ءماجىلىس جۋرناليستەرگە ارنالعان «پارلامەنت ءسوزى» سىيلىعىنىڭ قورىتىندىسىن جاريالاپ، ارناۋلى اتالىمدار بويىنشا جەڭىمپازداردى انىقتادى.

قۇرامىندا ءماجىلىس دەپۋتاتتارى، كورنەكتى قوعام قايراتكەرلەرى، پارتيا وكىلدەرى كىرەتىن كوميسسيا شەشىمى بويىنشا وسى جىلى جەڭىمپازدار سەگىز اتالىم بويىنشا سايىسقا ءتۇستى. بيىل پارلامەنتتىك سىيلىق بەسىنشى رەت وتكىزىلىپ وتىر.

ءماجىلىس توراعاسى نۇرلان نىعماتۋلين «پارلامەنت ءسوزى» سىيلىعىنىڭ جەڭىمپازدارىنا، سونداي-اق، بارشا بۇقارالىق اقپارات وكىلدەرىنە كاسىبي مەرەكەگە وراي قۇتتىقتاۋ لەبىزىن جەتكىزدى.

وسى رەتتە، نۇرلان نىعماتۋلين اقپاراتتىڭ كەز-كەلگەن سالاسىندا، گازەتتە، تەلەديداردا، ينتەرنەت باسپالاردا جۇمىس ىستەيتىن تىلشىلەرگە قۇرمەت كورسەتە وتىرىپ:

- ءبىز وسى جىلى دا ەلباسىمىز نۇرسۇلتان ءابىشۇلى نازارباەۆتىڭ تاپسىرمالارىن، مەملەكەت باسشىسى قاسىم-جومارت كەمەلۇلى توقاەۆتىڭ ماڭىزدى باستامالارىن جۇزەگە اسىرۋ جولىندا بىرلەسىپ، اشىق، ساپالى جۇمىس جاساپ كەلەمىز دەپ ايتۋعا بولادى، - دەدى.

ءىس-شارادا «پارلامەنتتىك جۋرناليستيكانى دامىتۋعا قوسقان ۇلەسى ءۇشىن» نوميناتسياسى قۋانىش سۇلتانوۆ جانە جۇمابيكە جۇنىسوۆاعا تابىستالدى.

ال «ۇزدىك تەلەۆيزيالىق سيۋجەت ءۇشىن» نوميناتسياسىن «قازاقستان» تەلەارناسىنىڭ ءتىلشىسى نىسانالى ىعىلوۆ، «حابار» تەلەارناسىنىڭ ءتىلشىسى دينارا جانباتىروۆا يەلەندى.

«ۇزدىك باسپا جاريالانىمى ءۇشىن» نوميناتسياسى «Aيقىن» گازەتىنەن  گۇلزينا بەكتاسوۆاعا،  «كازاحستانسكايا پراۆدا» گازەتىنەن ۆلاديمير كۋرياتوۆكە تابىستالدى.

«ۇزدىك ينتەرنەت جانە راديو ماتەريالى ءۇشىن» نوميناتسياسى «Qamshy.kz» اقپاراتتىق پورتالىنىڭ جەتەكشىسى قۋانىش ءبىلال جانە «Sputnik.kz» ءتىلشىسى جانيا ۋرانكاەۆاعا بەرىلدى.

«ارنايى رەپورتاج» نوميناتسياسىن «حابار 24» ارناسىنان نۇرشاپاعات نەسىپباەۆقا جانە «پەرۆىي كانال «ەۆرازيا» ارناسىنىڭ  «پارلامەنت online» باعدارلاماسىنا ۇسىنىلدى.

«ۇزدىك بەينە-سۋرەت ماتەريالى ءۇشىن» نوميناتسياسىن «استانا» تەلەارناسىنان نۇرجان ماحمۋتوۆ جانە «Tengrinews» ينتەرنەت رەسۋرسىنان تۇرار قازانعاپوۆ  جەڭىپ الدى.

«الەۋمەتتىك جەلىدەگى ۇزدىك ماتەريال ءۇشىن» نوميناتسياسى مۇرات ابەنوۆكە جانە دانيار اشىمباەۆقا بەرىلدى.

«قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان» ارنايى نوميناتسياسى «ەگەمەن قازاقستان» رەسپۋبليكالىق گازەتىنىڭ باسقارما توراعاسى قىدىرالى دارحان قۋاندىقۇلىنا جانە «كتك» تەلەارناسى بەرىلدى.

سونىمەن قاتار ءماجىلىس توراعاسى بيىل بۇكىل ەلىمىز ءۇشىن،                              حالقىمىز  ءۇشىن ەرەكشە جىل ەكەنىن العا تارتا كەلىپ:

- قاسيەتتى وتانىمىز - قازاقستانىمىزدىڭ تاۋەلسىزدىك العانىنا 30 جىل تولادى. وسى ۋاقىتتا وتكەن بارلىق ساياسي، الەۋمەتتىك، ەكونوميكالىق وزگەرىستەر،  سونىڭ ىشىندە، پارلامەنتتىڭ زاڭ شىعارۋ قىزمەتى ارقاشاندا، تىكەلەي اقپارات قۇرالدارىنىڭ نازارىندا بولدى. سوندىقتان، جۋرناليستەر ارقاشاندا  تاۋەلسىزدىكپەن بىرگە جاساپ،  ەگەمەن ەلىمىزدىڭ ءاربىر جەڭىسىن، ءاربىر جەمىسىن  ناسيحاتتاپ، ەلىمىزدىڭ، حالقىمىزدىڭ  ءومىر ساپاسىن  ودان ءارى   ارتتىرۋعا زور  ۇلەس قوسىپ   كەلە جاتىر، - دەدى نۇرلان نىعماتۋلين.

ءماجىلىس «پارلامەنت ءسوزى» سىيلىعىنىڭ يەگەرلەرىن ءماجىلىس سيمۆوليكاسى بەينەلەنگەن مۇسىنشەلەرمەن جانە ارنايى ديپلومدارمەن ماراپاتتادى.

Abai.kz