قازاقستاندا مەملەكەتتىك قىزمەتكەرلەر، ارميا مەن قۇقىق قورعاۋ ورگاندارىنىڭ قىزمەتشىلەرى انت بەرەتىن ءداستۇر قالىپتاسقان. ونى دۇرىس دەلىك.

ءبىزدىڭ ارامىزدا كەشە كەڭەس وداعىنا انت بەرگەندەر بار. ولار وزدەرىن سول انتقا ادالمىز دەپ ەسەپتەيدى. الايدا ادەتتە انت بەرۋشى مەن انت قابىلداۋشى جاقتىڭ ءبىرى ومىردەن وزسا وندا الگى انتتىڭ كۇشى جويىلادى. سوۆەت وداعى بۇدان وتىز جىل بۇرىن تاراپ كەتتى. ال اۋعان سوعىسى ارداگەرلەرى، اسكەري قىزمەتكە تەڭەستىرىلگەندەر وزدەرىن ءالى كۇنگە سول وپاسىز وداقتىڭ سارقىنشاعى سەزىنەدى. بۇدان وزگە ۇلتتىق قاۋىپسىزدىك كوميتەتى ارداگەردەرىنىڭ، پوليتسيا قىزمەتى ارداگەرلەرىنىڭ، سونداي-اق كۇزەت قىزمەتى، بايلانىس قىزمەتى، وزدەرىن اسكەري-پاتريوتتىق ۇيىم سانايتىن بىرلەستىكتەر، اتىس قارۋلارىن ۇستاۋعا رۇقسات العان ۇيىمدار بار. بىرقاتارى وزدەرىن ەشكىمنىڭ الدىندا مىندەتتى ساناماي لاعادى. الگى رەسەيلىك «بەسسمەرتنىي پولك» سياقتى اتىشۋلى اكتسيالارعا شاقىرىپ، سونى ۇيىمداستىرىسىپ جۇرەتىن ارداگەرلەر ۇيىمدارى دا، نود تا سولاردىڭ قاتارىندا. بۇل ۇيىمدار شەكاراعا قاۋىپ تونگەن جاعدايدا كىمنىڭ سويىلىن سوعارى تاعى بەلگىسىز.

سوندىقتان ەلىمىزدەگى سونداي ۇيىمدار مەن بىرلەستىكتەردىڭ، جەكەلەگەن ازاماتتاردىڭ وتان الدىندا جاۋاپكەرشىلىگىن ارتتىرۋ ءۇشىن قازاقستان جالاۋىنا انت بەرۋ ءراسىمىن جۇيەلى وتكىزۋدى ۇسىنامىن.

مۇنداي تاجىريبەلەر شەتەلدەردە قالىپتاسقان. مىسالى اقش-تا 1892 جىلدان بەرى اقش جالاۋىنا انت بەرۋ ءراسىمى بار. بىزدە دە وسىنداي قازاقستان رەسپۋبليكاسىنىڭ جالاۋىنا انت بەرۋ ءراسىمى وتە-موتە وزەكتى بولىپ تۇر. انت بەرۋ راسىمىندە جوعارى اتالعان ۇيىمدار مەن بىرلەستىكتەر مۇشەلەرى «مەن قازاقستان رەپۋبليكاسىنىڭ جالاۋىنا ادال بولۋعا، قازاقستان حالقىنىڭ بىرلىگى مەن قازاقستان اۋماعىنىڭ تۇتاستىعىنا قىزمەت ەتۋگە جاراتۋشى يەمىزدىڭ الدىندا انت ەتەمىن!» دەگەن ءماتىندى داۋىستاپ وقىپ، قاسيەتتى جالاۋدىڭ شەتىنەن ۇستاپ سۇيۋگە ءتيىس.

سوندا كىمنىڭ كىم ەكەندىگى كورىنەدى. قازاقستان جالاۋىنا انت بەرۋدەن باس تارتقانداردىڭ دۇشپان پيعىلدى ەكەندىگىن بىردەن تانيمىز.

مارات ءبايدىلداۇلىنىڭ جازباسى

Abai.kz