ماڭعىستاۋ وبلىسىنداعى مالداردىڭ جاپپاي قىرىلۋىنا بايلانىستى قۋاڭشىلىق ماسەلەسىن شەشۋگە وبلىس بيۋدجەتىنەن 204 ميلليون تەڭگە ءبولىندى. 

وڭىردە جەدەل شتاب قۇرىلىپ، جەم-ءشوپ دايىنداۋ جۇمىستارى قولعا الىندى. قازىر مالعا ازىق جەتكىزۋ باستى ماسەلەگە اينالعان. وسىعان وراي، قوستاناي، باتىس قازاقستان، اقتوبە وبلىستارىمەن كەلىسسوزدەر جۇرگىزىلگەن. 15 ماۋسىمنان باستاپ جەم-ءشوپ جەتكىزىلەدى.

«54 ميلليون تەڭگەگە قازىر 630 توننا ارپا ازىق-تۇلىك كەلىسىمشارت كورپوراتسياسى ارقىلى بولىنەتىن بولىپ جاتىر. ءدال قازىرگى ۋاقىتتا سونى ساتىپ الۋ راسىمدەلۋدە. ەندى كەلەسى اپتاعا دەيىن سول ارپانى تەمىر جولمەن جەتكىزۋ ماسەلەسى شەشىلەتىن بولادى»، – دەدى قر اشم اۋىل شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتىنىڭ ديرەكتورى ەركەبۇلان احمەتوۆ.

ايتا كەتسەك، وڭىردە قۋاڭشىلىقتان سوڭعى بىرنەشە ايدا 536 جىلقى قىرىلىپتى. قازىر جالپى شىعىن ەسەپتەلۋدە. ناتيجەسى 2 اپتا ىشىندە بەلگىلى بولادى. سوعان سايكەس ءتيىستى ۇسىنىستار ەنگىزىلەدى.

ەسكە سالساق، بۇعان دەيىن ماڭعىستاۋدا جىلقىلاردىڭ جاپپاي قىرىلعانى جايلى ايتىلعان ەدى.

Abai.kz