قازاقستان رەسپۋبليكاسىنىڭ
پرەزيدەنتى ق.ك. توقاەۆقا!

اسا مارتەبەلى قاسىم-جومارت كەمەلۇلى!

مىنە، اۋعانستاندا تۇراتىن قانداستارىمىز ارت-ارتىنان ۇندەۋ جاريالاپ، وزدەرىن قازاقستانعا كوشىرىپ الۋدى ءوتىنىپ جاتىر.

«جانى قىسىلعان جاقىنىن ىزدەيدى» دەگەن – وسى!

اۋعان بيلىگىن قازاقستان اۋماعىندا تيىم سالىنعان تەرروريستىك قۇرىلىمداردىڭ  تىزىمىنە ەگەن «تاليبان» قوزعالىسى باسىپ الدى. اۋعان ەلىنىڭ ەرتەڭى قالاي بولاتىنى، ونداعى قازاقتاردى قانداي كۇندەردىڭ كۇتىپ تۇراعانى تۋرالى ەشكىم ەشتەڭە ايتا الماي وتىر.

وسىنداي جاعدايدا ونداعى ەتنيكالىق قازاقتاردىڭ قازاقستاننان باسقا كومەك قولىن سوزار، قۇتقارىپ الار پاناسى جوق!

«تاليبان» قوزعالىسى بيلىكتى باسىپ العان كۇننىڭ ەرتەڭىندە ءسىز ونداعى قانداستارىمىزدى نازارىڭىزعا الىپ، ولاردىڭ قاۋىپسىزدىگىن قامتاماسىز ەتۋ مەن قاجەت بولعان جاعدايدا تاريحي وتانىنا قايتارۋ ماسەلەسى بويىنشا بارىنشا كومەك كورسەتۋدى سىرتقى ىستەر مينيسترلىگىنە تاپسىردىڭىز.

ارينە، اۋعانستانداعى قانداستارىمىزعا بايلانىستى ءسىزدىڭ تاپسىرما بەرگەنىڭىزگە ءدان ريزامىن. اسىرەسە، اۋعانستاندا جاقىن تۋىستارى قالعان جەرلەستەرىمىز قاتتى قۋانىپ جاتىر.

مىنە، سول مالىمدەمە جاريالانعان سوڭ كوپ ۋاقىت وتپەي، كومەك سۇراعان اۋعاندىق قازاقتار دا، جۋرناليستەر دە سىرتقى ىستەر مينيسترلىگى مەن ولاردىڭ شەتەلدەگى وكىلدىكتەرىنەن جاۋاپ الا الماي جاتقانىن جاريا ەتۋدە.

ءسوزدىڭ شىنىن ايتسام، قازاقستان قازىر اۋىر سىناقتىڭ ۇستىندە تۇر!

قازىرگى تاڭدا اۋعانستانداعى قانداستارىمىزدى اپاتتى جاعدايدان قۇتقارىپ، وتانعا ورالتۋ ءۇشىن ەلباسى نۇرسۇلتان نازارباەۆتىڭ باتىلدىعى مەن تەبىنى كەرەك!

تۇڭعىش پرەزيدەنت نۇرسۇلتان نازارباەۆ تاۋلسىزدىكتى جاريالاماي تۇرىپ، شەتتەگى قازاقتاردى اتا جۇرتقا شاقىرۋ تۋرالى قاۋلى قابىلداتتى.

ال، تاۋەلسىزدىك جاريالاي سالىپ، «شالقار» راديوسىنىڭ ەفيرىنەن ءوزى ءسوز الىپ، الىستاعى اعايىندى تاۋەلسىزدىكتىڭ ءبىرىنشى جاڭا جىلىمەن قۇتتىقتاپ، «اتا-مەكەنگە كەلەمىن دەۋشى اعايىندارعا جول اشىق. اتا-بابا ارۋاعى الدارىڭىزدان جارىلقاسىن!» –  دەدى، ساڭقىلداپ!

ودان بەرگى جەردە بەس قۇرلىقتىڭ قازاعىن جيىپ الىپ، دۇنيەجۇزى قازاقتارىنىڭ تۇڭعىش قۇرىلتايىن وتكىزدى.

العاشقى ادىمدا 1500 كاماز ماشيناسىن جىبەرتىپ، موڭعولياداعى قازاقتاردى تاۋەلسىز قازاقستانعا كوشىرىپ الدى.

سوسىن، پاكستان مەن ساۋد-ارابياداعى  قازاقتاردى سامولەتپەن تاسىتسا، يرانداعى قانداستارىمىزدى ازەربايجان مەن  تۇرىكمەنستان ارقىلى كەمەمەن كاسپي تەڭىزىنەن ەندەي الىپ ءوتتى نۇرەكەم. ءار جىلى ون مىڭداپ، جيىرما مىڭداپ كۆوتا بەرىپ تۇردى نۇرەكەم.

موڭعوليادان ورالعان قازاقتاردان وزگەسىنىڭ ءبارى سوعىستىڭ كەسىرىنەن جان ساۋعالاپ، تەنتىرىپ كەتكەن اۋعانستاننىڭ قازاقتارى بولاتىن. ال، ولاردىڭ ارعى تەگىن قۋساڭ، ءوزىمىزدىڭ ءۇش ءجۇزدىڭ تۋمالارى...

اتاپ ايتا كەتەتىن ءبىر ءتۇيىن، ول كەزدە دە وسى تاليبانداردىڭ قارۋىنان اجال وعى جاۋىپ تۇرعان بولاتىن.

كوردىڭىز بە، الىستاعى اعايىن ماسەلەسىنە كەلگەندە، ەلباسى نۇرسۇلتان ءابىشۇلى ەشقاشان كۇمىلجىگەن ەمەس!

ەسەسىنە، ۇنەمى جىگىتشە شەشىم قابىلداپ، ەركەكشە بۇيرىق بەرىپ وتىردى!

سول كەزدەگى ەڭبەك ءمينيسترى بولعان ناتاليا كورجوۆا حانىم باستاعان توپ بۇتىنا جىبەرىپ قويا جازداپ، زىر جۇگىرگەن بولاتىن!

ءبىز ەلباسى نۇرسۇلتان نازارباەۆتىڭ بۇل قامقورلىعىن ەكى دۇنيەدى ۇمىتپايمىز! جامبىل اتامىزدىڭ جاسىنا جەتسىن نۇرسۇلتان ءابىشۇلى!

اسا مارتەبەلى قاسىم-جومارت كەمەلۇلى!

ارتىق ايتسام، ايىپقا بۇيىرماڭىز! قازاق ۇكىمەتىنىڭ بۇگىنگى تىرلىگىن كورىپ، تۇڭىلىڭكىرەپ وتىرمىن!

ءبارىنىڭ ولگەن قويدىڭ وكپەسى قۇساپ ەزىلىپ، اۋزىنان ءسوزى، قوينىنان ءبوزى ءتۇسىپ، ءجۇنجىپ كەتكەنى كورىنىپ تۇر!

اۋعانستاننان ورالعان قانداستارىمىز تاليبانداردىڭ تابانىندا قالعان جاقىن تۋىستارىن قۇتقارۋدى سۇراپ، كۇندىز-ءتۇنى شىرىلداۋدا.

ءبىز ولاردىڭ تەلەفوندارىن قابىلداپ، بىلگەن كەڭەسىمىزدى ايتىپ، ونداعى تۋمالارىنىڭ ءتىزىمى مەن مەكەن جايىن وزدەرىنە دايىنداتىپ جاتىرمىز.

نەگە ەكەنىن بىلمەيمىن، تۇڭعىش پرەزيدەنت نۇرسۇلتان نازارباەۆتىڭ سول باتىلدىعى مەن تەبىنى بۇگىنگى بيلىكتە جوق سەكىلدى. نۇرسۇلتان ءابىشۇلىنىڭ قانداستارىمىزعا «كەلىڭدەر دە، اينالايىن قازاعىم، بايىڭدار!» دەيتىن قامقورلىعى مەن كەڭ پەيىلىن دە بۇگىنگى ۇكىمەتتەن كورىپ تۇرعان جوقپىن؟!!

كەرىسىنشە، جاسىراتىنى جوق، «سوڭعى كۇندەرى قازاقستان ەلشىلىگىنە وزدەرىن قازاق دەپ تانىستىراتىن ازاماتتاردىڭ، ءتۇرلى توپتاردىڭ جۇگىنۋى جيىلەپ كەتتى. بىراق ءىس جۇزىندە ولاردىڭ ەشقانداي دالەلى جوق. قازاق تىلىندە سويلەي المايدى، اتا-باباسىنىڭ قونىس اۋدارۋ تاريحى مەن رۋ-تايپالىق بايلانىستارى تۋرالى ايتا المايدى...», –  دەگەن سەكىلدى مىڭ سان سىلتاۋ ايتىپ، سىرتقا تەبەتىن سىڭاي اسقىنىپ بارادى.

سىرتقى ىستەر مينيسترلىگىنىڭ مۇنىسى – سۋ كەشپەيتىن ءسوز، اسا مارتەبەلى قاسىم-جومارت كەمەلۇلى!

 تىل؟!

تىلدەن اتا-باباسىنان بەرى قازاقستاندا تۋىپ وسكەن قازاقتاردىڭ ءوزى جىرعاپ تۇرعان جوق!

اۋعانستانداعى قازاقتاردىڭ ۇلتى مەن سانىن انىقتاۋ دا سونشالىق قيىن شارۋا ەمەس. ولاردىڭ قازاق ەكەنىن جانە سانىن تاۋەلسىزدىك جىلدارى، جوعارىدا ايتىلعان، نۇرسۇلتان ءابىشۇلى كوشىرىپ العان جەرلەستەرىمىز-اق انىقتاپ بەرەدى. بايتاق قازاقستاننىڭ تۇكپىر-تۇكپىرىندەگى اۋعانستاننان كەلگەن قازاقتار اپاتتى ايماقتاعى جاقىن تۋىستارىنىڭ مالىمەتىن بىزگە جولداپ جاتىر. ولاردىڭ سانى سىرتقى ىستەر مينيسترلىگى ايتقان «اۋعانستاندا 15-كە جۋىق قازاق وتباسى نەمەسە 200-گە جۋىق ەتنيكالىق قازاق تۇرادى» دەگەن مالىمەتتەن الدەقايدا كوپ ەكەنى بايقالۋدا...

سول قازاقتار قازىر بايتاق قازاقستاننىڭ تۇكپىر-تۇكپىرىندە باقتتى تۇرمىس، تىنىش-ىنتىماقتى كۇن كەشىپ، بەيبىت ءومىر ءسۇرىپ جاتىر. قازىر ولاردىڭ تەك ءبىر عانا قايعىسى بار. ول – بۇگىنگى تاڭدا وت پەن وقتىڭ استىندا، اجال اپانىنىڭ اۋزىندا قالىپ وتىرعان اۋعانستانداعى تۋىستارى!

كەشەگى نۇرسۇلتان نازارباەۆ قورىقپاي كوشىرىپ العان سول قازاقتاردان بۇگىنگى اسقار ءماميننىڭ الاڭدايتىن، ۇركەتىن جانە قاۋىپتەنەتىن ءجونى دە، حاقىسى دا جوق!

بىلە بىلسەك، «تاليبان» قوزعالىسى قانشا قاتىگەز، جاۋىز بولسا، قازاق ۇكىمەتى ودان ەكى ەسە مەيىرىمدى، قايىرىمدى ەكەنىن تانىتىپ، ونداعى قانداستارىمىزدى اجالدىڭ اپانىنان قۇتقارۋعا مىندەتتى!

ەگەر، ول تۋىستارىمىزعا ءدال وسىنداي سىن ساعاتتا قول ۇشىن بەرۋگە جاراماساق، وندا اسقار ءمامين باسقارىپ وتىرعان بۇگىنگى ۇكىمەتتىڭ سول «تاليبان» قوزعالىسىنان ەش قانداي ايىرماسى جوق دەگەن ءسوز!

قازاقتى قىرعىزىپ قويىپ، «قاجەت بولعان جاعدايدا...» دەپ، قاراپ وتىرامىز با، سوندا؟!!

شىنىمدى ايتسام، «قاجەت بولعان جاعدايدا...» دەگەن وسى ءسوزدى ءسىز ايتتى دەگەنگە ءوز باسىم سەنە الار ەمەسپىن. ورتا جولدان قوسىلعان ءسوز  دەپ ويلايمىن.

ارينە، اۋعانستانداعى جاعداي وتە كۇردەلى. ءبىز دە اسقار ءمامين ونداعى قازاقتاردى بۇگىن بارىپ، تۇگەل كوشىرىپ كەلسىن دەۋدەن اۋلاقپىز.

بىراق، ءوزىڭىز ايتقانداي، ساباقتاستىقتى ساقتاي وتىرىپ, «تاليبان» قوزعالىسى باسىپ العان مەملەكەتتەگى قازاقتاردى اجالدان قۇتقارىپ، قازاقستانعا ورالتۋ تۋرالى باتىل شەشىم قابىلداۋىڭىزدى، ناقتى تاپسىرما بەرۋىڭىزدى سۇرايمىن!

مەن تەك سىزگە عانا سەنەمىن، اسا مارتەبەلى پرەزيدەنت مىرزا!!!

زور قۇرمەتپەن،

اۋىت مۇقيبەك

Abai.kz