن كەيىن پىكىرىن وزگەرتكەندەي بولدى عوي. پرەزيدەنتپەن جولىققاننان كەيىن ءار ءتۇرلى اڭگىمەلەر ايتىلىپ، ءبىراز ادام دۋلات يسابەكوۆتى جاقتىرماي قالعانداي بولدى ەمەس پە؟

- بولا بەرسىن، ايتىلا بەرسىن. دۋلات تا پەندە عوي. ونى ايتپاعاننىڭ وزىندە مەن دۋلاتتى تۆورچەستۆوسى بار ادام رەتىندە قولدايمىن. ءوزىڭ ايتىپ وتىرعان ەسەنعالي دا مەملەكەتتىك سىيلىق العان جاقسى اقىن. ءوزى «جازۋشى» باسپاسىنىڭ ديرەكتورى. ەسەنعاليدىڭ تىرشىلىگىنەن اسا حابارىم جوق. سوندىقتان قالاي بولار ەكەن بىلمەيمىن... بىراق تۆورچەستۆو جاعىنان جامان اقىن ەمەس، جاقسى اقىن. ۇلىقبەك ەسداۋلەت تە ءبىر كەزدەرى «قازاق ادەبيەتىنىڭ»، قازىر «جۇلدىز» جۋرنالىنىڭ باس رەداكتورى. وداقتىڭ ىشكى جۇمىستارىمەن تانىس ادام. عالىم جايلىبايدى دا ۇسىنىپتى دەيسىڭ، عالىم سوڭعى 5-10 جىلدا ورازالينمەن بىرگە كەلە جاتىر. ءورازاليننىڭ قالپاعىنان شىققان ادام عوي. قالاي بولار ەكەن... بىراق نۇرلانعا قاراعاندا تۆورچەستۆوسى بار. ولەڭدەرى مىقتى. تۆورچەستۆو جاعىنان نۇرلاننان بيىك تۇر. جازۋشىلار وداعىندا ىستەگەن ادام رەتىندە كانديداتتاردىڭ قاتارىنا  عالىمدى دا قوسۋعا بولادى. سوسىن تەمىرحان مەدەتبەك بار. بۇرىن وداقتا ىستەگەن. مەملەكەتتىك سىيلىقتىڭ لاۋرەاتى، قولىنان ءىس كەلەتىن جاقسى جىگىت. ەڭ باستىسى تەمىرحاندا دا تۆورچەستۆو بار. مەن ءوزىم شىعارماشىلىققا قاتتى ءمان بەرەمىن. وداقتىڭ توراعاسى شىعارماشىلىق ادامى بولعاندا عانا قالام ۇستاعان قاۋىمنىڭ جايىن تۇسىنەدى.

اڭگىمەلەسكەن قارلىعا - يبراگيموۆا

رۋحاني ورتادا ءدۇمپۋ تۋدىرعان اڭگىمەنىڭ ۇزىن-ىرعاسى وسىنداي. نۇرلان ءورازاليننىڭ ادرەسىنە باعىتتالعان وسى سۇحباتتان كەيىن  بىرجاقتى بولىپ كەتپەيىك دەپ، ءورازاليننىڭ وزىنە دە  حابارلاسىپ، قابدەش ءجۇمادىلوۆ ايتقان ءبىراز جايتتىڭ انىعىن بىلۋگە تالاپتانعانبىز. الايدا جازۋشىلار وداعىنىڭ توراعاسى ءىسساپاردا ءجۇر ەكەن دە، جاۋاپ بەرۋگە قاۋىرت جۇمىستارىنان بوساي المادى.  ول كىسىدەن: ««ءسىز نە دەيسىز؟»، - دەپ حابارلاسىپ جاتقاندارىڭا راقمەت. سۇحباتتى جاريالاي بەرىڭدەر. قولىم ءتيىپ جاتسا، الداعى ساندارىڭا جاۋاپ بەرەرمىن»، -  دەگەن جىلى جاۋاپ ەستىدىك. جاۋاپ ايتامىن دەپ جاتسا، گازەتىمىزدىڭ الداعى سانىندا نۇرلان ورازالينمەن سۇحباتتاسۋعا ءازىرمىز.

«حالىق ءسوزى» گازەتى