يحسان ىلىمىندە «digerham» اتتى التىن تۇعىر (ماقام) بار. قازاق تىلىندە ءبىر سوزبەن ناق قالاي ءتارجىمالاناتىنىن بىلمەيمىن؟ تارقاتىپ ايتار بولساق، «digerham» - وزىڭنەن بۇرىن وزگەنىڭ قامىن جەۋ، قاراباسىڭنان قالىڭ بۇقارانىڭ قامىن جوعارى قويۋ، حالقىڭ ءۇشىن جانقيار بولا ءبىلۋ، جانسەبىل رۋحتا قوعامعا قالتىقسىز قىزمەت ەتۋ - دەگەنگە سايادى.

البەتتە، «digerham» ماقامىندا حاقتىڭ رازىلىعى ءۇشىن حالقىڭنىڭ قامىن جەپ، جانسەبىل رۋحتا كۇرەسەسىڭ. ىقىلاس-ىندىنىندا تاڭىرگە دەگەن ماحابباتى جوق شارعى باستى پەندەنىڭ قاراباسىنان حالقىنىڭ قامىن جوعارى قويۋى استە مۇمكىن ەمەس. وسى تۇرعىدان العاندا حالقىنىڭ ارىن ارلاپ، زارىن زارلاپ وتكەن ازىرەت سۇلتان، اسان قايعى، تولە، قازىبەك، ايتەكە، حاكىم اباي جانە حالقى ءۇشىن قان توككەن جۇرەگى تۇكتى باتىر-باھادۇرلەرىمىزدىڭ، سونداي-اق قاراشا حالقىن ءىلىم-بىلىممەن ارايعا بولەگەسى كەلگەن الاش قايراتكەرلەرىنىڭ "digerham" ماقامىنا كوتەرىلگەن جانقيار تۇلعالار ەكەنى تالاسسىز اقيقات.

قازاق «digerham» ماقامىنداعى قايراتكەردى بالكىم ىلگەرىدە – «قاس جاقسى»، «يگى-جاقسى»، «زيالى»، «الىپ-ەرەن»، «جانقيار»، «جانسەبىل»، «ساحي»، «قۇت»، «اتىمتاي-جومارت» دەپ باعالاعان. قازىرگى تاڭدا زاماناۋي شارتتارعا وراي ونىڭ بالاماسى رەتىندە «پاسسيونەر» اتاۋىن كوبىرەك قولدانىپ ءجۇرمىز.

جالپى، الەم تاريحىنا كوز سالساڭىز، حالىقتى ورگە سۇيرەگەن وسى پاسسيونەرلىك رۋح ەكەنىنە كۋا بولاسىڭ. پاسسيونەرلىك رۋحسىز ەشبىر يگى جاڭالىق بولعان ەمەس. عالامدى زاماناقىردان قۇتقارىپ كەلە جاتقاندا جانقيار جانداردىڭ جانسەبىل رۋحتا جاساعان ەرەن-ەرلىكتەرى. بۇل رۋح سەمگەندە قوعامدا اشكوزدىك، ادىلەتسىزدىك، جەمقورلىق، ەكىجۇزدىلىك، سامارقاۋلىق، بەيعامدىق، وپاسىزدىق، ناداندىق، جاعىمپازدىق، ماقتانگەرشىلىك جايلايدى. قازاق قوعامىندا اتالعان ىندەتتەردىڭ بەلەڭ العانىنا قاراعاندا، وندا دەمەك بىزدە اراي باسەڭ، حالىقتىڭ قامىن جەۋگە دەگەن ماحاببات تومەن، پاسسيونەرلىك رۋحىمىز سەمگەن.

كەشە اۋىل بالاسى قۇرمەت تالاپقازىنىڭ باتىستاعى حالىقتىڭ قامىن جەپ، ءوز ىقىرارىمەن جىلۋ جيناپ، ۆاگون-ۆاگون پىشەن جىبەرۋى ارينە جانقيارلىقتىڭ ۇشقىنى. جەر-جەردەگى وسىنداي ىزگىلىكتىڭ جۇرناعىن كورىپ، قانىمىزدان «ەنشىسى بولىنبەگەن قازاق» دەگەن رۋحتىڭ ءالى وشپەگەنى كوز قۋانتادى. البەتتە، بۇل قۇلازىعان كوڭىلگە مەدەۋ عانا. ال ءتامام ەلدى ورگە سۇيرەر، تۇتاس حالىقتى بيىككە كوتەرەر ۇلى يدەيا ءۇشىن كۇرەسەتىن پاسسيونەرلىك پيعىل - وتتى رۋحتى كورۋ ءبىز ءۇشىن ازىرگە ساعىم...

مۇحان يساحاننىڭ جازباسى

Abai.kz