ماڭعىستاۋ وبلىسىنا جاڭا اكىم تاعايىندالدى. ول نۇرلان نوعاەۆ. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي ءوزىنىڭ فەيسبۋك پاراقشاسىنا جازدى. 

"مەملەكەت باسشىسىنىڭ جارلىعىمەن نۇرلان اسقارۇلى نوعاەۆ ماڭعىستاۋ وبلىسىنىڭ اكىمى بولىپ تاعايىندالدى، ول قازاقستان رەسپۋبليكاسىنىڭ ەنەرگەتيكا ءمينيسترى لاۋازىمىنان بوساتىلدى" دەپ جازدى ول.

نۇرلان نوعاەۆ 1967 جىلى 30-شىلدەدە اقتوبە وبلىسى، مۇعالجار اۋدانى، قاندىاعاش ەلدى مەكەنىندە دۇنيەگە كەلگەن. ەڭبەك جولىن 1984 جىلى قاندىاعاش ستانتسياسىندا ەلەكتريك بولىپ باستادى.

2006 جىلى «قازمۇنايگاز» ۇلتتىق كومپانياسىنىڭ اتقارۋشى ديرەكتورى بولىپ جۇمىس ىستەدى.

2006-2007 جىلدارى - ەنەرگەتيكا جانە مينەرالدى رەسۋرستار مينيسترلىگىنىڭ مۇناي ونەركاسىبى دەپارتامەنتىنىڭ ديرەكتورى بولسا،  2007 جىلدىڭ قىركۇيەگىندە باتىس قازاقستان وبلىسى اكىمىنىڭ ورىنباسارى بولدى.

2010 جىلدىڭ ساۋىرىندە باتىس قازاقستان وبلىسى اكىمىنىڭ ءبىرىنشى ورىنباسارى بولىپ تاعايىندالدى.

2012-2016 جىلدارى باتىس قازاقستان وبلىسىنىڭ اكىمى قىزمەتىن اتقاردى.

2016-2019 جىلدارى اتىراۋ وبلىسىنىڭ اكىمى بولىپ جۇمىس ىستەدى.

2019 جىلدىڭ جەلتوقسانىنان باستاپ قازاقستاننىڭ ەنەرگەتيكا ءمينيسترى بولدى. بۇل قىزمەتكە 2021 جىلدىڭ قاڭتارىندا ءماجىلىس دەپۋتاتتارى سايلانعاننان كەيىن قايتا تاعايىندالدى.

Abai.kz