مۇقاعالي ماقاتاەۆتىڭ 90 جىلدىق مەرەيتويىنا دايىندىق الماتى وبلىسى وتكەن جىلدان باستاۋ العان بولاتىن. جالپى مەرەيتويدى وتكىزۋگە جەرگىلىكتى بيۋدجەتتەن قوماقتى قارجى ءبولىندى. ايتۋلى شاراعا وراي قۇرىلعان ارنايى جۇمىس توبىن وبلىس اكىمى اماندىق باتالوۆ ءوزى باسقارىپ وتىردى.

مەرەيتوي اياسىندا، ەڭ الدىمەن اقىننىڭ تۋعان جەرى قاراساز اۋىلى، قاراسازبەن ىرگەلەس ەلدى مەكەن سارىجاز، اۋدان ورتالىعى نارىنقول اۋىلدارى اباتتاندىرىلدى. جولدار جاسالىپ، اۋىز سۋ جۇيەسى جاڭعىرتىلىپ، مادەني نىساندار جوندەلدى، ساياباقتار سالۋ قولعا الىنىپ، ەسكەرتكىش ورناتىلدى.

جالپى مەرەيتويعا الدىن الا دايىندىق بارىسىندا قاراساز اۋىلىنداعى اقىن مۋزەيىنە، مادەنيەت ۇيىنە، ا.بارمانبەكۇلى اتىنداعى ورتا مەكتەپكە جوندەۋ جۇمىستارى جاسالىپ، نىساندار جاڭا كەيىپكە ەندى. ەلدى مەكەننىڭ ورتالىق كوشەلەرى، ورتالىق الاڭى اباتتاندىرىلىپ، كوشە شامدارى ورناتىلدى. سونداي-اق، «اۋىل – ەل بەسىگى» باعدارلاماسىنىڭ اياسىندا رەسپۋبليكالىق بيۋدجەتتەن بولىنگەن 427,1 ملن. تەڭگەگە اۋىز سۋ جۇيەسى قايتا جاڭعىرتۋدان وتكىزىلىپ جاتىر. قاراساز اۋىلىندا ونەر مەكتەبىن سالۋ دا – مەرەيتوي اياسىنداعى ماڭىزدى باستامالاردىڭ قاتارىن تولىقتىرۋدا. قازىر نىساننىڭ جوبالىق-سمەتالىق قۇجاتتارى ازىرلەنۋدە. اۋىلعا كىرەبەرىستەگى جاستار ساياباعى اباتتاندىرىلدى.

ايتا كەتۋ كەرەك، اعىمداعى جىلى 3 گەكتار اۋماعى بار مۇقاعالي اتىنداعى جاڭا ساياباقتىڭ قۇرىلىسى باستالدى. قۇنى 374,5 ملن. تەڭگەلىك جوبادا كونتسەرتتىك ساحنا، شاعىن فۋتبول الاڭى، بالالار الاڭى، ۆوركاۋت سپورت الاڭى، اللەيا، دەمالىس ايماعى قاراستىرىلعان. سول سياقتى اۋداندىق اكىمدىك عيماراتىنىڭ جانىنان شاعىن ساياباق سالىنا باستادى. ال اۋداندىق مادەنيەت ءۇيىنىڭ الدىنداعى سكۆەر جانە ورتالىق ساياباق اباتتاندىرىلدى.

وسىنداي ۇلكەن دايىندىق جۇمىستارىنىڭ ناتيجەسىندە كوپشىلىك اسىعا كۇتكەن ءداۋىردىڭ دارا تۇلعاسىنىڭ 90 جىلدىق تويى بۇگىن ءوز شىمىلدىعىن ءتۇردى. قاراساز مادەنيەت ۇيىندە «مۇقاعالي – عاسىر اقىنى» اتتى عىلىمي-پراكتيكالىق كونفەرەنتسيا وتكىزىلىپ، وندا قعا اكادەمياسىنىڭ اكادەميگى بايىنقول قاليەۆ، اكادەميك شەرۋباي قۇرمانبايۇلى، بەلگىلى قالامگەر، «مۇقاعالي» جۋرنالىنىڭ باس رەداكتورى باتىق ءماجيت، قوعام قايراتكەرى، قالامگەر رىسبەك سارسەمبايۇلى، ادەبيەت سىنشىسى امانگەلدى كەڭشىلىكۇلى جانە باسقا دا عالىمدار مەن قالامگەرلەر اقىننىڭ ءومىرى مەن شىعارماشىلىعىنا قاتىستى تىڭ دەرەكتەر مەن تەرەڭ تالداۋلارىن ورتاعا سالدى. ءبىر اتاپ وتەرلىگى، وسى جيىندا باسپا بەتىن كورگەن «مۇقاعالي ءتىلى سوزدىگى» كىتابى تانىستىرىلدى.

ال ەرتەڭگى نەگىزگى شارالارعا مەملەكەتتىك حاتشى قىرىمبەك كوشەرباەۆ، وبلىس اكىمى اماندىق باتالوۆ، مادەنيەت جانە سپورت ءمينيسترى اقتوتى رايىمقۇلوۆا قاتىسادى دەپ جوسپارلانۋدا. ولار جۇرتشىلىقپەن بىرگە اقىننىڭ مۋزەيىن ارالاپ، نارىنقولدا مۇقاعاليدىڭ قولادان قۇيىلعان ەڭسەلى ەسكەرتكىشىن اشىپ، اۋىل ازاماتتارىنا جاڭا سالىنعان تۇرعىن ۇيلەردىڭ كىلتىن تاپسىرادى دەپ كۇتىلۋدە.

Abai.kz