نۇر-سۇلتاندا پوليتسيا شىڭجاڭدا قامالعان تۋىستارىنا اراشا سۇراپ جءۇرگەن 8 ادامدى جۇما, تاڭەرتەڭ ۋاقىتشا قونىپ جءۇرگەن ءۇيلەرىنىڭ الدىنان ۇستاپ ءاكەتتى. بۇل تۋرالى Centralasian.org مالىمدەدى.

ۇستالعاندار اراسىندا 65 جاستاعى زەينەتكەر حاليدا اقىتحان دا بار. ول بۇعان دەيىن اياعى اۋىرىپ جۇرە الماي، اربامەن قوزعالىپ جۇرگەن ەدى. ارنايى جاساق ونى دا سۇيرەپ اپارىپ، گازەلگە وتىرعىزدى. ۇستاۋ كەزىندە ول قۇلاپ قالدى.

ارنايى جاساق ازاتتىق تىلشىسىنە وقيعانى كامەراعا تۇسىرۋگە كەدەرگى كەلتىردى.

بۇعان دەيىن 1 قازاندا نۇر-سۇلتاندا قىتايدىڭ جاڭا ەلشىلىگىنىڭ اشىلاتىنى جونىندە حابار تاراعان. دەگەنمەن ازاتتىق ءتىلشىسى رەسمي حاباردى تابا المادى. استاناداعى قىتاي ەلشىلىگىنىڭ الدىندا ون كۇننەن استام اكتسيا جاساپ جۇرگەن توپ 1 قازاندا ەلشىلىككە بارىپ، قىتاي ەلشىسى چجان سياومەن كەزدەسۋگە تىرىسىپ كورمەك بولعان.

بەلسەندى بايبولات كۇنبولاتۇلىنىڭ ايتۋىنشا، جۇما تاڭەرتەڭنەن باستاپ ولاردى پوليتسيا كولىكتەرى اڭدىعان. ول ءوزى جانە نارازىلاردىڭ تاعى ءبىر گاۋحار قۇرمانعاليەۆا ەكەۋى ۇيدەن شىعىپ ۇلگەرمەگەن. پوليتسيا ولاردى ۇستاماعان.

پوليتسيا ازىرگە تۇسىنىكتەمە بەرمەدى.

• الماتىداعى قىتاي كونسۋلدىعى الدىندا جەتى ايدان استام ۋاقىت اكتسيا وتكىزگەن نارازىلارعا بۇعان دەيىن كونسۋلدىقتان ەشكىم شىقپاعان. ولار 20 قىركۇيەكتەن باستاپ نۇر-سۇلتانداعى قىتاي ەلشىلىگى الدىندا نارازىلىق وتكىزىپ كەلەدى. جۋىردا ولارعا "بەيبىت جيىن وتكىزۋ ءتارتىبىن" بۇزعانى ءۇشىن ايىپپۇل سالىندى.
• نارازىلار شىڭجاڭدا قامالعان نەمەسە قايتا الماي وتىرعان تۋىستارىن قازاقستانعا قايتارۋدى تالاپ ەتەدى. ولاردىڭ سوزىنە قاراعاندا، قىتاي بيلىگى تۋىستارىن جازىقتان-جازىقسىز سوتسىز قاماپ، قۋدالاعان. كەيبىرىن ۇيقاماقتا ۇستاپ، قازاقستانعا بارۋىنا تىيىم سالعان.
• ءساۋىر ايىندا قىتايدىڭ قازاقستانداعى ەلشىسى شىڭجاڭدا قامالعانداردىڭ "قىتاي ازاماتى" ەكەنىن جانە ولاردىڭ "قىتاي زاڭىن بۇزعانىن" ايتقان. قازاقستان سىرتقى ىستەر مينيسترلىگى "وزگە ەلدىڭ ىشكى ىسىنە ارالاسا المايتىنىن" العا تارتىپ كەلەدى.
• حالىقارالىق ۇيىمدار مەن باتىس ەلدەرى پەكيندى شىڭجاڭ ولكەسىندە ۇيعىر، قازاق، قىرعىز جانە وزگە دە مۇسىلماندارعا "گەنوتسيد" جاسادى دەپ ايىپتاعان. پەكين مۇنى جوققا شىعارعان.

Abai.kz