اقش اسكەرى اقش پرەزيدەنتى دجو بايدەن بيلىگى اياقتالعانعا دەيىن سيريادان كەتەدى. بۇل تۋرالى رەسەي حالىقارالىق ىستەر جونىندەگى كەڭەستىڭ ساراپشىسى الەكسەي ناۋموۆ ايتتى.

ناۋموۆ امەريكا قۇراما شتاتتارىنىڭ سيرياداعى مۇددەلەرىن اسكەري جولمەن ەمەس، ديپلوماتيالىق قۇرالدارمەن قورعاي باستايتىنىنا سەنىم ءبىلدىردى. ناۋموۆتىڭ ايتۋىنشا امەريكا قۇراما شتاتتارى باشار اساد رەجيمىن وقشاۋلاندىرۋعا ءالى كىرىسپەيدى.

"اقش سيريا-يراك شەكاراسىنداعى جاعدايدى باقىلاۋدا ۇستايدى، كۇردتەرگە قولداۋ كورسەتەدى، دايش پەن يرانشىل كۇشتەردىڭ ورنالاسۋىنا جول بەرمەيدى. ۆاشينگتون اسادقا كۇردتەر باسىپ العان مۇنايعا باي اۋماقتى يەمدەنۋگە رۇقسات بەرمەيدى" دەيدى ساراپشى. ول اقش الداعى ۋاقىتتا سيريادان كەتىپ، اسكەري وپەراتسيالاردى اۋەدەن سوققى جاساۋ ارقىلى عانا جالعاستىراتىنىن اتاپ ءوتتى.

10 تامىزدا اقش قورعانىس ءمينيسترىنىڭ تاياۋ شىعىس بويىنشا كومەكشىسىنىڭ ورىنباسارى دانا ستروۋل اقش اسكەرلەرى سيريانىڭ سولتۇستىك-شىعىسىندا قالۋى كەرەك دەپ مالىمدەدى. ونىڭ ايتۋىنشا، بۇل دايش-پەن كۇرەسۋدە وداقتاستارعا كومەكتەسۋ ءۇشىن قاجەت.

Abai.kz