الەمدىك دوپ دوداسى مەن ەرتەڭگى وتەتىن پولشا مەن ۋكراينا ەلىندەگى ەۋروپا چەمپيوناتتارىن ويعا الىپ، قازاقتىڭ ۇلتتىق قۇراماسى قاشان وسىنداي ءدۇبىرلى دوداعا قاتىسادى ەكەن دەپ، ءتاتتى قيالعا بەرىلەسىڭ. جاسىل الاڭدا جاسىنداي جارقىلداپ، قازاقتىڭ قارا دومالاق بالالارى جانكۇيەردى تامساندىرىپ جاتسا، قانداي قۋانار ەدىك. قاشانعى برازيليا، ارگەنتينا، يتاليا، گوللانديا، فرانتسيا، يسپانيا ت.ب. ەلدەردىڭ قۇراما ساپىندا ويناعان پەلە، مارادوننا، بەككەنباۋەر، ميۋللەر، روسسي، زيدان جانە بۇگىنگى جۇلدىزدار كاكا، مەسسي، ۆيليا، دروگبا، توررەس، رۋني، يسۋس ناۆاس، تەۆەز، كريشتيانو رونالدو، رابينە، حوندا، سنەيدەر سىندى ويىنشىلاردىڭ ونەرىنە تامسانىپ، اۋزىمىزدىڭ سۋى قۇرىپ جۇرە بەرەمىز؟ الەمدىك دوپ دوداسىندا ءار قازاق ءار ەلدىڭ قۇراماسىنا جانكۇيەر بولىپ، جۇيكەسىن جۇقارتىپ، ءبىر-بىرىمەن باستەسىپ ءجۇر...

الەمدىك دوپ دوداسى مەن ەرتەڭگى وتەتىن پولشا مەن ۋكراينا ەلىندەگى ەۋروپا چەمپيوناتتارىن ويعا الىپ، قازاقتىڭ ۇلتتىق قۇراماسى قاشان وسىنداي ءدۇبىرلى دوداعا قاتىسادى ەكەن دەپ، ءتاتتى قيالعا بەرىلەسىڭ. جاسىل الاڭدا جاسىنداي جارقىلداپ، قازاقتىڭ قارا دومالاق بالالارى جانكۇيەردى تامساندىرىپ جاتسا، قانداي قۋانار ەدىك. قاشانعى برازيليا، ارگەنتينا، يتاليا، گوللانديا، فرانتسيا، يسپانيا ت.ب. ەلدەردىڭ قۇراما ساپىندا ويناعان پەلە، مارادوننا، بەككەنباۋەر، ميۋللەر، روسسي، زيدان جانە بۇگىنگى جۇلدىزدار كاكا، مەسسي، ۆيليا، دروگبا، توررەس، رۋني، يسۋس ناۆاس، تەۆەز، كريشتيانو رونالدو، رابينە، حوندا، سنەيدەر سىندى ويىنشىلاردىڭ ونەرىنە تامسانىپ، اۋزىمىزدىڭ سۋى قۇرىپ جۇرە بەرەمىز؟ الەمدىك دوپ دوداسىندا ءار قازاق ءار ەلدىڭ قۇراماسىنا جانكۇيەر بولىپ، جۇيكەسىن جۇقارتىپ، ءبىر-بىرىمەن باستەسىپ ءجۇر...

انشەيىندە جەرىمىزگە «توعىز فرانتسيا، گەرمانيا سىيىپ كەتەدى» دەپ كوكىرەك قاققاندا مارقايىپ قالامىز. سول فرانتسيا، گەرمانيا دوپ دوداسىندا تالاي رەت الەم چەمپيونى، ەۋروپا چەمپيونى اتاندى. ءۇش-ءتورت ميلليونعا جۋىق حالقى بار ۋرۋگۆاي ەكى رەت الەم كۋبوگىن ۇتىپ العان. شاعىن عانا گوللانديا، سلوۆەنيا، گانا، يتاليا، يسپانيا فۋتبولشىلارى ايدى اسپانعا شىعارىپ ءجۇر. ماسەلە حالىقتىڭ سانىندا ەمەس، تەڭبىل دوپتى ۇرشىقشا ۇيىرەتىن اياقدوپ شەبەرلەرىنىڭ ساپاسىندا. تمد ەلدەرىنىڭ بىردە-ءبىر قۇراماسى وتكەن الەم چەمپيوناتىنا قاتىسا المادى. الىپ رەسەيدىڭ فۋتبولشىلارى شەشۋشى ويىندا سىر بەرىپ، ابىرويدان جۇرداي بولعان. قازاقستان قۇراماسى ىرىكتەۋ ويىندارعا قاتىسقانىنا ءماز بولىپ ءجۇر. 6:0, 4:0, 3:0 ەسەپتەرىمەن ويسىراي ۇتىلىپ جاتسا دا، «ءالى تاجىريبە جيناقتاپ جاتىرمىز» دەپ ءوز-ءوزىمىزدى جۇباتىپ قويامىز. ەكونوميكاسى ارتتا قالعان، الەۋمەتتىك جاعدايى ءماز ەمەس افريكانىڭ قارا سيراق بالالارى الا دوپتى قالاي تەۋىپ ءجۇر دەڭىز. ولاردىڭ تەحنيكالىق شەبەرلىكتەرىنە، جاسىل الاڭداعى جەڭىسكە دەگەن قۇشتارلىقتارىنا ءتانتى بولاسىڭ. «مەنمىن» دەگەن قۇرامالارمەن تەرەزەسى تەڭ ويناپ، كەيبىرىن تاس-تالقان ەتىپ ۇتىپ كەتەدى. گانا، نيگەريا، كامەرۋن، كوت-د'يۆۋار قۇرامالارىنداعى فۋتبول جۇلدىزدارى بارشانى ءتانتى ەتەدى. ولار ەۋروپانىڭ ەڭ اتاقتى كلۋبتارىندا ونەر كورسەتەدى. بۇل جۇلدىزداردى "بارسەلونا", "ينتەر", "چەلسي", "رەال", "باۆاريا", "ميلان", "ارسەنال", "ميۋ" كلۋبتارىنىڭ ساپىندا كورۋگە بولادى. ءبىزدىڭ قازاقتىڭ قاي بالاسى قاي ەلدە ونەر كورسەتۋدە؟ اتىن اتاپ، ءتۇسىن تۇستەي المايمىز. كەڭەستەر وداعى كەزىندە «سسسر» دەگەن قۇرامادا سەيدىللا بايشاقوۆ سىندى تەڭبىل دوپ شەبەرى وينادى. كەزىندە «قايراتتىڭ» قاقپاشىسى قۇرالبەك ورداباەۆ قازاقتىڭ اتاق-داڭقىن كەڭەستەر وداعىنا تانىتتى. بىراق الەمدىك ارەناعا شىعا الماي كەتتى.
وتكەن الەمدىك دوپ دوداسىن وتكىزگەن وڭتۇستىك افريكا رەسپۋبليكاسىندا تاڭداي قاعارلىق كەرەمەت جاسىل الاڭداردى كوردىك. ءتورت ستاديون الەم چەمپيوناتى قارساڭىندا سالىندى. التاۋى مۇلدەم جاڭارتىلىپ جابدىقتالدى. ستاديونداردى سالۋ جانە قايتا جاراقتاندىرۋ شىعىندارى 1 ميلليارد اقش دوللارىنان استى. ءبىر يوحاننەسبۋرگ قالاسىنداعى سوككەر سيتي ستاديونىنا 94 700 جانكۇيەر سيادى. ەڭ از جانكۇيەر بولادى دەگەن ستاديوننىڭ سىيىمدىلىعى 46 000. قازاقستاندا مۇنداي ستاديوندار جوقتىڭ قاسى.
قازاقستان بىرىنشىلىگىندە ويناپ جۇرگەن فۋتبوشىلاردىڭ كوبىسى باسقا ۇلت وكىلدەرى. قازاقتىڭ قارا دومالاق اياقدوپ شەبەرلەرى تىم از. الەم بىرىنشىلىگىندەگى قۇرامالارداعى ويىنشىلاردىڭ تىزىمىنە قاراساڭ تەك قانا ءوز ۇلتىنىڭ وكىلدەرى. وڭتۇستىك كورەيا، جاپونيا، برازيليا، يتاليا، گوللانديا، يسپانيا، ارگەنتينا، گانا ساپىنا قاراپ-اق بىلۋگە بولادى. جاتتىقتىرۋشىلارى دا وزىنەن. ەگەر دە قازاقستان فۋتبول قۇراماسى الەمدىك دوپ دوداسىنا قاتىساتىن بولسا، قۇراما ساپىندا ءار ۇلتتىڭ وكىلدەرى بولاتىنى داۋسىز. جاسىل الاڭدا قازاقتىڭ نامىسىن قازاق جىرتپاسا، اقشا مەن باس پايدا ءۇشىن ويناپ جاتقانداردان ءۇمىت از. قازاقستاندا فۋتبول ونەرىن دامىتۋعا مۇلدەم كوڭىل بولمەي جاتىر دەپ ايتا المايمىز. كىشىگىرىم تۋرنيرلەر ءوتىپ جاتىر. فۋتبولدان داڭقى شىققان برازيليا فۋتبول مەكتەبىنەن ساباق الۋعا بارعان جاسوسپىرىمدەردەن ءۇمىت كۇتەمىز. دەگەنمەن تاپ قازىر ايدى اسپانعا شىعاراتىنداي جاعداي جوق. جۇرەگىمىز قالاعان قۇراماعا جانكۇيەر بولىپ، وزگەگە قيقۋ قوسىپ جۇرگەن جايىمىز بار.

بالتابەك تۇيەتاەۆ

وڭتۇستىك قازاقستان وبلىسى

«تۇركىستان» گازەتى