1 قازان كۇنى قازاقستاندا ءداستۇرلى فورماتتاعى حالىق ساناعى باستالادى. وعان ونلاين ساناقتان وتپەگەندەر قاتىسا الادى.

ۇلتتىق حالىق ساناعى رەسپۋبليكا بويىنشا ون جىلدا ءبىر رەت وتكىزىلەدى. بيىلعى ساناق ەلىمىز تاۋەلسىزدىك العالى بەرى ءۇشىنشى رەت وتكىزىلىپ وتىر.

بيىلعى ساناقتىڭ باستى جاڭاشىلىقتارىنىڭ ءبىرى – ساناقتىڭ ءداستۇرلى جانە ونلاين فورماتتا ءوتۋى بولدى. 1 قىركۇيەك پەن 15 قازان ارالىعىندا ونلاين رەجيمدە وزدىگىنەن ساۋالناما پاراقتارىن تولتىرۋ مۇمكىندىگى بولادى. جۇيە تاۋلىگىنە 24 ساعات قولجەتىمدى بولادى، رەسپوندەنتتەر ساناققا قاتىسۋ ءۇشىن وزىنە ىڭعايلى ۋاقىتتى تاڭداي الادى، سايتتا بلانك تولتىرۋدى توقتاتىپ، كەيىننەن جالعاستىرا الادى.

ودان باسقا، Egov پلاتفورماسىندا ەلەكتروندىق تسيفرلىق قولتاڭبا ارقىلى جانە Aitu ءموبيلدى قوسىمشاسى ارقىلى، sanaq.gov.kz سايتى ارقىلى ساناقتان وتۋگە بولادى. Sanaq.gov.kz جۇيەسى تاۋلىگىنە 24 ساعات قولجەتىمدى بولادى.

ال ءداستۇرلى ۇلتتىق ساناق ونلاين رەجيمدە ساناقتان وتپەگەن تۇرعىندار ءۇشىن 1-30 قازان ارالىعىندا وتەدى. ءداستۇرلى ساناقتىڭ جاڭاشىلىقتارى – ينتەرۆيۋەردىڭ ەلەكتروندى پلانشەتتەردى پايدالانۋى، زاماناۋي تسيفرلىق تەحنولوگيانىڭ ەنۋى مەن ۇردىستەردىڭ اۆتوماتتانۋى بولماق. بۇل دەرەكتەر ساپاسىنا ادام فاكتورىنىڭ ىقپالىن ازايتادى جانە دەرەكتەردىڭ بازاعا تولىق ەنۋىنە مۇمكىندىك بەرەدى.

حالىق اراسىنداعى ساۋالناما جۇرگىزەتىن ينتەرۆيۋەرلەر ءۇشىن مىندەتتى تالاپ – جەكە باسىن كۋالاندىراتىن قۇجات پەن بەيدجدىڭ بولۋى، سۋرەتى، اتى-ءجونى، بەرىلگەن كۇنى، قولدانۋ مەرزىمى اۋماقتىق ستاتيستيكا ورگانىنىڭ قولىمەن جانە مورىمەن راستالعان بولۋى ءتيىس. حالىق ساناعى بەلگىسى بار كوك ءتۇستى شارف پەن پورتفەل بولۋى كەرەك.

ساناق بارىسىندا رەسپۋبليكا تۇرعىندارى ءۇشىن 1446 بىرىڭعاي كولل-ورتالىعى جۇمىس ىستەيدى. وعان ستاتسيونارلىق جانە ۇيالى تەلەفوننان قوڭىراۋ شالۋ تەگىن.

سوڭعى مالىمەتتەر بويىنشا، ساناقتان ونلاين وتكەندەر قاتارى 6 ميلليوننان استى. تۇركىستان وبلىسى كوش باستاپ تۇر.

حالىق ساناعى ارقىلى حالىقتىڭ تۇرمىسى، الەۋمەتتىك جاعدايى تۋرالى ماڭىزدى مالىمەتتەردى جيناۋعا بولادى.

Abai.kz