ءماجىلىس دەپۋتاتى داريعا نازارباەۆا اۋىلدىق ايماقتاردى ينتەرنەتكە قوسۋ جانە ونىڭ ساپاسىنا كوڭىل ءبولۋ كەرەكتىگىن ايتتى. دەپۋتاتتىڭ پىكىرىنشە ينتەرنەتكە قوسىلعان اۋىلداردىڭ سانى دا، ساپاسى دا كۇمان تۋىنداتادى. 

«تسيفرلاندىرۋ بويىنشا مەملەكەتتىك باعدارلامانىڭ ىسكە اسۋى بويىنشا ءسوز قوزعاعىم كەلەدى. 2020 جىلدىڭ ناتيجەسىنە قاراساق, مەملەكەت 98,7% قازاقستان حالقىن ينتەرنەتپەن قامتاماسىز ەتكەن. بۇل كورسەتكىشتىڭ شىنايىلىعى حالىق تاراپىنان دا، ساراپشىلار تاراپىنان دا كۇمان تۋدىرىپ كەلەدى. 510 اۋىلدىق جەردە ينتەرنەتتىڭ جىلدامدىعى وتە ناشار. «Nur Otan» پارتياسىنىڭ سايلاۋالدى «وزگەرىستەر جولى: ءار ازاماتقا لايىقتى ءومىر» اتتى باعدارلاماسىنىڭ 36 تارماعىندا 2021 جىلى 80% اۋىلدىق جەردىڭ مەكتەپتەرىن جىلدام ينتەرنەتپەن قامتاماسىز ەتۋ، ال 2025 جىلى ول كورسەتكىشتى 100%-عا جەتكىزىپ، اۋىل مەن قالا مەكتەپتەرىنىڭ الشاقتىعىن قىسقارتۋ ايتىلعان ەدى», - دەدى نازارباەۆا. 

داريعا نازارباەۆا ءوزىنىڭ دەپۋتاتتىق ساۋالىندا بىرنەشە سۇراققا جاۋاپ ىزدەيدى.

«وسىعان بايلانىستى كەلەسى سۇراقتارعا جاۋاپ بەرۋدى سۇرايمىن: اۋىلدىق ايماقتى ينتەرنەتكە قوسۋدا تەحنولوگيالاردى قولدانۋ بويىنشا شەشىم قالاي قابىلدانادى جانە ول تەحنولوگيالاردىڭ ارتىقشىلىعى نەدە؟ اۋىلدىق ايماقتاردا بايلانىس وپەراتورلارى «سوڭعى ميل» اتتى ماسەلەنى قالاي شەشۋدە جانە قاي ءتاسىل جىلدام اسەر بەرەدى؟ جاڭا تەحنولوگيالار ەنگىزىلىپ جاتىر ما جانە وعان قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن وزگە دە مەملەكەتتىك ورگاندار قاتىسا ما؟ اۋىلدىق ايماقتاعى ينتەرنەت جىلدامدىعىن تەكسەرۋ ۇدايى ءجۇرىپ تۇر ما، ول ماسەلە قاي قۇزىرلى ورگاننىڭ قاراماعىندا؟» – دەيدى نازارباەۆا حانىم.

قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اۋىلدىق ايماقتاعى ينتەرنەت جىلدامدىعىن ارتتىرۋ ءۇشىن جاڭا بايلانىس قوندىرعىلارىن قويۋدى قاجەت ەتەدى دەيدى.

2021 جىلدىڭ 5 اقپانىندا اسقار ءمامين «Digital Almaty» فورۋمىندا:

«تسيفرلاندىرۋ ەكونوميكا سالاسىندا دا، ادام ومىرىندە دە وتە ماڭىزدى ماسەلە ەكەنىن ايتا كەتكەن ءجون. بارلىق جەردە جۇمىس، ءبىلىم بەرۋ سالاسى قاشىقتان جالعاسىپ جاتىر. بۇل تسيفرلىق ەكونوميكانىڭ ايتارلىقتاي ماڭىزدى ەكەنىن كورسەتەدى. پاندەميا قازاقستاننىڭ ەكونوميكاسى تۇراقتى ەكەنىن كورسەتتى. 2020 جىلى قازاقستان ەلەكتروندى ۇكىمەتتى دامىتۋ بويىنشا 29 ورىنعا تۇراقتادى. ءبىز ارى قاراي دا تسيفرلاندىرۋدى دامىتۋدى ماقسات ەتىپ وتىرمىز. مەملەكەت باسشىسىنىڭ تاپسىرماسى بويىنشا، ءبىز قازىرگى تاڭدا مەملەكەتتىك ورگانداردى تولىعىمەن تسيفرلاندىرۋ جۇمىستارىن جۇرگىزىپ وتىرمىز. اقپارات جيناۋ جانە اناليز جاساۋ جولىندا تسيفرلىق يننوۆاتسيالاردى قولدانا وتىرىپ، جاڭا جۇيەلەرگە جول باستايتىن بولامىز. الداعى بەس جىلدا قازاقستاننىڭ بارلىق وبلىستارى مەن ايماقتارى 5G ينتەرنەتپەن قامتاماسىز ەتىلەتىن بولادى.

شەكتەۋلەرگە قاراماستان، ءبىز تسيفرلىق ينفراقۇرىلىمنىڭ قول جەتىمدىلىگى مەن ساپاسىن جاقسارتۋ بويىنشا كۇش-جىگەرىمىزدى جەدەلدەتتىك. 2020 جىلى ءبىز 20 مىڭ شاقىرىمدىق تالشىقتى-وپتيكالىق بايلانىس جەلىلەرىن سالۋدىڭ ءمجا جوباسىن اياقتادىق. مىڭنان استام ۇيالى بايلانىستىڭ بازالىق ستانتسيالارى ورناتىلدى، بۇل ايماقتارداعى تەحنولوگيالىق تەڭسىزدىك دەڭگەيىن ايتارلىقتاي تومەندەتۋگە مۇمكىندىك بەردى. ناتيجەسىندە بۇگىندە قازاقستان حالقىن ينتەرنەتپەن قامتۋ 99% قۇرايدى», - دەگەن ەدى.

پرەمەر-ءمينيستردىڭ بۇل ءسوزى قوعام اراسىندا ۇلكەن داۋ تۋدىردى. «99 پايىز حالىق ينتەرنەتپەن قامتىلعان» دەگەن ءسوزى الەۋمەتتىك جەلىدە كەڭىنەن تالقىلاندى. پاندەميا حالىقتىڭ شىنايى تۇرعىدان قانشا پايىزى ينتەرنەتپەن قامتىلعانىن كورسەتىپ بەردى. كوپتەگەن اۋىلدىق ايماقتا ينتەرنەت جوق، ال ينتەرنەتى بار اۋىلداردا ونىڭ ساپاسى سىن كوتەرمەيدى. سالدارىنان قازاقستان ونلاين وقۋ فورماتىندا ەمەس، كوپ جاعدايدا قاشىقتان وقۋ جۇيەسىنە كوشتى. امالدىڭ جوقتىعىنان. كوپتەگەن ەلدى-مەكەندە ونلاين وقۋ پورتالدارى اشىلمايدى، جۇكتەلمەيدى. سوندىقتان وقۋ whatsapp جەلىسى ارقىلى ىسكە استى. وقۋشىلار تاپسىرمانى سول جەردەن الىپ، سول جەرگە تاپسىردى. ونداي وقۋدا ارينە ەشقانداي ساپانىڭ بولمايتىنى ايتپاسا دا تۇسىنىكتى جايت. قالادان قىرىق شاقىرىم شىققان سوڭ، ينتەرنەت ۇستامايتىن ساتتەردىڭ ءجيى كەزدەسەتىنىن ەسكەرسەك، ينتەرنەت ساپاسىنا دەپۋتات داريعا نازارباەۆانىڭ عانا ەمەس، ءبىزدىڭ دە كۇمانىمىز بار.

كا مىرزا

Abai.kz