Facebook-تە COVID-19-عا قارسى ۆاكتسيناتسيالانباعان بالالاردى مەكتەپكە جىبەرمەيدى، ال ۆاكتسيناتسيادان باس تارتۋ مەكتەپ وقۋشىلارىن ءبىلىم الۋ كونستيتۋتسيالىق قۇقىعىنان ايىراتىنى تۋرالى حابارلاما تارادى. بۇل اقپاراتتىڭ جالعان ەكەنىن stopfake.kz جازدى، دەپ حابارلايدى «ادىرنا» پورتالى.

حابارلامادا اۆتور قر دەنساۋلىق ساقتاۋ ءمينيسترى الەكسەي تسويدىڭ سوزىنە سۇيەنەدى.

اعىمداعى جىلدىڭ 19 شىلدەسىندە «حابار 24» تەلەارناسىنىڭ ەفيرىندە مينيستر قازاقستانعا Pfizer/BioNTech وندىرگەن COVID-19-عا قارسى ۆاكتسينانى جەتكىزۋ جوسپارى جايلى باياندادى. بۇگىنگى تاڭدا بۇل پرەپارات كلينيكالىق سىناقتاردان ءوتىپ، 12 جاستان اسقان جاسوسپىرىمدەردى ۆاكتسيناتسيالاۋ ءۇشىن ماقۇلدانعان.

الايدا بۇل ءبىزدىڭ ەلىمىزدە 12 جاستان اسقان وقۋشىلارعا ۆاكتسيناتسيا مىندەتتى بولادى جانە ونسىز بالالار مەكتەپكە بارا الماي، كەمسىتۋشىلىككە ۇشىرايدى دەگەننىڭ بەلگىسى ەمەس. الەكسەي تسوي مۇنداي مالىمدەمە جاساعان جوق.

بىرىنشىدەن، Pfizer/BioNTech ۆاكتسيناسىنىڭ العاشقى پارتياسى وسى جىلدىڭ قازان ايىندا، ياعني وقۋ جىلى باستالعاننان كەيىن اكەلىنۋى مۇمكىن. ەكىنشىدەن، دەنساۋلىق ساقتاۋ ءمينيسترىنىڭ ءوزى حابارلاعانداي، بالالاردى COVID-19-عا قارسى ۆاكتسيناتسيالاۋ تەك ەرىكتى تۇردە عانا جۇرگىزىلەدى جانە كامەلەتكە تولماعاندار اتا-انالارىنىڭ كەلىسىمىمەن عانا ەگىلەدى.

دەمەك ەكپە سالدىرماعان بالالاردى ءبىلىم الۋعا كونستيتۋتسيالىق قۇقىعىنان ايىرادى دەگەن قاۋەسەت نەگىزسىز جانە شىندىققا جاناسپايدى. قازاقستاندىق وقۋشىلار ۆاكتسيناتسيا مارتەبەسىنە قاراماستان ءبىلىم الاتىن بولادى.

Abai.kz