امەريكا قۇراما شتاتتارى شەكارانى نىعايتۋعا كومەكتەسۋ اياسىندا تاجىكستان قورعانىس مينيسترلىگىنە 20 جول تالعامايتىن كولىك سىيلادى. اقش-تىڭ دۋشانبەدەگى ەلشىلىگى قۇنى 1,3 ميلليون دوللار تۇراتىن دجيپتەر قورعانىس مينيسترلىگىنىڭ ارنايى كۇشتەرىنە شەكارانىڭ كىرۋگە قيىن ايماقتارىندا وپەراتسيا جۇرگىزۋگە مۇمكىندىك بەرەدى دەپ مالىمدەدى.

5-قازاندا اقش-تىڭ تاجىكستانداعى ەلشىسى دجون مارك پوممەرشايم مەن تاجىكستان قورعانىس ءمينيسترىنىڭ جابدىقتار مەن قولداۋ جونىندەگى ورىنباسارى، گەنەرال-مايور حۋسراۆ بوبوزودا جەڭىل كوپ ماقساتتى كولىكتەردى تاپسىرۋ راسىمىنە قاتىستى.

"بۇل وتەۋسىز كومەك شەكارا قاۋىپسىزدىگىن قامتاماسىز ەتۋ ءۇشىن تاجىكستانعا كورسەتكەن قولداۋىمىزدىڭ ءبىر مىسالى. ءبىز تاجىكستانعا شەكارا قاۋىپسىزدىگى سالاسىنداعى تىعىز ىنتىماقتاستىق ءۇشىن ريزامىز جانە بىرلەسكەن جەتىستىكتەرىمىزبەن ماقتانامىز. ءبىز تەرروريزممەن، ەسىرتكى بيزنەسىمەن جانە يادرولىق قارۋدىڭ تارالۋىنا قارسى كۇرەستە سەرىكتەس بولىپ قالا بەرەمىز. ءبىز بىرگە جۇمىس ىستەگەندە مىقتى بولامىز", - دەدى اقش ەلشىسى.

1992 جىلدان بەرى امەريكا قۇراما شتاتتارى تاجىكستانعا 330 ميلليون اقش دوللارى كولەمىندە اسكەري كومەك كورسەتكەن.

Abai.kz