قاباتوۆتىڭ ءوزى سوتتالمايدى. وعان قىلمىستىق ايىپ جوق. بىراق، ءۇشىنشى ءارى تاۋەلسىز بيلىك – سوتتان باسقا ار سوتى دەگەن بار. قازىرگى اڭگىمە ار سوتىنىڭ توڭىرەگىندە ءوربىپ تۇر. جانە قىزىنا ەمەس، تىكەلەي تۇرسىنبەكتىڭ وزىنە قاتىستى.

قازاق قوعامىن ءدۇر سىلكىنتكەن – تۇرسىنبەكتىڭ قىزى جالعان قۇجاتپەن ۇستالعانىندا ەمەس، اكەسىنىڭ "بۇل ارەكەتتى بىلمەدىم-ەستىمەدىم" دەپ انت-سۋ ىشكەنىندە. قاباتوۆ "قالىڭ ەلىم، وسىنداي ابايسىز ءىس بولدى. ءبىلىم سالاسى وزگەرىسكە ۇشىراپ، تالاپ باسقاشا قويىلعان ەكەن، ال مەنىڭ قىزىم، ءتىپتى ول ەمەس، ونى تەستكە دايىنداعان ورتالىق سونى بىلمەگەن ەكەن. ءبارىمىز جازا باسىپ، جاڭىلىپپىز. ەندى بۇل جولمەن جۇرمەڭدەر، بالالارىڭدى مۇنداي جولمەن جۇرگىزبەڭدەر" دەپ اعىنان جارىلعاندا قوعام بىلاي دۇرلىكپەس ەدى.

ازاماتتىڭ بەتى اشىق، الداعى جولى دۇرىستالار ەدى. بار اڭگىمە ىستەلگەن ءىستى مويىنمەن كوتەرىپ الۋدا عوي. تۇرسىنبەكتە مۇمكىندىك بولدى. ءبىر ەمەس، بىرنەشە رەت. باسىندا قىزى ۇستالىپ قالعاندا. وتباسىندا نە بولىپ جاتقانىن ءبىلۋى كەرەك ەدى. قىزىنان پوليتسيا تۇسىنىكتەمە الادى، ودان كەيىن تەرگەۋگە شاقىرىلعان شىعار. سونى اكەسى ەكى اي بويى بىلمەي جۇرە مە؟ بالاسى نە جاعدايعا تاپ بولعانىن ەستىمەسە، ءاپ-ادەمى بولىپ بەتىنە ءسۇيىپ، ونى الەۋمەتتىك جەلىگە جاريالاپ جۇرگەنىنەن نە قايىر؟!

بىزدىڭشە، ول "جابۋلى قازان جابۋلى كۇيىندە قالار" دەپ ۇمىتتەنگەن، ءارى سولاي ىستەۋگە تالپىنعان شىعار. وندا توقاەۆ باسقارىپ وتىرعان مەملەكەتتە مۇنداي وقيعا تۇرماق ون تالدىڭ زاڭسىز كەسىلگەنى تالقىعا تۇسەرىن بىلمەگەن. جىرقىلداق كورەرمەنى بار زالدار مەن تەلەۆيزيادان باسقا قۇرالدار پايدا بولعانىن، ول ارقىلى اقشا تابۋعا بولارىن اڭعارعانىمەن، تاياقتىڭ ءاردايىم ەكى ۇشى بارىن اڭعارماعان.

وقيعانى بۇكىل ەل ەستىگەن كۇنى كەلەسى مۇمكىندىك بولعان. ول: "وسىلاي بولىپ ەدى. اياعىمدى انتەك باسىپپىن. قالىڭ ەلىم، مەن سياقتى ىڭعايسىز جاعدايعا تاپ بولماي، بۇدان بىلاي ءبارىمىز، ءبارىمىزدىڭ ۇل-قىزىمىز تۋرا جولمەن جۇرەيىك" دەسە، قوعام اراداي تالاماس ەدى. قاباتوۆ وندا توقاەۆتىڭ ادال، ءادىل مەملەكەت قۇرۋعا دەگەن تالپىنىسىن قولداۋشى بولىپ شىعار ەدى. ەڭ باستىسى ءوزى ارىلار ەدى. جوق، ونىڭ ورنىنا الدەكىمگە WhatsApp الەۋمەتتىك جەلىسى ارقىلى ۇرىسقان شوۋ جاساپ، باتپاقتىڭ ۇستىنە باتپاق جابىستىردى.

قاينار ولجاي

Abai.kz