ولار جۇمىس بەرۋشىنىڭ جالاقىنى كەشىكتىرىپ جاتقانىنا شاعىمداندى. ودان بولەك، زەينەتاقى جارناسىنىڭ دا ۋاقىتىندا تۇسپەي وتىرعانىن ايتتى.

"ايلىق كەشىگىپ جاتىر. زەينەتاقى جارناسىنىڭ تۇسپەگەنىنە التى اي بولدى. وسى ماسەلەلەردى كوتەرىپ جينالىپ وتىرمىز. ايلىقتان 22 پايىز ۇستالىپ جاتىر. بىراق ولاردىڭ ەشقايسىسى تۇسپەگەن. اۋرۋحاناعا بارساق، قابىلدامايدى" دەدى جاناربەك مارات ەسىمدى جۇمىسشى.

نارازىلاردىڭ سوزىنە قاراعاندا، ادەتتە ولارعا جالاقى ءار ايدىڭ ونىندا ءتۇسۋى ءتيىس. بىراق وتكەن ايدا 10-15 كۇنگە كەشىگىپ بەرىلگەن. "بۇل جاعداي وسى ايدا دا قايتالانايىن دەپ وتىر" دەيدى ولار.

"سونىڭ سالدارىنان نەسيە وتەي الماي وتىرمىز. ءبارىمىزدىڭ نەسيەمىز بار. بالا-شاعامىز بار. پاتەراقى تولەۋ كەرەك. الىستان كەلىپ ىستەپ جاتىرمىز. قىس بولسا، تاقالىپ تۇر. قايدا باراسىڭ؟" دەيدى جۇمىسشىلاردىڭ ءبىرى.

جۇمىسشىلار ايلىق ماسەلەسى بۇگىن ءبىرىنشى كوتەرىلىپ تۇرماعانىن، بۇعان دەيىن دە وسىنداي ماسەلە تۋىنداعانىن ايتادى. نارازىلىق كەزىندە كەي جۇمىسشىلار "ەڭ جوعارعى قاباتتا ترۋبا كەسەمىز، ارنايى كيىم بەرىلمەيدى، سۋىق ءوتىپ جاتىر" دەپ شاعىمداندى.

سالدەن سوڭ وقيعا ورنىنا WMG وكىلى كەلىپ، ايلىقتىڭ جۇماعا دەيىن تۇسەتىنىن ايتتى. ال زەينەتاقى جارناسى جونىندە سۇراعان كەزدە ء"بارى ءتۇسىپ جاتىر، جەكەلەگەن ماسەلە بولۋى مۇمكىن" دەدى.

وقيعا ورنىنا قالالىق ەڭبەك ينسپەكتورى ماقسات دۇيسەنوۆ تە كەلدى. ول جۇمىسشىلارعا ماسەلەلەرىن حاتقا ءتۇسىرىپ، وتكىزۋ قاجەتتىگىن ايتتى.

"جاڭا كەڭسەگە كىرىپ، ءبىلدىم. سىزدەرگە قىركۇيەك ايىنىڭ جالاقىسىن كەشىكتىرىپ جاتىر. ول ارينە زاڭسىز. سول سەبەپتى وسى ماسەلەنى شەشۋ ءۇشىن، بۇل كومپانياعا قانداي دا ءبىر شارا قولدانۋ ءۇشىن سىزدەردەن ءوتىنىش كەرەك. قازىر ءبىر بەت قاعاز الىپ، ارىز-وتىنىشتەرىڭىزدى جازۋلارىڭىز كەرەك. ماسەلەردى سانامالاپ كورسەتىڭىزدەر. اتى-جوندەرىڭىزدى جازىپ، قولدى قويىپ وتكىزىڭىزدەر. كورسەتىلگەن فاميليالار بويىنشا شارا قابىلدايمىز. قازىر مۇندا قۇر بوسقا تۇرماڭىزدار، جۇمىسقا ورالىڭىزدار" دەدى.

نارازىلاردىڭ ايتۋىنشا، كومپانيادا شامامەن 200-گە تارتا جۇمىسشى بار. بىراق ولاردىڭ كوبى "قورىققاندىقتان، جۇمىستان شىعىپ قالامىن با دەپ سەسكەنگەندىكتەن" شاراعا كەلمەگەن. كومپانيا وكىلدەرىنىڭ "جالاقى جۇماعا دەيىن بەرىلەدى" دەگەن ۋادەسىن ەستىگەن كەي نارازىلار تاراپ جاتتى.

2009 جىلى پرەزيدەنت نۇرسۇلتان نازارباەۆ قاتىسۋىمەن قۇرىلىسى باستالعان, ورتالىق ازياداعى "ەڭ بيىك عيمارات بولادى" دەلىنگەن كەشەن العاش رەت داۋعا ىلىگىپ وتىرعان جوق. بيىل ماۋسىمدا "قازاقستان قۇرىلىس تەحنو" جانە "قازينجينيرينگ" كومپانيالارىنىڭ جۇمىسشىلارى جالاقىنىڭ كەشىكتىرىلۋىنە نارازىلىق بىلدىرگەن. بىلتىر كەشەندى سالىپ جاتقان قۇرىلىسشىلار جالاقى ءوسىرۋدى جانە ەڭبەك جاعدايىن جاقسارتۋدى تالاپ ەتىپ، نارازىلىققا شىققان.

2017 جىلى قىركۇيەكتە "ابۋ-دابي پلازادا" جەرگىلىكتى جانە شەتەلدىك جۇمىسشىلار توبەلەسكەن. قازاقستان بيلىگى توبەلەستى "تۇرمىستىق جانجال" دەپ، ەكى ادامنىڭ جاراقاتتانعانىن حابارلاعان.​

Abai.kz