قر سىرتقى ىستەر مينيسترلىگى اۋعانستاننان بوسقىندار قابىلداۋ ماسەلەسىنە قاتىستى پىكىر ءبىلدىردى. بۇل تۋرالى Tengrinews.kz مالىمدەدى.

مينيسترلىك مالىمەتىنشە، ءدال قازىر قازاقستان اۋعان بوسقىندارىن قابىلداۋ ماسەلەسىمەن بەتپە - بەت كەلىپ وتىرعان جوق. دەگەنمەن، حالىقارالىق قاۋىمداستىقتىڭ مۇشەسى رەتىندە قۇقىقتىق قۇجاتتاردا كوزدەلگەن مىندەتتەمەلەردى ورىنداۋعا بەيىم.

«بۇۇ حالىقارالىق قاۋىمداستىق مۇشەلەرىنە بوسقىنداردى قابىلداۋ تۋرالى وتىنىشپەن جۇگىنە الادى، الايدا ونىڭ زاڭدى كۇشى جوق. اۋعانستان ازاماتتارى قازاقستاندا بوسقىن مارتەبەسىن الۋعا ءوتىنىش بىلدىرگەن جاعدايدا، ءبىزدىڭ ەلدىڭ زاڭناماسىنا سايكەس، ءوتىنىش قارالادى. قازاقستان رەسپۋبليكاسىندا بۇۇ -نىڭ 1951 جىلعى بوسقىندار مارتەبەسى تۋرالى كونۆەنتسياسىنىڭ مىندەتتەمەلەرىنە تولىق سايكەس كەلەتىن 2009 جىلعى 4 جەلتوقسانداعى «بوسقىندار تۋرالى» زاڭى بار»، - دەلىنگەن قر ءسىم ءباسپاسوز قىزمەتىنىڭ حابارلاماسىندا.

دەپارتامەنت زاڭدا بوسقىننىڭ انىقتاماسى مەن ەلدىڭ قۇزىرلى ورگاندارىنا پانا ىزدەۋشىلەرگە جۇگىنۋ ءتارتىبى جازىلعانىن ءتۇسىندىردى.

«پانا ىزدەگەن ادام قازاقستان اۋماعىنا كەلگەننەن كەيىن بەس كۇن ىشىندە نەمەسە سول ساتتەن باستاپ ەل اۋماعىندا بولعاندا، ناسىلدىك، ۇلتتىق، ءدىني سەنىمى، ازاماتتىق بەلگىسى، بەلگىلى ءبىر الەۋمەتتىك توپقا جاتاتىندىعى نەمەسە ساياسي نانىمى بويىنشا قۋدالاۋدىڭ قۇربانى بولۋ قاۋپىنىڭ نەگىزدىلىگىنە وراي ۋاكىلەتتى ورگانعا - قازاقستان ىشكى ىستەر مينيسترلىگى كوشى -قون قىزمەتى كوميتەتىنە بوسقىن مارتەبەسىن بەرۋ تۋرالى جازباشا وتىنىشپەن جەكە نەمەسە ۋاكىلەتتى وكىل ارقىلى جۇگىنە الادى»,- دەدى ءسىم.

ايتا كەتەيىك، اۋعانستاندا تاليبان وكىلدەرى بيلىك باسىنا كەلگەننەن كەيىن ەلدىڭ ءتورت ميلليونعا جۋىق تۇرعىنى ۇيلەرىن تاستاپ كەتۋگە ءماجبۇر بولدى. بۇۇ بوسقىنداردى شاقىرعاننان كەيىن الەمنىڭ كوپتەگەن ەلدەرى بىرنەشە مىڭ ادامدى قابىلداۋعا شەشىم قابىلدادى.

Abai.kz