«سپۋتنيك V» ۆاكتسيناسىن العان فينندەر باسقا ۆاكتسينا الماعاندارىنا وكىنەتىن بولىپ شىقتى. بۇل رەسەيلىك ۆاكتسينانى العاندىقتان، وزگە ەلدەرگە پتر تەستسىز شىعۋ مۇمكىن ەمەس بولعاندىقتان ورىن العان جاعداي. رەسەيلىك ۆاكتسينالار ددسۇ ستاندارتىنا ساي دەپ تانىلماعاندىقتان، الەمدە مويىندالعان جەتى ۆاكتسينانىڭ قاتارىنا كىرمەيدى. سايكەسىنشە رەسەيلىك ۆاكتسينانى العان ادامدارعا شەكتەۋلەر كوپ. شەتكە شىققاندا ارنايى ۆاكتسينا پاسپورتى مويىندالمايدى. 

«راسىمەن دە رەسەيلىك ۆاكتسينانى العان جاندار ەكىنشى مارتە ونى الماۋدى جوسپارلاپ وتىر»، - دەيدى ۇلتتىق دەنساۋلىق ساقتاۋ جانە الەۋمەتتىك قامسىزداندىرۋ ينستيتۋتىنىڭ باس دارىگەرى حاننا نوحينەك.

«ولار شەكارانى وتۋدە ۇلكەن قيىندىقتارعا تاپ بولۋدا. پتر تەست جاساۋعا ءماجبۇر، سوندىقتان رەسەيلىك ۆاكتسيناعا دەگەن حالىقتىڭ كوڭىلى قالعان»، - دەيدى ول. اتالمىش ماسەلە تەك قانا ەۋروپا حالقىن ەمەس، سونىمەن قاتار رەسەيلىك تۋريستتەردى دە الاڭداتۋدا. قازىرگى مارشرۋت بويىنشا مىڭداعان رەسەيلىك سەربياعا كەلىپ ددسۇ مويىنداعان ۆاكتسينانى الىپ، ارتىنشا الاڭسىز قىدىرۋعا شىعاتىن بولعان.

«سپۋتنيك» ۆاكتسيناسى ەۋروپالىق قاۋىمداستىق كەڭىستىگىندە مويىندالماعان، سەبەبى ونى ساتۋعا رۇقسات ەتىلمەگەن. قازىرگى تاڭدا ەۋروپالىق ءدارى قورى ۆاكتسينالاردى شىعارۋ ورىندارىن تالاپقا سايلىعى بويىنشا تەكسەرۋدە، ونىڭ ىشىندە رەسەيلىك ۆاكتسينا دا بار.

رەسەيلىك ۆاكتسينانىڭ مويىندالۋىنا ءالى كوپ ۋاقىت كەرەك. 15 قىركۇيەك كۇنى رەسەيدەگى تەكسەرىس بارىسىندا ددسۇ ينسپەكتورلارى ۆاكتسينانى مويىنداۋ پروتسەسىن بەلگىسىز ۋاقىتقا دەيىن توقتاتتى. سەبەبى ۆاكتسينا شىعاراتىن ورىن حالىقارالىق تالاپتارعا ساي ەمەس بولىپ شىققان.

قازىرگى ۋاقىتتا فينليانديادا قانشا ادامنىڭ رەسەيلىك ۆاكتسينا العانى جايلى ناقتى اقپارات جوق. رەسەيدەگى تۋىستارىنا بارىپ، ۆاكتسينا العان فينندەر جەتەرلىك. سوندىقتان قانشا ادام رەسەيلىك ۆاكتسينا العانى ناقتى ايتىلماۋدا. ەۋروپا ەلدەرىنىڭ ىشىندە ۆەنگريا رەسەيلىك ۆاكتسينانى مويىنداپ، العاش بولىپ ساتىپ العان ەلدىڭ ءبىرى. ولار ەۋروپالىق قاۋىمداستىقتىڭ تالاپتارىن مويىنداماستان، ماسكەۋدىڭ ءونىمىن الۋعا كەلىسكەن. الايدا جاڭا تالاپتارعا ساي ەندى ۆەنگريا حالقى سىرتقا شىعۋ ءۇشىن قوسىمشا پتر تەستتەر جاساتۋعا ءماجبۇر بولۋدا.

رەۆاكتسيناتسيا پروتسەسىندە فينندەر رەسەيلىك ۆاكتسينادان تولىق باس تارتىپ، حالىقارالىق ۆاكتسينالاردى الۋعا نيەتتەنىپ وتىر. مىسالى «استرازەنەكا» العان كوپشىلىك ەندىگى تاڭدا «پفايزەر-بيونتەك» الۋعا شەشىم قابىلداعان.

بۇل ماسەلە تەك قانا فينندەرگە ءتان ەمەس. قازاقستان حالقىنىڭ باسىم كوپشىلىگى رەسەيلىك «سپۋتنيك V» ۆاكتسيناسىن العان. فينليانديا حالقىندا قانداي قيىندىقتار تۋىنداسا، قازاقستان حالقىندا دا تۋرا سونداي قيىندىقتار بار. 10 ملن دوزا «سپۋتنيك» ساتىپ العان قازاقستان بيلىگى، حالىقارالىق سەرتيفيكاتى جوق ونىممەن ەلدىڭ باسىم كوپشىلىگىن ۆاكتسيناتسيالادى. ەندىگى تاڭدا ول ازاماتتار سىرتقا شىعۋ ءۇشىن قوسىمشا پتر وتكىزىپ، شىعىنعا باتۋعا ءماجبۇر.

اسحات قاسەنعالي

Abai.kz