قازاقستان ۇلتتىق قاۋىپسىزدىك ستراتەگياسىن قايتا قاراعان العاشقى ەلدەردىڭ قاتارىندا. بۇل پىكىردى قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى سانات كوشكىمباەۆ ءبىلدىردى.

- «بۇگىن قابىلدانعان قۇجات – قازاقستان رەسپۋبليكاسىنىڭ 2021-2025 جىلدارعا ارنالعان ۇلتتىق قاۋىپسىزدىك ستراتەگياسى – تۇڭعىش پرەزيدەنت نۇرسۇلتان نازارباەۆتىڭ توراعالىعىمەن وتكەن قاۋىپسىزدىك كەڭەسىنىڭ وتىرىسىندا بەكىتىلدى. ارينە، ستراتەگيا قازىر الەمدە بولىپ جاتقان وزگەرىستەردى كورسەتەدى. بۇل بيولوگيالىق قاۋىپسىزدىككە بايلانىستى جانە قازىرگى كوروناۆيرۋس پاندەمياسىمەن كۇرەسۋ عانا ەمەس، ەكونوميكالىق، تەحنولوگيالىق قاۋىپسىزدىك ماسەلەلەرى دە بار. ءبىز پاندەميانىڭ ەكونوميكالىق جاعدايعا، حالىقارالىق ساۋداعا قالاي اسەر ەتكەنىن كورىپ وتىرمىز. مۇنىڭ ءبارى – وتە ماڭىزدى اسپەكتىلەر. قازاقستان ەكونوميكاسى ءۇشىن وسىنداي سىن-قاتەرلەر مەن قاۋىپتەردى توقتاتۋعا دايىن بولۋىمىز كەرەك. قازىر دە بارلىق ەلدەر وزدەرىنىڭ قاۋىپسىزدىك ستراتەگيالارىن قايتا قاراستىرىپ جاتىر جانە قازاقستان الەمدە بولىپ جاتقان جاعدايلارعا ءۇن قاتا وتىرىپ، العاشقىلاردىڭ قاتارىندا بولدى», - دەيدى س. كوشكىمباەۆ.

ساراپشى ستراتەگيادا الداعى 5 جىلعا ەكونوميكا مەن حالىقارالىق قاتىناستارداعى وزگەرىستەر بويىنشا بولجام بەرىلەتىنىن اتاپ ءوتتى. بۇل قۇجات مەملەكەتتىك باسقارۋدىڭ بارلىق جۇيەسىن جانە بۇكىل قوعامدى ءتۇرلى داعدارىستىق قۇبىلىستاردىڭ الدىن الۋعا جانە توقتاتۋعا باعىتتايدى. ستراتەگيا «جەكە تۇلعانىڭ قاۋىپسىزدىگى - قوعامنىڭ قاۋىپسىزدىگى - مەملەكەتتىڭ قاۋىپسىزدىگى» ۇشتاعانىن قامتيدى جانە ول مەملەكەتتىك ورگانداردىڭ ساراپتامالىق پىكىرلەرى مەن ۇسىنىستارىن ەسكەرە وتىرىپ، مۇقيات پىسىقتالعان قۇجات. تۇتاستاي العاندا، ستراتەگيا «حالىق ۇنىنە قۇلاق اساتىن مەملەكەت» قاعيداتتارىمەن، پرەزيدەنت قاسىم-جومارت توقاەۆ جۇرگىزىپ وتىرعان ساياساتپەن سايكەس كەلەدى جانە ەكونوميكانىڭ تۇراقتىلىعىن ارتتىرۋعا، ونىڭ شيكىزاتتىق باعدارىنان الشاقتاۋعا، باسەكەگە قابىلەتىن ارتتىرۋعا، اقپاراتتىق-كوممۋنيكاتسيالىق سالانى دامىتۋعا باعىتتالعان.

سونىمەن بىرگە س.كوشكىمباەۆ ازىق-تۇلىك قاۋىپسىزدىگى ەكونوميكالىق قاۋىپسىزدىكتىڭ نەگىزى ەكەنىن ءجان اۋىل شارۋاشىلىعى سەكتورىن دامىتۋعا جانە تۇراقتىلىعىن ارتتىرۋعا باسا نازار اۋدارىلۋى ءتيىس ەكەنىن اتاپ ءوتتى.

- «قازاقستان ءۇشىن سۋ قاۋىپسىزدىگى ماسەلەسى دە وتە وزەكتى جانە ول حالىقارالىق قاتىناستارمەن تىعىز بايلانىستى، ويتكەنى ەلدەگى سۋدىڭ كوپ بولىگى كورشى ەلدەر اۋماعىندا قالىپتاسادى. سوندىقتان كورشىلەرمەن، ەڭ الدىمەن رەسەيمەن جانە قىتايمەن قارىم-قاتىناس ورناتۋ وتە ماڭىزدى. جالپى العاندا جاقىن ارادا حالىقارالىق قاتىناستار جۇيەسى تۋربۋلەنتتىككە ۇشىرايدى دەپ كۇتىلۋدە، بۇل كوبىنەسە حالىقارالىق ارەناداعى جاھاندىق ويىنشىلاردىڭ قايشىلىقتارىنا بايلانىستى. مۇنداي جاعدايلاردا قازاقستانعا سىرتقى ساياساتتا ۋاقىت سىنىنان وتكەن كوپۆەكتورلىققا نەگىزدەلگەن جانە ۇلتتىق مۇددەلەردى قورعاۋ مەن ىلگەرىلەتۋگە ءتيىمدى ناقتى باعدارلار بولۋى قاجەت»، - دەيدى سانات كوشكىمباەۆ.

ايتا كەتەيىك، مەملەكەت باسشىسى قاسىم-جومارت توقاەۆ «قازاقستان رەسپۋبليكاسىنىڭ 2021-2025 جىلدارعا ارنالعان ۇلتتىق قاۋىپسىزدىك ستراتەگياسىن بەكىتۋ تۋرالى» جارلىققا قول قويدى.

Abai.kz