قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆتىڭ توراعالىعىمەن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسياسىنىڭ ءۇشىنشى وتىرىسى ءوتتى.

كوميسسيانىڭ وتىرىسىندا ساياسي قۋعىن-سۇرگىن قۇرباندارىن تولىق اقتاۋ جونىندەگى وڭىرلىك كوميسسيالاردىڭ جۇمىسىن ۇيىمداستىرۋعا جانە ولاردىڭ مىندەتتەرىنە قاتىستى ماسەلە قاراستىرىلدى.

جيىن بارىسىندا ءبىلىم جانە عىلىم ءمينيسترى اسحات ايماعامبەتوۆ، پرەزيدەنت اكىمشىلىگىنىڭ مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەڭگەرۋشىسى قاناتبەك جايساڭباەۆ جانە بىرقاتار وبلىس اكىمدەرىنىڭ ورىنباسارلارى بايانداما جاسادى.

وبلىس اكىمدەرىنىڭ ورىنباسارلارى – وڭىرلىك كوميسسيالاردىڭ جەتەكشىلەرى ساراپشى عالىمدارمەن بىرگە اتقارىلاتىن جۇمىستاردى ۇيلەستىرۋ، قۋعىن-سۇرگىنگە ۇشىراعان ازاماتتاردىڭ دەرەكتەرىن جيناۋ، جەرلەۋ ورىندارىنىڭ كارتاسىن جاساۋ، ۆەدومستۆولىق جانە مەملەكەتتىك ارحيۆتەردىڭ قىزمەتىن قالىپتاستىرۋ ماسەلەلەرى جونىندە باياندادى. سونداي-اق مەملەكەتتىك كوميسسيانىڭ قىزمەتىن سۇيەمەلدەۋ جونىندەگى ادىستەمەنى جەرگىلىكتى جەرلەرگە بەيىمدەۋ جۇمىستارىنا باسا ءمان بەرىلدى.

جيىندا مەملەكەتتىك كوميسسيا مۇشەلەرى وڭىرارالىق ىنتىماقتاستىق پەن ايماقتىق كوميسسيالاردىڭ تاجىريبە الماسۋ ءىسىن جەتىلدىرۋگە، ارحيۆ قۇجاتتارىن ساراپتاۋ جونىندەگى وڭ تاجىريبەلەردى ورتاعا سالاتىن الاڭ قۇرۋعا، ىزدەستىرۋ-زەرتتەۋ جۇمىستارىن ءتيىمدى قالىپتاستىرۋعا قاتىستى ۇسىنىس-پىكىرلەرىن ايتتى.

مەملەكەتتىك كوميسسيانىڭ توراعاسى قىرىمبەك كوشەرباەۆ ءوز سوزىندە عالىمداردىڭ زەرتتەۋ جۇمىستارىن جۇرگىزۋى ءۇشىن قولايلى جاعداي جاساۋ قاجەت ەكەنىنە باسىمدىق بەردى. سونىمەن قاتار عالىمداردىڭ ەڭبەگىن ىنتالاندىرۋ جانە ولاردى جان-جاقتى قولداۋ كەرەك ەكەنىن اتاپ ءوتتى.

مەملەكەتتىك حاتشى ەلىمىزدەگى تاريحى باي جانە مادەني-رۋحاني مۇراسى مول ەلدى مەكەندەردە بولعان وقيعالاردىڭ تىزبەگىن زەرتتەۋ جانە قالپىنا كەلتىرۋ جۇمىستارى بارىسىندا شەتەلدىك وزىق تاجىريبەلەردى پايدالانۋدىڭ ماڭىزدىلىعىنا توقتالدى. بۇدان بولەك تاريحي وقيعالارعا الەۋمەتتىك-دەموگرافيالىق تۇرعىدان ساراپتاما جۇرگىزۋ وڭىرلىك كوميسسيالار جۇمىسىنىڭ ماڭىزدى ءبىر بولىگى بولماق.

ءماجىلىس قورىتىندىسى بويىنشا نۇر-سۇلتان، الماتى، شىمكەنت قالالارى مەن وبلىستاردىڭ اكىمدەرىنە وڭىرلىك كوميسسيالاردىڭ قىزمەتىن جەتىلدىرۋگە، ساراپشى عالىمدارمەن ىقپالداستىقتىڭ تيىمدىلىگىن ارتتىرۋعا، زەرتتەۋ جۇمىستارىنا حالىقتىڭ بەلسەندى بولىگىن جۇمىلدىرۋعا قاتىستى تاپسىرمالار بەرىلدى.

Abai.kz