2011 جىلى سيريا اۋماعىندا ازامات سوعىس باستالدى. بۇل «اراب كوكتەمىنىڭ» ءبىر مايدانى بولاتىن. جات جەردەگى قاندى قىرعىندا ءتۇرلى ءدىني توپتار باس كوتەرىپ، سيريا لاڭكەستىك وشاعىنا اينالدى. لاڭكەستىك توپتار مەن جات ءدىني اعىمداعى ۇيىمدار الەمنىڭ ءتۇرلى ەلدەرىندە ءوز ناسيحاتتارىن جاسىرىن جۇرگىزىپ، الەۋمەتتىك جەلى ارقىلى جاقتاۋشىلارىن جيناپ، سوعىس ايماعىنا شاقىردى. جات اعىمنىڭ قاقپانىنا ءتۇسىپ، قاندى قىرعىنعا اتتانعاندار اراسىندا قازاقستاندىقتار دا بار ەدى. وكىنىشكە وراي ولاردىڭ كوپشىلىگى وتباسىلارىن وزدەرىمەن بىرگە اكەتىپ، وق پەن وتتىڭ اراسىندا قالدىردى. قازاقستان سيرياداعى ازاماتتارىن الىپ شىعىپ، ەلگە اكەلۋگە شەشىم قابىلدادى. وپەراتسيانى «جۋسان» دەپ اتاپ، بىرنەشە كەزەڭمەن ىسكە اسىردى. جۋسان جايدان جاي تاڭدالمادى. ەجەلگى داۋىردەن ەلىنەن اۋىپ، وزگە ايماققا كەتپەك بولعان باتىرعا جۋسان ءشوبىنىڭ ءيىسىن يىسكەتىپ، رايىنان قايتارعان ەكەن. ارينە، ماعىناسى تەرەڭ، الايدا جۇگى اۋىر وپەراتسيا ەكەنىن اتاپ وتكەنىمىز ابزال.

«جۋسان» ارنايى گۋمانيتارلىق وپەراتسياسىنىڭ باستالعانىنا ەكى جىل تولدى، ونىڭ اياسىندا قازاقستان ازاماتتارى سيرياداعى ۇرىس ايماعىنان ءوز وتانىنا قايتارىلدى. قۇتقارىلعان ايەلدەردىڭ تاعدىرى ۇقك ءباسپاسوز قىزمەتىندە ايتىلدى.

دەپارتامەنتتە اتاپ وتىلگەندەي، ۇلتتىق قاۋىپسىزدىك ورگاندارى قىزمەتكەرلەرىنىڭ، اسكەريلەردىڭ، ديپلوماتتار مەن وپەراتسياعا قاتىسقان باسقا قۇرىلىمداردىڭ قىزمەتكەرلەرىنىڭ جاقسى ۇيلەستىرىلگەن جۇمىسى مەن جوعارى كاسىبيلىگىنىڭ ارقاسىندا 600 ادام ەۆاكۋاتسيالاندى، ونىڭ ىشىندە 413 بالا، ولاردىڭ 34-ءى جەتىمدەر.

ۇقك ەكى جىل بۇرىن قازاقستاندىقتاردىڭ گۋمانيتارلىق وپەراتسيانىڭ قاجەتتىلىگى تۋرالى پىكىرلەرى ەكىگە بولىنگەنىن ايتادى. كوپشىلىك وتانداستارعا جاڭا ءومىر باستاۋى ءۇشىن كومەك قولىن سوزۋدى قاجەت دەپ سانادى. باسقالارى سوعىس وشاعىنان قايتاپ ورالعاندار قازاقستاندىقتارعا راديكالدى يدەولوگيانى ناسيحاتتايدى دەپ ەسەپتەيدى.

سوعىس وشاعىنان ورالعان ايەلدەر ءتۇرلى وقيعالاردى ايتىپ، ارنايى دەرەكتى فيلمدەردە سۇحباتتار بەرۋدە. ولار قازاقستاننان قالاي كەتكەنىن، سيريادا كورگەن توزاقتارى مەن ازاپتارىن، وق پەن وت استىنداعى ومىرلەرىن، كۇندەلىكتى ءولىم مەن بالالارىن قالاي جەر قوينىنا بەرگەندەرىن، جۋسان وپەراتسياسى اياسىندا ۇشاقتار كەلگەنىنە قالاي قۋانعانى مەن ەكسترەميستىك جولعا تۇسپەۋ جايىندا ءوز ويلارىن ايتۋدا. بۇل ماڭىزدى. سەبەبى جات اعىمنىڭ بارلىق سۇمدىعىن كورىپ، جاقىندارىن جوعالتقان جانداردىڭ ءسوزى قوعامعا ءوتىمدى، ەلگە ءسىڭىمدى بولماق. قازاقستان بيلىگى ءدىني ەكسترەميزمگە قارسى كۇرەستى جالعاستىرىپ، ەل حالقىنىڭ جات اعىم جەتەگىندە كەتپەۋى ءۇشىن بارىن سالاتىن بولادى.

Abai.kz