ەكى-ءۇش كۇن بۇرىن «تيك-توك» جەلىسىنەن ءبىر وزبەك جىگىتى الماتىدا «اقساي» ىقشاماۋدانىنداعى «ايشا» دەگەن حوستەلگە ايىنا 300 مىڭ تەڭگە تولەيتىن بولىپ جۇمىسقا شاقىرىلعانىن، الايدا ەشقانداي كەلىسىم-شارت جاسالماي ەكى ايدان سوڭ ءبىر تيىن اقشا تولەمەي، ءوزىن كەمسىتىپ قورلاپ، بوقتاپ قۋىپ جىبەرگەنىن وراسان رەنىشپەن ايتىپ تۇرعانىن كوردىم. يەسى قازاقتار كورىنەدى. قارادان تۇرىپ ءبىز ۇيالدىق. جۇمىس بەرۋشىلەرىنە ارناعان نالەت قارعىسى دا قۇلاعىمىزدا قالدى.

نارىقتىق قاتىناستار كەزى بولعان سوڭ با وسىنداي كىسى اقىسىن جەيتىن، جۇمىستارىن جاساتىپ الىپ ارتىنان ەشتەمە كورمەگەندەي بەزەرەتىندەر كوبەيدى. تانىمال م. دەگەن ءانشىنىڭ ۇيىنە كۇردەلى جوندەۋ جاساتىپ الىپ، قۇرىلىسشىلاردى قۇرقول ايداپ شىققانى، الەم چەمپيونى س. دەگەن سپورتشى سىلاقشى كەلىنشەكتەردىڭ اقىسىن تولەمەي قويعانى، ءوزىن ەلگە تۇتقا سانايتىن ءبىر دوكەي جاس كومەكشىسىن ەكى جىل بويى ەمەكسىتىپ جانىندا ۇستاپ، اقىرى سيىرقۇيىمشاقتاتىپ اقىسىن بەرمەي قۋىپ جىبەرگەنى، ن.دەگەن كاسىپكەر جىگىتتىڭ ەكى قاباتتى ءۇيىن سالدىرتىپ الىپ قۇرىلىسشىلارعا اقشاسىن بەرمەي زار قاقتىرعانى سياقتى جاعداياتتار ەل ىشىندە كوپ. الگىندەي وزبىرلىققا كوبىنە داياشىلار، باقتاشىلار، كۇزەتشىلەر، قۇرىلىسشىلار، قارا جۇمىسشىلار ۇشىراپ جاتادى. بۇل ءوزى كەڭىنەن تاراپ بارا جاتقان تەرىس قۇبىلىسقا ۇقسايدى. HeadHunter زەرتتەۋ ورتالىعى وتكەن جىلى 2 مىڭداي ادامنىڭ اراسىندا ونلاين جۇرگىزگەن پىكىرتەرىم ناتيجەسىنە قاراعاندا سۇراۋ سالىنعانداردىڭ 84 پايىزى جۇمىس ىزدەگەن نەمەسە جۇمىسقا تۇرعان كەزدەرىندە الداۋ ارەكەتتەرىنە تاپ بولعاندارىن ايتقان.

ادام بالاسى دىنىنە، ۇلتىنا، ناسىلىنە قاراماستان اللا الدىندا دا، زاڭ الدىندا دا ءبارى بىردەي. اسىل دىنىمىزدە «بىرەۋدىڭ ەڭبەگىنىڭ اقىسىن جەيدەسىنىڭ تەرى كەپكەنشە بەر» دەيتىن قاعيدا دا بار. اللا تاعالا ءوز اقىسىن كەشىرگەنىمەن قۇلدارىنىڭ اراسىنداعى اقىنى ولاردىڭ وزدەرىنە قالدىرعان. الداۋعا ۇشىراماۋ ءۇشىن جۇمىسقا تۇرار الدىندا كەلىسىم-شارت جاسالۋىن تالاپ ەتكەن دە ءتيىمدى. بىلۋگە ءتيىستى نارسە سول – بىرەۋدىڭ اقىسىن جەگەندى اقىسى جەلىنگەن ادام كەشىرمەي اللا كەشىرمەيدى.

قاراپ وتىرساڭىز، بىرەۋدىڭ اقىسىن جەگەن وزبىر ەرتە مە، كەش پە ءوزى سونىسىنىڭ زاردابىن تارتقانىن كورەسىڭ. ايتالىق، تىلگە تيەك بولعان الگى ءانشى ەكى قابات ءۇيىن بانككە كەپىلگە قويىپ اقشا الىپ، اقىرى سول ۇيىنەن ايىرىلىپ قالدى. ال ن. دەگەن كاسىپكەر ءۇيىن كازينودا ۇتقىزدى. اۋزىمەن قۇس تىستەگەن دوكەي ينسۋلتكە ۇشىراپ ارباعا تاڭىلدى. چەمپيون ءىستى بولىپ، تەمىر تورعا توعىتىلدى. «بۇل دۇنيەنىكى و دۇنيەگە كەتپەيدى» دەگەن وسى!
سوندىقتان كىسى اقىسىن جەپ قارعىسقا قالمايىق، اعايىن!

مارات ءبايدىلداۇلى

Abai.kz