بەلگىلى ساياساتتانۋشى سانجار بوقاەۆ الگىندە الەۋمەتتىك جەلىگە 2,5 مينۋتتىق كەزەكتى ۆيدەو ساراپتاماسىن جاريالاپتى. وندا سوڭعى جىلدارى قازاقستان مەن رەسەي اراسىنداعى بايلانىستىڭ تىم جاقىنداسىپ كەتكەنى جايلى ءوز پىكىرىن ايتادى.

«وسى بيىل، ون ايدىڭ ىشىندە رەسەي مەن قازاقستان باسشىلارى 19 مارتە كەزدەسىپ نەمەسە تەلەفون ارقىلى سويلەسكەن ەكەن. بۇرىن ونداي تىعىز قارىم-قاتىناس بولعان ەمەس»، - دەيدى ساياساتتانۋشى.

2019 جىلدىڭ ساۋىرىندە رەسەي پرەزيدەنتى ۆلاديمير پۋتين قازاقستان پرەزيدەنتى قاسىم-جومارت توقاەۆپەن كەزدەسۋدە رەسەيلىك تەحنولوگيانىڭ پايدالانىپ، اەس سالۋ تۋرالى ۇسىنىس ايتقان. بۇل اقپاراتقا قازاق قوعام، قازاقستان قوعامى ورە-تۇرەگەلىپ، قارسىلىق ءبىلدىردى. كوپ ۇزاماي پرەزيدەنت توقاەۆ: «حالىقتىڭ پىكىرىن ەسكەرمەي، اەس سالۋ تۋرالى شەشىم قابىلدانبايدى»، - دەپ مالىمدەدى.

ال بيىل قىركۇيەكتىڭ باسىندا وتكەن «شىعىس ەكونوميكالىق فورۋمىندا» قازاقستان پرەزيدەنتى قاسىم-جومارت توقاەۆ 2030 جىلعا قاراي قازاقستاندا ەلەكتر ەنەرگياسىنىڭ تاپشىلىعى بولاتىنىن ايتىپ: «قازاقستانعا اەس كەرەك»، - دەپ سويلەدى. «الەمدىڭ تاجىربيەگە ساي ءتيىمدى شەشىم بار. ول – بەيبىت اتوم. وڭاي شارۋا ەمەس. سوندىقتان، سان الۋان بولجام مەن ەموتسياعا جول بەرمەي، ۇتىمدى شەشە ءبىلۋىمىز كەرەك»، - دەدى.

ال قىركۇيەكتىڭ اياعىندا وتكەن 17-ءشى قازاقستان-رەسەي وڭىرارالىق فورۋمىندا رەسەي پرەزيدەنتى اەس ماسەلەسىن قايتا كوتەرىپ: «اەس سالۋ ماسەلەسىندە قولداۋ كورسەتۋگە دايىنبىز»، - دەپ مالىمدەدى.

وسىعان قاتىستى ساياساتتانۋشى سانجار بوقاەۆ: «پۋتين: «بالقاشتا اەس سالۋ كەرەك»، - دەپ ەكى-ءۇش مارتە ۇسىنىس جاساعان بولاتىن. ونى توقاەۆ مىرزا تاپسىرما العانداي، ءىلىپ الا جونەلدى. سوسىن، پۋتين جولبارىس پوپۋلياتسياسىن قالپىنا كەلتىرۋگە كومەكتەسۋگە دايىن ەكەنىن دە ايتىپ ءوتتى. ال وسى جوباعا قازاقستان 415 مىڭ گەكتار جەردى ءبولىپ قويعان. نەگىزى بۇل 4-5 مەملەكەتتىڭ جەرىنە ءتان اۋماق. مەنىڭ ويىمشا، نازار اۋداراتىن ماسەلە – اەس تە، جولبارىس ءوسىمى دە ءدال بالقاشقا كەلىپ تىرەلىپ تۇر. رەسەي پرەزيدەنتى ءپۋتيننىڭ بىردەڭەنى ءبىلىپ، ءبىزدىڭ بىلمەيتىنىمىز بار سياقتى.

ەندى كارتانى اشىپ قاراڭىز، بالقاش پەن بايقوڭىر ءبىر دەڭگەيدە ورنالاسقان. قاراپايىم 5 سىنىپتىڭ گەومەترياسىنان بىلەتىنىمىزدەي، ءبىر سىزىقتى وتكىزۋ ءۇشىن ەكى نۇكتە قاجەت. ءدال وسى ماسەلە بويىنشا ۇلتتىق قاۋىپسىزدىك كوميتەتى جاقسىلاپ تالداپ، ءوز باعاسىن بەرەدى دەپ سەنەمىن»، - دەيدى.

وسىعان دەيىن WWF باعدارلاماسىنىڭ وا بويىنشا ديرەكتورى گريگوري مازمانيانتس تۇران جولبارىسىن ءتىرىلتۋ ءۇشىن قازاقستان بيۋدجەتىنەن قوماقتى قاراجات قاجەت ەكەنىن ايتقان ەدى. سوما – 14 ملرد تەڭگە شامالاس بولعان.

«قاراجاتقا كەلسەك، ءبىزدىڭ ۇكىمەت جەردى پايدالانۋعا 120 ملن تەڭگەنى ءبولىپ، ونى يگەرىپ العان. ەندى كەلەسى جىلدارعا تاعى 14 ملرد تەڭگە بولمەكشى. بۇل جەردە ماعان قىزىقتىسى – حالىقتى ويلاماعان بيلىك، ەندى جولبارىستى ويلاپ قالىپ پا؟»، - دەيدى ساياساتتانۋشى سانجار بوقاەۆ.

بوقاەۆ مىرزا ءوز ساراپتاماسىندا سوڭعى جىلدارى قازاقستاننىڭ ءىرىلى-ۇساقتى شەندىلەرىنىڭ رەسەي پرەزيدەنتىنەن ءتۇرلى ماراپاتتار الۋى جيىلەگەنىنە كوڭىل بۇرادى.

«تاعى ءبىر ايتا كەتەتىن ماسەلە – سوڭعى جىلدارى بىزدە شەنەۋنىكتەر ءپۋتيننىڭ قولىنان ماراپات قاعازى نەمەسە مەدال الۋى جيىلەپ كەتتى. بۇل دۇرىس ەمەس. ءبىزدىڭ شەندىلەر ماراپاتتى ءبىزدىڭ مەملەكەت باسشىسىنان العانى دۇرىس. ايتپەسە، ولار قاي مەملەكەت ءۇشىن جۇمىس ىستەپ جاتىر؟ قۇرمەتتى اعايىن، قازاقستاننىڭ شىن مانىندە دوسى جوق. مەملەكەتارالىق قارىم-قاتىناستا ەشقانداي دوستىق بولمايدى. تەك قانا ۇلتتىق مۇددە بولادى. سوندىقتان، ساق بولۋىمىز ءجون. ءبىزدىڭ جەرىمىز، تاۋەلسىزدىگىمىز،  ماڭگى قۇندىلىقتارىمىزدى جوعالتىپ المايىق»، - دەپ تۇيىندەيدى ساياساتتانۋشى.

Abai.kz