قازاقستان ۇكىمەتى كۇنى بۇگىنگە دەيىن «تسيفرلىق قازاقستان» باعدارلاماسىنا بيۋدجەتتەن 300 ميلليارد تەڭگە جۇمساعان. بۇل تۋرالى ulysmedia.kz سايتى جازادى. 

قازاقستاندا تسيفرلىق ۇكىمەت پلاتفورماسىن قۇرۋعا قاتىستى رەسەيلىك سبەر-مەن كەلىسىم جاساسۋ سوڭى ۇلكەن داۋ-دامايعا ۇلاستى.

جەلىدەگى نارازىلىق تولقىنى تولاستار ەمەس. قازاقستاندىقتار جەكە دەرەكتەرىنىڭ رەسەيلىك IT-مامانداردىڭ قولىنا وتەتىنىنە الاڭداۋلى، ال تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين وسى باستامانىڭ «ادۆوكاتىنا» اينالدى.

300 ملرد تەڭگەدەن استام قارجى بولىنگەن

2018 جىلدان بەرى جۇزەگە اسىرىلىپ كەلە جاتقان بيۋدجەتى كوپ جوبانىڭ ءبىرى «تسيفرلىق قازاقستان» باعدارلاماسىنا رەسەيلىك ءىت-مامانداردى تارتىپ، ولارعا اقى تولەۋگە قازاقستان قالاي ءماجبۇر بولدى؟ جەلىدە جاريالانعان مالىمەتتەرگە سەنسەك، تەك 2018-2019 جىلدارى قازاقستاندىق سالىق تولەۋشىلەر قالتاسىنان 41,4 ميلليارد تەڭگە اتالعان باعدارلاماعا جۇمسالعان. 2022 جىلعا ەل بيۋدجەتىنەن 109 ميلليارد تەڭگە، «كۆازيمەملەكەتتىك سەكتور قاراجاتىنان» 169 ميلليارد تەڭگە جۇمسالۋى ءتيىس، ال بۇل سەكتوردىڭ ءىس جۇزىندە بيۋدجەت ەسەبىنەن كۇن كورەتىنى بەلگىلى.

مۇنداي قوماقتى بيۋدجەتى بار باعدارلاما «ورتا مەرزىمدى پەرسپەكتيۆادا تسيفرلىق تەحنولوگيالاردى قولدانۋ ارقىلى حالىقتىڭ ءومىر ءسۇرۋ ساپاسىن جاقسارتادى»، دەپ سانايدى مينيسترلىك اتىنان جوبانى ازىرلەگەندەر.

وكىنىشكە قاراي، قازاقستاندىقتار بۇدان جاعدايلارىنىڭ جاقسارىپ كەتكەنىن سول كۇيى سەزىنە المادى.  ال پاندەميا مەن حالىقتىڭ باسىم كوپشىلىگىن ونلاين جۇمىس ىستەۋگە مىندەتتەيتىن كارانتين شارالارىنان قازاقستاندا تسيفرلاندىرۋ جۇرگىزىلمەگەنى بەلگىلى بولدى.

«تسيفرلى قازاقستاندى» دامىتۋعا ۇزاق ۋاقىت بويى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى بولعان، قازىر قازاقستاننىڭ نيدەرلاند كورولدىگىندەگى ەلشىسى اسقار جۇماعاليەۆ جاۋاپتى ەدى.

قىزعالداقتار القابىنا اتتاندى

بىلتىر Uzyn Qulaq اتتى تانىمال تەلەگرام ارناسى سىبايلاس جەمقورلىققا قارسى اگەنتتىك جۇماعاليەۆتى بيۋدجەتتەن 2 ميلليارد اقش دوللارىن جىمقىردى دەگەن ايىپتاپ وتىرعانىن حابارلادى، ول مۇنى «اقپاراتتاندىرۋ جانە تسيفرلاندىرۋ كۋراتورى رەتىندە 15 جىل ىشىندە يگەرگەن».

ارنانىڭ ينسايدەرلىك اقپاراتى بويىنشا، سىبايلاس جەمقورلىققا قارسى اگەنتتىكتىڭ سول كەزدەگى باسشىسى اليك شپەكباەۆ ءتىپتى جۇماعاليەۆتى ۇستاۋدى تالاپ ەتكەن. الايدا، بۇل ىسكە جۇماعاليەۆتىڭ ىقپالدى تۋىستارى ارالاسىپ، ول تۇرمەگە ەمەس، قىزعالداقتار القابىنا ەلشى بولىپ كەتتى.

ال قازاقستاندىق دەپۋتاتتار ساۋال قويىپ وتىر: تسيفرلاندىرۋدىڭ ساتسىزدىگىنە كىم جاۋاپ بەرەدى؟

«سبەرمەن كەلىسىمگە قول قويۋدى تسيفرلاندىرۋدىڭ الدىڭعى باعدارلامالارىنىڭ ساتسىزدىگى، سونداي-اق ولارعا سوڭعى جىلدارى بولىنگەن بيۋدجەت قاراجاتىن ءتيىمسىز جۇمساۋ تانۋ دەپ باعالاۋعا بولا ما؟ ەگەر سولاي بولسا، وتكەن جىلدارى مەملەكەتتىك قىزمەتتەردى تسيفرلاندىرۋعا قانشا مەملەكەتتىك قاراجات جۇمسالدى جانە ولاردىڭ ءتيىمسىز پايدالانىلۋى ءۇشىن كىم جاۋاپتى؟»، - دەدى «اق جول» پارتياسى فراكتسياسىنىڭ دەپۋتاتتارى 15 قىركۇيەكتە وتكەن پارلامەنت ءماجىلىسىنىڭ پلەنارلىق وتىرىسىندا.

مينيسترلەر كابينەتىنىڭ باسشىسى بۇل سۇراققا نە دەپ جاۋاپ بەرەتىنى قىزىق؟..

Abai.kz