بيىل الماتى مەتروسىنىڭ جاڭا ەكى بەكەتىنىڭ قۇرىلىسى اياقتالىپ، پايدالانۋعا بەرىلەتىنى تۋرالى اقپارات وسىدان ءبىراز بۇرىن جاريا بولعان ەدى. بيىل مامىر ايىندا الماتى اكىمدىگى اتالعان مەترو بەكەتتەرىنىڭ قۇرىلىسىمەن تانىسىپ قايتقان.

ساعىنتاەۆ ۇكىمەتتەن كومەك سۇرايدى

28 مامىر 2021 جىل. الماتى اكىمدىگىنىڭ رەسمي سايتى:

«مەتروپوليتەننىڭ ءبىرىنشى جەلىسىنىڭ ەكىنشى كەزەڭىنىڭ ەكىنشى باستاۋ كەشەنى اباي داڭعىلىنىڭ استىنا، التىنسارين داڭعىلىنان باتىسقا قاراي ياسساۋي كوشەسىنە دەيىنگى جەردە ورنالاسقان. كەشەن قۋما توننەلدەردەن جانە ەكى بەكەتتەن – تەرەڭ قازىلعان پيلون تيپتە جاسالعان «سارىارقا» جانە تاياز قازىلعان «دوستىق» بەكەتتەرىنەن تۇرادى. جوبانىڭ جالپى دايىندىعى 80%-عا جۋىق»، - دەپ اقپارات تاراتقان.

15 ماۋسىم 2021 جىل. الماتى اكىمى باقىتجان ساعىنتاەۆ مەترو قۇرىلىسىنا ۇكىمەتتەن كومەك سۇراپ:

«ۇكىمەتتەن قولداۋ سۇرايتىن تاعى ءبىر ماسەلە – مەتروپوليتەن. قازىر جۇمىس ىستەپ تۇرعان 9 بەكەت جىلىنا 16 ميلليون جولاۋشىعا قىزمەت كورسەتىپ تۇر. ال جاڭا ەكى بەكەت ىسكە قوسىلعاندا جولاۋشىلار كولەمى 32 ميلليونعا دەيىن جەتۋى مۇمكىن. سوندىقتان، ۇكىمەتتەن مەترونىڭ جاڭا ەكى بەكەتىنىڭ قۇرىلىسىنا قولداۋ كورسەتۋدى سۇرايمىز»، - دەگەن ەدى.

2 شىلدە 2021 جىل. ۇكىمەت باسشىسى اسقار مامين مەترو قۇرىلىسىن بيىل جىل سوڭىنا دەيىن اياقتاۋدى تاپسىرعانىن «Primeminister.kz» سايتى جازدى.

وندا: «بيىلعى جىلدىڭ اياعىنا دەيىن «سارىارقا» مەن «دوستىق» بەكەتتەرىندە قۇرىلىس جۇمىستارى اياقتالىپ، تەحنيكالىق ىسكە قوسۋ جۇزەگە اسىرىلادى. ال 2022 جىلدىڭ ءبىرىنشى توقسانىندا تولىقتاي پايدالانۋعا بەرىلەدى»، - دەپ جازىلعان.

ەكى بەكەتتىڭ قۇنى – 57 ملرد تەڭگە

3 تامىز 2018 جىل. «Sputnik.kz» سايتى: «الماتى مەتروپوليتەنىنىڭ «سارىارقا»، «دوستىق» جانە «قالقامان» بەكەتتتەرىنىڭ قۇرىلىسىنا 100 ميلليارد تەڭگە جۇمسالادى. سونىڭ ىشىندە «سارىارقا» مەن «دوستىق» بەكەتتەرىنىڭ قۇرىلىسى 2021 جىلى اياقتالادى. ولاردىڭ جالپى قۇنى – 57 ميلليارد تەڭگە»، - دەپ جازادى.

مەتروپوليتەننىڭ رەسمي سايتىندا (metroalmaty.kz) «قۇنى 60 ملرد تەڭگەنى قۇراعان الماتىنىڭ جاڭا مەترو ستانتسيالارى قانداي بولماق؟», اتتى ماقالا جاريالانىپتى.

وندا: «سالىنىپ جاتقان «سارىارقا» مەن «دوستىق» بەكەتتەرى مەتروپوليتەننىڭ ءبىرىنشى جەلىسىنىڭ ەكىنشى كەزەڭىنىڭ ەكىنشى باستاۋ كەشەنىنە كىرەدى. ياعني، اۋەلى «ماسكەۋ» بەكەتى، سوسىن «سارىارقا» مەن «دوستىق» بەكەتتەرى جالعاسادى. «دوستىق» بەكەتى اباي مەن مومىشۇلى قيىلىسىنان ءسال باتىسقا قاراي ورنالاسقان. مومىشۇلى مەن ياسساۋي كوشەلەرىنىڭ ورتاسىندا.

جوسپار بويىنشا پايدالانۋعا بەرۋ مەرزىمى – 2021 جىلدىڭ ءبىرىنشى جارتىسى. بۇل نىسان وتە كۇردەلى بولعاندىقتان، اۋەلى قۇرىلىس جۇمىستارىنىڭ اياقتالىپ، دايىن بولۋى تەكسەرىلەدى. بارلىق اۆتوماتتاندىرىلعان جۇيەلەردى، جەلدەتۋ جۇيەسى تەكسەرىلەدى. پويىزداردى، رەلستەردى سىناقتان وتكىزەدى. ياعني، اتقارىلۋى ءتيىس جۇمىس وتە كوپ»، - دەپ جازىلعان.

ال بەلگىلى جۋرناليست، جازۋشى قانات ابىلقايىر Facebook-تاعى جەكە پاراقشاسىندا قۇرىلىسى بيىل اياقتالاتىن «دوستىق» مەترو بەكەتىنە الاشتىڭ باتىرى باۋىرجان مومىشۇلىنىڭ ەسىمى بەرىلۋى كەرەك دەپ جازادى.

«مومىشۇلى ۇيىعىرلاردان جەڭىلىپ پە ەدى؟ نەمەسە توقاەۆ پەن ساعىنتاەۆ باتىردىڭ ارۋاعىنان اتتاپ كەتپەسىن...

اباي مەن مومىشۇلى كوشەلەرىنىڭ قيىلىسىنان مەترونىڭ تاعى دا ءبىر بەكەتى اشىلماق. بۇكىل قازاق بولىپ «ۇيعىر اۋدانى» دەگەن كۇبىرتكى اتاۋدان قۇتىلا الماي جاتقاندا «ۇيعىر ۇلتىنىڭ مەكەنى» رەتىندە ەلگە تانىس «درۋجبا» اتى مەترو بەكەتىنە بەرىلمەك.

ۇلتتاردىڭ دوستىعى دەگەن جاقسى عوي. بىراق، بۇل «دوستىقتىڭ» سىرى تەك قانا قازاق پەن ۇيعىردىڭ اراسىنا سىنا قاعادى. وسى ءبىر كىشكەنتاي عانا قاتەلىكپەن تۋىس ۇلتتىڭ داندايىسىپ، «الماتى دا ءبىزدىڭ جەرىمىز» دەپ ايتۋىنا وراي تۋعىزامىز.

بۇل مەترو التى الاشتىڭ باتىرى باۋىرجان مومىشۇلىنىڭ اتىمەن اتالۋى كەرەك. بىرىنشىدەن مەترو بەكەتى «ۇلتتار اراسىنداعى دوستىققا» ەمەس، سول كوشەگە تىرەلەدى.

ەكىنشىدەن، مومىشۇلىنىڭ دا، قۇنانبايۇلىنىڭ دا اتالمىش تۋىس ۇلتپەن قاتىسى بولماعان.

ۇلتتار اراسىنا قاعىلعان سىنا قر پرەزيدەنتى قاسىم-جومارت كەمەلۇلى توقاەۆ ءھام الماتىنىڭ اكىمى باقىتجان ساعىنتاەۆقا كەرەك پە؟  

ەندەشە، ەستەرىڭىزدى جيىڭىزدار! مومىشۇلىنىڭ ارۋاعىنان اتتاپ كەتپەگەيسىزدەر!

(مەترو بەكەتى اتاۋىن مومىشۇلىنىڭ اتىنا بەرۋ كەرەكتىگى تۋرالى ءتيىستى مەكەمەلەرگە بىرنەشە مارتە حات جازىلعان. «ەستيتىن ۇكىمەتىمىز» «ەستىمەي» قالسا كەرەك»، - دەپ جازادى قانات ابىلقايىر.

تاقىرىپقا تۇزدىق رەتىندە ايتا كەتەيىك، الماتى مەتروسىنىڭ قۇرىلىسى سوناۋ سوۆەت وداعى كەزىندە باستالعان (1988 جىلى).

بىراق 1991 جىلى  كسرو–نىڭ ىدىراۋى جانە سودان كەيىنگى شارۋشىلىق جانە ەكونوميكالىق جاعدايلارعا بايلانىستى مەترو قۇرىلىسى توقتاپ ءھام تۇرالاپ قالعان. جالپى 1988 جىلدان باستالعان مەترو قۇرىلىسى ءالى كۇنگە جالعاسىپ كەلەدى.

1 جەلتوقسان 2011 جىل. جالپى ۇزىندىعى 8,6 كم بولاتىن مەتروپوليتەننىڭ ءبىرىنشى كەزەگى ىسكە قوسىلدى. ونىڭ قۇرامىنا; «رايىمبەك باتىر»، «جىبەك جولى»، «المالى»، «اباي»، «بايقوڭىر»، «اۋەزوۆ تەاترى» جانە «الاتاۋ» بەكەتتەرى كىرەدى.

18 ءساۋىر 2015 جىل. «سايران» جانە «ماسكەۋ» بەكەتتەرى پايدالانۋعا بەرىلدى. مەترو توننەلىنىڭ ۇزىندىعى 2,74 كم-گە دەيىن سوزىلدى.

نۇرگەلدى ابدىعانيۇلى

Abai.kz