بۇگىنگى جەر دۇنيەنى پاندەميا جايلاعان زاماننىڭ ادامزاتتىڭ يىعىنا ارتقان جۇگى اۋىر. بۇكىل الەم قاۋىپتى ىندەتتىڭ قۇرساۋىنان شىعا الماي، قايتكەندە دە امان قالۋدىڭ الدىن الىپ، زامان تالابىنان قالىس قالماۋ جولىندا كۇرەسىپ جاتىر. تاۋەلسىزدىك العانىنا 30 جىل تولىپ جاتقان قازاق ەلى دە كوپپەن بىرگە كۇرەسىپ، حالىقتى ىندەتپەن ەرە كەلگەن داعدارىستىڭ تىعىرىعىنان شىعارۋعا بارىن سالۋدا.

سول ءۇشىن مەملەكەت باسشىسى قاسىم-جومارت توقاەۆ بيىلعى جىلدىڭ ءبىرىنشى قىركۇيەگىندە «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا ارناعان جولداۋىندا ۇكىمەتكە بىرقاتار ناقتى تاپسىرمالار جۇكتەپ، «كەز كەلگەن سىن-قاتەرگە دايىن بولۋعا ءتيىسپىز. تىنىمسىز ىزدەنىپ، ۇدايى العا ۇمتىلۋىمىز قاجەت»، – دەدى.

ەل پرەزيدەنتىنىڭ 7 بولىمنەن تۇراتىن جولداۋىندا: «مالىمەت بەرۋ جەلىسىن حالىقارالىق دالىزدەرمەن ۇشتاستىرا وتىرىپ، ونى بىرتىندەپ كەڭەيتۋ جانە جاڭارتۋ قاجەت. كورشى ەلدەرگە دە قىزمەت كورسەتە الاتىن مالىمەت وڭدەۋدىڭ زاماناۋي ورتالىقتارىن قۇرۋ كەرەك.

ءبىز ەلىمىزدىڭ وراسان زور اقپاراتتىق-تەلەكوممۋنيكاتسيالىق الەۋەتىن ىسكە اسىرا بىلۋگە ءتيىسپىز. جاڭا تسيفرلىق داۋىردە ول گەوساياسي ماڭىزعا يە بولادى. قازاقستان ەۋرازيا ءوڭىرىنىڭ باسىم بولىگى ءۇشىن ورتالىق تسيفرلىق حابقا اينالۋعا ءتيىس» دەگەن ءسوزى ەلىمىزدىڭ بۇقارالىق اقپارات قۇرالدارىندا قىزمەت ەتەتىن مىڭداعان كاسىبي ماماندارعا كورسەتىلگەن ۇلكەن سەنىم دەپ تۇسىنەمىز. مەملەكەتتىڭ قوعامدىق-ساياسي ءومىرىنىڭ جىلناماسىن جازۋشى – جۋرناليستەر قاۋىمى ءاردايىم تاۋەلسىز ەلىمىزدىڭ بارلىق جاڭالىقتارى مەن جەڭىستەرىنىڭ جارشىسى بولىپ، بەلسەندى قوعامنىڭ الدىڭعى ساپىندا كەلەدى.

«مەملەكەتتىك قىزمەتكەرلەر جانە بۇكىل قوعام ءبىرتۇتاس ەل رەتىندە الدىمىزدا تۇرعان مىندەتتەردى ورىنداۋ ءۇشىن جۇمىلۋعا ءتيىس» دەگەن پرەزيدەنت ءسوزىن كۇن تارتىبىمىزگە قويۋ بارشامىزدىڭ ازاماتتىق بورىشىمىز دەپ ەسەپتەيمىن.

ايسۇلۋ دۋتباەۆا 

«ماڭعىستاۋ-مەديا» جشس ديرەكتورى

Abai.kz