بۇگىن جەتىسۋ وبلىسىنىڭ اكىمى بەيبىت يساباەۆ وڭىردە تۇراتىن ۇلى وتان سوعىسىنىڭ كوزى ءتىرى جالعىز ارداگەرى ىسقاق قۇسايىنوۆتىڭ شاڭىراعىنا بارىپ، ونى جەڭىس كۇنىمەن قۇتتىقتادى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

ءوڭىر باسشىسى ارداگەرگە گۇل شوقتارى مەن ەستەلىك سىيلىقتار تابىستاپ، مەملەكەت باسشىسىنىڭ قۇتتىقتاۋ حاتىن وقىپ بەردى.

«قۇرمەتتى ىسقاق ابىلپەيىسۇلى! ءسىزدى جەڭىس كۇنىمەن شىن جۇرەكتەن قۇتتىقتايمىن! بۇل – جاسامپاز اعا بۋىننىڭ اسقاق رۋحى مەن قايتپاس قايسارلىعىن پاش ەتەتىن مەرەكە. ءسىز ادامزات تاريحىنداعى ەڭ سۇراپىل سوعىستىڭ قيىندىقتارىن ەڭسەرىپ، ءبىزدىڭ بەيبىت ءارى دەربەس ەلدە الاڭسىز ءومىر ءسۇرۋىمىز ءۇشىن ايانباي كۇرەستىڭىز. ونەگەلى ءومىر جولىڭىزبەن وسكەلەڭ ۇرپاققا شىنايى وتانشىلدىق رۋحىنىڭ جارقىن ۇلگىسىن كورسەتتىڭىز. «ەشكىم دە، ەشتەڭە دە ۇمىتىلمايدى» دەگەن ءبىر اۋىز سوزدەن جەڭىس مەرەكەسىنىڭ تۇپكى ءمان-ماعىناسىن تۇسىنۋگە بولادى. حالقىمىز سوعىس جانە ەڭبەك ارداگەرلەرىنىڭ وشپەس ەرلىگىنە زور قۇرمەتپەن قارايدى، ولاردىڭ ەسىمىن ءاردايىم جادىندا ساقتايدى.

سىزگە بارشا وتانداسىمىزدىڭ اتىنان مىقتى دەنساۋلىق جەنە اماندىق تىلەيمىن!» - دەلىنگەن قۇتتىقتاۋ حاتتا.

ارداگەردى قۇتتىقتاعان وبلىس اكىمى بەيبىت يساباەۆ: «سىزدەردىڭ ەرلىكتەرىڭىز، بىزگە سىيلاعان بەيبىت ءومىر – بارشامىز ءۇشىن ەڭ قاستەرلى قۇندىلىق. ەڭ الدىمەن، وڭىرىمىزدە كوزى ءتىرى جالعىز سوعىس ارداگەرى رەتىندە ءسىزدى، سونداي-اق بارلىق ارداگەرلەردى، تىل ەڭبەككەرلەرىن، ولاردىڭ ۇرپاقتارىن جانە بارشا وبلىس تۇرعىندارىن جەڭىس كۇنىمەن شىن جۇرەكتەن قۇتتىقتايمىن. ەلىمىز ءوسىپ-وركەندەي بەرسىن»، – دەدى.

ارداگەردىڭ ۇلكەن قىزى گۇلسىنجان ىسقاققىزى ءسوز سويلەپ، كورسەتىلىپ جاتقان قۇرمەت پەن قامقورلىق ءۇشىن العىسىن ءبىلدىرىپ، بارشا جۇرتقا بەيبىت ءومىر، اماندىق پەن بەرەكە تىلەدى.

وسى كۇنى ارداگەردىڭ ءۇيىنىڭ اۋلاسىندا №18404 اسكەري ءبولىمىنىڭ اسكەري ۇرمەلى اسپاپتار وركەسترى سوعىس جىلدارىنداعى اندەردى ورىندادى. سونىمەن قاتار ارداگەردى قۇتتىقتاۋعا «جاس ساقشى» كادەت سىنىبىنىڭ وقۋشىلارى دا كەلدى.

ەسكە سالساق، 102 جاستاعى ارداگەر سوعىسقا 18 جاسىندا ءوز ەركىمەن اتتانعان. جاۋىنگەرلىك ەرلىگى ءۇشىن وعان «اسكەري-تەڭىز فلوتىنىڭ ۇزدىگى» اتاعى بەرىلگەن. كەڭەس-جاپون سوعىسىنا قاتىسقان. مايداننان ورالعان سوڭ ۇستازدىق جولدى تاڭداپ، 40 جىلعا جۋىق ۋاقىتىن جاس ۇرپاق تاربيەسىنە ارنادى. ول II دارەجەلى ۇلى وتان سوعىسى وردەنىمەن، ەڭبەك قىزىل تۋ وردەنىمەن، جۋكوۆ مەدالىمەن، «جاپونيانى جەڭگەنى ءۇشىن»، «ەرلىگى ءۇشىن» مەدالدارىمەن جانە باسقا دا بىرقاتار ماڭىزدى ماراپاتتارمەن ناگرادتالعان.

حالىق اعارتۋ ءىسىنىڭ وزىق قىزمەتكەرى، الاكول اۋدانىنىڭ قۇرمەتتى ازاماتى، بىرنەشە ادىستەمەلىك وقۋ قۇرالدارىنىڭ اۆتورى اتانعان ارداگەردىڭ قىزى مەن نەمەرەسى دە ونىڭ جولىن جالعاستىرىپ، ءبىلىم سالاسىنا ەڭبەك ەتىپ كەلەدى. بۇگىندە ارداگەر 9 نەمەرە، 26 شوبەرە، 5 شوپشەك ءسۇيىپ وتىر. 2023 جىلى مايدانگەرگە وبلىس ورتالىعىنداعى جاڭا شاعىن اۋدانداردىڭ بىرىنەن ءبىر بولمەلى پاتەردىڭ كىلتى تابىستالعان بولاتىن.

اتاپ وتسەك، بيىل جەتىسۋ وبلىسىندا جەڭىس كۇنىنە وراي 2034 ازاماتقا جالپى سوماسى 296 ملن تەڭگە كولەمىندە بىرجولعى ماتەريالدىق كومەك كورسەتىلدى. ونىڭ ىشىندە وڭىردەگى كوزى ءتىرى جالعىز سوعىس ارداگەرىنە 5 ملن تەڭگە تولەندى.

Abai.kz