مەملەكەت باسشىسى ق.توقاەۆ باق وكىلدەرىن مەرەكەمەن قۇتتىقتاپ، قالىپتاسقان ءداستۇر بويىنشا بۇقارالىق اقپارات قۇرالدارى سالاسىنداعى سىيلىقتارىن بەرۋ، گرانتتارىن تاپسىرۋ جانە العىسىن جاريالاۋ تۋرالى وكىمگە قول قويدى.

"قۇرمەتتى جۋرناليستەر، بۇقارالىق اقپارات قۇرالدارىنىڭ قىزمەتكەرلەرى!
بارشاڭىزدى كاسىبي مەرەكەلەرىڭىزبەن شىن جۇرەكتەن قۇتتىقتايمىن!
اقپارات سالاسى – قوعامدىق پىكىر قالىپتاستىراتىن ماڭىزدى سالا.
«حالىقتىڭ كوزى، قۇلاعى ءھام ءتىلى» رەتىندە ەلگە ادال قىزمەت ەتۋ – ءار ءجۋرناليستىڭ ابىرويلى مىندەتى.
سىزدەر قاشاندا ۇلت مۇددەسىن بارىنەن بيىك قويىپ، ەل قامى ءۇشىن قالام تارتىپ جۇرسىزدەر.
مەملەكەتشىلدىك قۇندىلىقتى دارىپتەپ، جاسامپازدىق پەن جاقسىلىقتىڭ جارشىسى بولىپ كەلەسىزدەر.
اقپارات سالاسىن دامىتۋعا مەملەكەت تاراپىنان قاشاندا ەرەكشە كوڭىل بولىنەدى.
ءوز كاسىبىنىڭ مايتالمانى بولعان قارىمدى جۋرناليستەرگە قولداۋ كورسەتىلەدى.
باق سالاسىنداعى ءداستۇرلى پرەزيدەنت سىيلىعى – سونىڭ ءبىر كورىنىسى.
ونىڭ يەگەرى اتانعان ازاماتتاردىڭ ەسىمى قازاق جۋرناليستيكاسىنىڭ جىلناماسىنا جازىلاتىنى ءسوزسىز.
جىل سايىن ەڭ تاڭداۋلى جۋرناليستەرگە بەرىلەتىن ماراپات وسىمەن جيىرما بەسىنشى رەت تابىستالىپ وتىر.
بۇل سىيلىققا قاستەرلى تاۋەلسىزدىگىمىزدىڭ 30 جىلدىعى قارساڭىندا يە بولۋدىڭ دا سيمۆولدىق ءمانى بار.
سىزدەر ەگەمەندىك جىلدارىندا ۇرپاقتىڭ بويىنا ازاتتىق رۋحىن سىڭىرۋگە زور ۇلەس قوستىڭىزدار.
مەن مەملەكەت پەن قوعامنىڭ ورتاسىندا التىن كوپىر بولىپ جۇرگەن جۋرناليستەردىڭ ەڭبەگىن جوعارى باعالايمىن.
ارقايسىڭىز شىنايى اقپارات تاراتۋدىڭ جاۋاپكەرشىلىگىن سەزىنىپ، ۇلتتىق مۇددەنىڭ بيىگىنەن كورىنە بەرەدى دەپ سەنەمىن.
سوڭعى كەزدە راديو قىزمەتكەرلەرىنىڭ كاسىبي مەرەكەسى جوق ەكەنى ءجيى ايتىلىپ ءجۇر.
مەن قازاق راديوسىنىڭ 100 جىلدىعى اياسىندا 1 قازاندى راديو قىزمەتكەرلەرى كۇنى دەپ رەسمي تۇردە بەكىتكەن ءجون دەپ سانايمىن.
ەلىمىز بەرەكەلى بىرلىك پەن ىرىستى ىنتىماقتىڭ ارقاسىندا ءوسىپ-وركەندەي ءتۇسسىن!
جۋرناليستەر جاعىمدى جاڭالىعىمەن جۇرتشىلىقتى قۋانتا بەرسىن!
بارشاڭىزعا شىعارماشىلىق شابىت، تولاعاي تابىس تىلەيمىن!
مەرەكە قۇتتى بولسىن!" دەگەن پرەزيدەنت ءوز قۇتتىقتاۋىندا.

سونىمەن قاتار باق سالاسىنداعى ارنايى سىيلاقتار مەن العىس حاتتاردى كەلەسى ازاماتتار يەمدەندى.

پرەزيدەنتتىڭ باق سالاسىنداعى سىيلىقتارى:
قازاق» جانە «شالقار» راديولارىنىڭ الماتى ستۋدياسىنىڭ جەتەكشىسى قۇتپانباەۆ باقىت جاعىپارۇلىنا;
«حابار 24» تەلەارناسىنىڭ جاڭالىقتار ءبولىمىنىڭ جۇرگىزۋشىسى زاحارچۋك ۆەرا نيكولاەۆناعا;
«Qmonitor.kz» جەلىلىك باسىلىمىنىڭ شولۋشىسى يساباەۆا ساۋلە بوريسقىزىنا;
«قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ باق-پەن جۇمىس دەپارتامەنتىنىڭ باس مەنەدجەرى ويشىباەۆا جاننات باقتىعۇلقىزىنا بەرىلدى.

پرەزيدەنتتىڭ باق سالاسىنداعى گرانتتارى:
«AIQYN» رەسپۋبليكالىق قوعامدىق-ساياسي گازەتىنىڭ باس رەداكتورى بايعاراەۆ نۇرمۇحامەد يسمانۇلىنا;
«كتك» تەلەارناسىنىڭ اقپاراتتىق باعدارلامالار ديرەكتسياسى ورتالىق رەداكتسياسىنىڭ رەداكتورى نۇراقىن دياس ەرمەكۇلىنا;
«QAZAQSTAN» ۇلتتىق تەلەارناسى «اشىق الاڭ» قوعامدىق-ساياسي توك-شوۋىنىڭ جۇرگىزۋشىسى تولىقباەۆ ماقسات مالىكۇلىنا;
«مۇنارا» گازەتىنىڭ باس رەداكتورى حاسانوۆ سەرىكبول تىلەپبەرگەنۇلىنا تاپسىرىلدى.

پرەزيدەنتتىڭ باق سالاسىنداعى العىسى:
«اقيقات» ۇلتتىق قوعامدىق-ساياسي جۋرنالىنىڭ شىعارماشىلىق ۇجىمىنا;
«ۆەچەرني الماتى» گازەتىنىڭ شىعارماشىلىق ۇجىمىنا;
«قازاق راديولارى» جاۋاپكەرشىلىگى شەكتەۋلى سەرىكتەستىگىنىڭ شىعارماشىلىق ۇجىمىنا;
«سارىارقا» تەلەارناسىنىڭ شىعارماشىلىق ۇجىمىنا جاريالاندى.
مەملەكەت باسشىسىنىڭ العىس حاتتارى ەلىمىزدىڭ بارلىق وڭىرىنە جىبەرىلدى. اتالعان ماراپاتتار ءار ايماقتان ۇزدىك دەپ تانىلعان جۋرناليستەرگە سالتاناتتى تۇردە تابىس ەتىلەدى.

Abai.kz