قازiرگi قازاق جۋرناليستيكاسىنىڭ جەتپiس-سەكسەن پايىزىن قازاق قىزدارى قۇراپ وتىر! دەمەك قازاق جۋرناليستيكاسىنىڭ كوشiن باستاعان ەر ازاماتتاردىڭ iسiن قازاق قىزدارى جالعاپ كەلەدi دەگەن ءسوز. قوعامنىڭ ءۇنi مەن كوزi ءھام قۇلاعىنا اينالعان بۇگiنگi باق-تا قاراكوز قىزدارىمىز قوعامدىق ماسەلەلەرگە ءۇن قاتىپ، وزiندiك ويىن، وزiندiك كوزقاراسىن ايقىن، ءارi اشىق بiلدiرiپ كەلەدi. وسى ماسەلەگە قازاق جۋرناليستيكاسىندا ءوز قولتاڭبالارى بار ەر ازاماتتاردىڭ كوزقاراسىن بiلگiمiز كەلگەن ەدi.

- ءبىر كەزدەرى جۋرناليستيكا فاكۋلتەتىنىڭ دەكانى بولعان تاۋمان اماندوسوۆ اعامىز «قىزداردان جۋرناليست شىقپايدى» دەگەن پىكىرمەن قىزداردىڭ جۋرناليستيكا ماماندىعىن تاڭداۋىنا قارسى بولعان ەكەن. بۇگىنگى قازاق جۋرناليستيكاسىنىڭ كوش باسىندا كوبىنە قازاق قىزدارى ءجۇر. ءسىز قازاق قىزدارىنىڭ جۋرناليستيكاسىنا قالاي باعا بەرەر ەدىڭىز؟

ەرجۇمان سمايىل،
پۋبليتسيست:

- قىزدار وتباسىن قۇرۋ كەرەك. جۋرناليستيكادا جۇرسە، كومانديروۆكاعا شىعادى، ءتۇرلى قيىندىقتار كەزدەسەدى. سوعان بايلانىس­تى، تاۋمان اعا قارسى بولعان شىعار. قازىرگى قىزداردىڭ بەتالىسى جامان ەمەس. «لەنينشىل جاس» گازەتىندە جۇمىس ىستەپ جۇرگەن كەزدە، كورشى «لەنينسكايا سمەنا» گازەتىندە كوپشىلىگى قىز بالالار جۇمىس ىستەيتىن. سولارعا قاراپ، قىزداردان دا جۋرناليست شىقسا بولادى ەكەن عوي دەپ ويلايتىن ەدىك. قازىر قازاق جۋرناليستيكاسىندا قىزدار كوبەيىپ كەلەدى. ءبىر كەزدەرى مەكتەپتە كىلەڭ ەر مۇعالىمدەر بولعان. مۇعالىمدىكتىڭ ءبارىن كەيىن ايەلدەر الدى. ءبىر كەزدەرى دارىگەردىڭ دەنى ەركەك بولاتىن. قازىر بۇل سالادا ايەلدەر كوبەيدى. سوندىقتان جۋرناليستيكا سالاسىندا دا ايەلدەر كوبەيە بەرسە، ونىڭ ەشقانداي زيانى جوق. مەنىڭ وعان ەش قارسىلىعىم دا جوق. «ەگەمەن قازاقستان» گازەتىندە جۇمىس ىستەپ جۇرگەنىمدە، قىزداردى جۇمىسقا كوبىرەك الۋعا تىرىساتىن ەدىم.

ديداحمەت اشىمحانۇلى،
جازۋشى:

- راس، كەزىندە جۋرناليستيكا فاكۋل­تەتىنىڭ ءبىر دەكانىنىڭ «قىزداردان جۋرناليستيكا شىقپايدى» دەگەنىن ءوز اۋزىنان ەستىگەنبىز. ول كىسى ساباق بەرىپ وتىرعان كەزدىڭ وزىندە: «اينالايىندار، ەرتەرەك ورىندارىڭدى تاۋىپ الىڭدار. ءتىل-ادەبيەتكە اۋىسىپ كەتىڭدەر. سەندەردەن جۋرناليست شىقپايدى»، - دەپ كۇلىپ قويىپ وتىراتىن. مەن ءوز باسىم، العاشقى كەزدە سول كىسىنىڭ سوزىندە جان بار دەپ ويلايتىن ەدىم. ونىڭ سەبەبى، ءبىز جۋرناليستيكاعا ارالاسا باستاعان 70-80-جىلداردىڭ ىشىندە، راسىندا قىزداردان سۋىرىلىپ العا شىعىپ كەرەمەتتەي تانىلعان قىزدار وتە از بولدى. ولاردىڭ قاتارىندا ماعيرا قوجاحمەتوۆا، جۇماگۇل سولتيەۆا، ءشاربانۋ بەيسەنوۆا سياقتى ساناۋلى قىزدارىمىز بولدى. كەشىرىڭىزدەر، قازاقتىڭ ماقالى عوي، «بايتال شاۋىپ بايگە الماس دەگەن»، جۋرناليستيكا بايتال شاباتىن بايگە ەمەس دەپ ويلايتىن ەدىك. 90-جىلداردان باستاپ، ەل تاۋەلسىزدىك العاننان كەيىن جانە جۋرناليستەرگە ەركىندىك بەرىلگەننەن سوڭ، بۇل پىكىردىڭ قاتە ەكەنىنە كوزىمىز جەتە باستادى. مەنىڭ ويىمشا، جالپى، ءجۋرناليستى، قوعام قايراتكەرىن، جازۋشىنى ادام ەمەس، قوعام تۋدىرادى، قوعامدىق جاعداي تۋدىرادى. سەبەبى رۋح كىمدە بولسا، جۋرناليستيكا سونىڭ قولىندا! كىمنىڭ رۋحى مىقتى بولسا، سول مىقتى جۋرناليست. ءبىز جۋرناليستيكاعا كەلگەن ۋاقىتتا، بىزگە كوپ ەركىندىك بەرىلگەن جوق. بىزگە وتە مادەنيەتتى سويلەۋگە تۋرا كەلدى. سۇراقتى دا مادەنيەتتى قويعىزاتىن. ارينە، ونىڭ سەبەبى، جەلكەمىزدە جەتى كوز تۇردى. ورتالىق پارتيا كوميتەتى قاداعالاپ وتىردى. سوندىقتان ءبىز كۇشىگىمىزدەن تالانىپ قالعان ەدىك. جۋرناليستەردىڭ توقسان پايىزى ەر ازاماتتار بولدى. جارتى جاسى كەڭەستەر وداعىندا وتكەن ادامداردىڭ رۋحىمىز ءسال پاسەڭدەۋ بولعانى راس. قازاق حالقى قىز بالانى ەركىن تاربيەلەپ وسىرگەن. كىم نە دەسە، و دەسىن، ءبىزدىڭ ورتا ازيا حالىقتارىنىڭ ىشىندە قازاقتاي قىزىنا ەركىندىك بەرگەن، قازاقتاي قىزىن ماپەلەپ وسىرگەن، قازاقتاي رۋحىن باسپاي وسىرگەن حالىق جوق. سونىڭ ناتيجەسىن 90-جىلدارى قىزداردان كوردىك. قىزداردىڭ رۋحى مىقتى. ويىنداعىسىن اشىپ ايتادى، ويىنداعى سۇراعىن قويادى. جۋرناليستيكاعا ەڭ كەرەك قاسيەت تە وسى. ەر ازاماتتاردىڭ بويىنان تابىلماعان بۇل قاسيەت ءبىزدىڭ قىزدارىمىزدىڭ بويىنان تابىلدى. قازىرگى ۋاقىتتا، الىسقا بارماي-اق قويايىن، ءبىزدىڭ «تۇركىستان» گازەتىنىڭ نەگىزگى تىرەگى بولىپ وتىرعان، اينالايىن، مەنىڭ قارىنداستارىم! مەن ولارعا قاي ۋاقىتتا دا وتە ۇلكەن قۇرمەتپەن ءارى سەنىممەن قارايمىن. بۇل - ابدەن وزدەرىن تانىتقاننان كەيىن، مەنىڭ ولاردى مويىنداۋىم. مەن ماسەلەن وتە سيرەك جازام. ۇزاق ويلانام، ۇزاق دايىندالام. وقىعاندارىمنىڭ ءبارىن ساراپقا سالىپ وتىرىپ جازام. ونداي قيمىلمەن قازىرگى جۋرناليستيكا كەرەمەتتەي كوگەرىپ كەتەدى دەپ ويلامايمىن. قازىرگى جۋرناليستيكادا تاڭەرتەڭ ءبىر جەردەن سۇحبات الساڭ، كەشكىسىن گازەتكە بەرۋىڭ كەرەك. قىزداردىڭ بويىنان مەن وسىنى كورەم. سوندىقتان دا رۋح كىمدە بولسا، جۋرناليستيكا سونىڭ قولىندا. قازىرگى ءبىزدىڭ قىزدارىمىزدىڭ بويىندا رۋح بار! اينالايىنداردىڭ رۋحى مىقتى بولسىن!

قالي سارسەنباي،
«الماتى اقشامى» گازەتىنىڭ
باس رەداكتورى:
- تاۋمان اعا كوركەم، عاجاپ ادام ەدى. بۇل كىسىدەن ءتالىم-تاربيە الدىق. ۇستازدار كوپ قوي ومىردە. ۇستازدىڭ ىشىندە ۇستازى بولادى. تاۋمان اعا سونداي ادام ەدى. سول زاماننىڭ كوزىمەن، سول زاماننىڭ ۇستانىمىمەن ايتقان پىكىرى بولۋى كەرەك دەپ ويلايمىن. مۇسىلمان عۇرپىندا ايەل زاتىنا قويىلاتىن كەيبىر شەكتەۋ­لەر بار. سول تۇرعىدان ايتىلعان دا شىعار. ۋاقىت وتە كەلە، ول پىكىر ءوزىن-ءوزى اقتاعان جوق. بىراق ۇستازدىڭ سول سوزىندە دە شىندىق بولاتىن. كوپ كورگەندىكتەن، كوپ وقىعاندىقتان وسىلاي ايتقان بولۋى كەرەك. بۇگىنگى كۇننىڭ كوزقاراسىمەن ايتار بولساق، قازاق قىزدارىنىڭ قالام ۇستاعان قازاق جىگىتتەرىنەن دە وزىپ كەتكەن جاعدايى بار. مۇنى ءبىز كۇندەلىكتى ومىردە كورىپ وتىرمىز. باسقانى ايتپاعاننىڭ وزىندە، ءبىر عانا «تۇركىستان» گازەتىنىڭ تىلشىلەرىن ايتۋعا بولادى. جۋرناليستيكا جىنىستى تاڭدامايدى. ول قۇداي بەرگەن دارىنىنىڭ ارقاسىندا جۇزەگە اساتىن دۇنيە. «قىز بالادان جۋرناليست شىقپايدى، ەر بالادان شىعادى» دەۋ قيسىنسىز نارسە. بۇگىندە قىز بالالاردىڭ وزىنشە ءبىر شوعىرى قالىپتاستى. ونى مويىنداۋىمىز كەرەك.

ساپارباي پارمانقۇلوۆ،
«نۇر مەديا»
باسپا ءۇيىنىڭ ديرەكتورى،
«دالا مەن قالا»
گازەتىنىڭ باس رەداكتورى:

- قازاق جۋرناليستيكاسىنىڭ كوش باسىندا كوبىنەسە قىزدار ءجۇر دەگەن پىكىرمەن كەلىسۋ قيىنداۋ بولاتىن شىعار. جالپى، مۇنداي فەمينيستىك پيعىلداعى سۇراقتى قويماس بۇرىن، كوپ ويلانۋ كەرەك پە ەدى؟.. تاۋمان اقساقال كورەگەن ەكەن، ول تەك جۋرناليستيكاعا قىزداردىڭ كوپتەپ كەلۋىنەن قورىقپاعان ەكەن، جالپى ۇلتتىڭ ازىپ-توزۋىنان ساقتاندىرعان ەكەن. ايەل - ۇلتتىڭ ۇيىتقىسى، وتباسى تىرەگى، بولاشاق تاربيەشىسى. ال قىزمەت قۋعان ايەل وسى قاسيەتتەرىنەن بىرتىندەپ الىستايتىنىن ۋاقىت ءوزى دالەلدەپ وتىرعان جوق پا؟! مىنە، ۇستازىمىز وسىنى مەڭزەگەن بولار. ايتپەسە، بەس-التى ءسوزدىڭ باسىن قۇراپ ماقالا جازۋ مەن وپا-دالاپتانىپ الىپ، جىلتىر كويلەكپەن ەكرانعا شىعا سالۋ جىنىس تالعامايدى... راس، جالپى ۇلت تالانتتى بولعاسىن، ونىڭ ۇلى دا، قىزى دا ونەرلى بولۋى زاڭدى. ەندەشە ۇل دا، قىز دا ۇلتقا ەتكەن قىزمەتى ءۇشىن باعا دامەتپەۋى كەرەك. ال جۋرناليستيكاداعى ارىپتەس اپا-قارىنداستارىمدى مەرەكەمەن شىن جۇرەكتەن قۇتتىقتايمىن!

نۇرتورە ءجۇسىپ،
«ايقىن» گازەتىنىڭ باس رەداكتورى:
- تاۋمان اماندوسوۆ اعامىز قازاق قىزدارىنان جۋرناليست شىقپايدى دەگەن جوق. ول كىسى بۇل ماماندىقتىڭ قىز بالالارعا اۋىر تيەتىندىگىن ايتسا كەرەك. قىز - بولاشاق انا. جالپى، جۋرناليستيكا مامانى ۇنەمى اقپارات جيناۋ ءۇشىن جولساپاردا جۇرەدى. مىنە، تاۋمان اعا وسى جاعىنا الاڭدادى. ال بىراق قازاق جۋرناليستيكاسىندا قازاق قىزدارىنىڭ الاتىن ورنى ەرەكشە. قازىر اقپارات قۇرالدارىنىڭ ىشىندە تەلەارنانى باسقارىپ وتىرعاننىڭ كوبى - قازاق قىزدارى. «قازاقستان» ۇلتتىق تەلەارناسىنا نۇرجان مۇحامەدجانوۆا، «استانا» تەلەارناسىنا ءلاززات تانىسباي، «7-ارناعا» بيبىگۇل جەكسەنباي، «ەلارناعا» ايگۇل مۇكەي، «ستۆ» ارناسىنا ايگۇل ەشمۇحامەدوۆا باسشىلىق ەتەدى. سوندىقتان جۋرناليستيكادا قىزداردىڭ قاتارى كوبەيدى جانە قارقىن الىپ كەلەدى. ودان جۋرناليستيكا قىز-قىرقىن جۋرناليستيكا بولىپ كەتتى دەپ قورىقپاۋ كەرەك. وتكىر جازاتىن ەر ازاماتتار دا پايدا بولاتىن شىعار دەپ ويلايمىن.

جۇسىپبەك قورعاسبەك،
«جاس وركەن» جشس-ءنىڭ پرەزيدەنتى:

- ءدال وسى ماسەلە اقپارات قۇرالىنىڭ جەتەكشىسى رەتىندە كوپتەن بەرى مازالاپ ءجۇر. كەزىندە كەڭەس زامانىندا «مەكتەپتەردە قىز-كەلىنشەك مۇعالىمدەر كوبەيىپ كەتتى، بالالاردىڭ ءبارى قىزمىنەزدى بولىپ بارادى» دەگەن ماسەلە كوتەرىلگەن. ءتىپتى وداقتىق باسپاسوزدە ايتىلدى. بىراق ايتىلعان ءسوز سول كۇيىندە قالدى. ودان كەيىن مەكتەپتەردە ەر ازاماتتاردىڭ كوبەيىپ كەتكەنىن كورگەن جوقپىز. جۋرناليستيكا فاكۋلتەتىن بىتىرگەننەن كەيىن بۇرىنعى «لەنينشىل جاس» گازەتىنە ءتىلشى بوپ ورنالاستىم. سول كەزدە قۇرىلىسشىلارمەن بىرگە «گوريزونت» دەگەن جاتاقحانادا جاتتىم. وڭكەي ساۋسىلداپ ەركەك جۇرەمىز. ءبىزدىڭ تاربيەشىمىز: «جىگىتتەر تەمەكى شەگىپ، اراق ءىشىپ، توبەلەسكە ءۇيىر بولدى. «1 ماي» تىگىن فابريكاسىندا قىزدار جۇمىس ىستەيدى. بۇيتسەڭىزدەر، سىزدەر قالاي تانىسىپ، قالاي وتباسى بولاسىزدار؟» دەپ تىگىن فابريكاسىنا كەزدەسۋگە باراتىندىعىمىزدى ايتتى. باردىق. شىنىندا دا، كىلەڭ قاراكوز قىزدار. ءسويتىپ، بەلگىلى ءبىر تاقىرىپتى بەلگىلەپ، پىكىرتالاس ۇيىمداستىراتىن ەدىك. سودان كەيىن ءبىز قىزداردى شاقىردىق. بالكىم، سودان سوڭ ءبىرلى-جارىم قىز-جىگىتتەر تانىسىپ، ۇيلەنگەن شىعار. ءالى ەسىمدە، قازىرگى وڭتۇستىك قازاقستان وبلىسىنىڭ جەتىساي اۋدانىنان كەلگەن مۇسا اتتى جىگىت قۇرىلىستا ىستەدى. ونىڭ ءتىپتى وقۋعا دا تۇسەتىن ويى جوق ەكەن. بار بولعانى «شاشى ۇزىن قىز ىزدەپ ءجۇرمىن» دەپ جاۋاپ بەردى. «شاشى ۇزىننىڭ» ىشىنە ءبارى كىرەدى عوي. بىراق ول ءوز ويىنداعى قىزدى تاپپاي، ءبىر ايدان كەيىن اۋىلىنا قايتىپ كەتتى.
سول سياقتى قازىر جۋرناليستيكادا 80 پايىز قىزدار ىستەيدى. ءتىپتى كەيبىر ۇجىمدا 90 پايىزعا جەتەدى. گازەت، جۋرنال جامان شىعىپ جاتقان جوق. ماقالانىڭ اششىسىن دا، ءتاتتىسىن دە، ءوتىمدىسىن دە، وتكىرىن دە سول قىزدار جازىپ جاتىر. اسىرەسە، سوڭعى ون شاقتى جىلدىڭ كولەمىندە قىزداردىڭ كەرەمەت تولقىنى پايدا بولدى. قوعامي ويدىڭ الدىندا پىكىرتالاستىرىپ جۇرگەن، ماقالالارىمەن قوزعاۋ سالىپ جۇرگەن دە - قىزدار. ءتىپتى قازاقتىلدى جۋرناليستەر قىزداردى ورىستىلدىلەردىڭ وزدەرى مويىنداعانىن كورىپ تاڭقالدىم. ولاردى جۋرناليستەر وداعىنىڭ توراعاسى سەيىتقازى ماتاەۆ تا وتە جاقسى بىلەدى. سەبەبى قىزدار تىنىم تاپپايدى. وڭى مەن سولىنا قاراماي، سىناپ تاستايدى. بىرەۋدەن پىكىر الىپ، ەكىنشىسىن سۇحباتقا شاقىرادى. سوسىن ولاردىڭ ءبىر جەردە جاريالانعان پىكىرىنە سول زاماتتا پىكىر بىلدىرە قويادى. وسىنىڭ ءبارى قىزدارعا قوعامنىڭ نازارىن اۋداردى. ال جۋرناليستيكاداعى ەر ازاماتتاردا ونداي ىلكىمدىلىك مۇلدەم جوق دەۋگە بولادى. سەبەبى تاپسىرما بەرىپ، قايتا-قايتا تەلەفون شالىپ جاتساڭ دا، جازدىرا المايسىز. نەگە ەكەنى بەلگىسىز، جۋرناليستيكاداعى ەر ازاماتتار ميمىرت. قىزدار بولاشاق انا، جالپى، ايەل زاتى بولعاننان كەيىن بە، قوعامداعى اششى-تۇششى جاعدايدىڭ بارىنە ءبىرىنشى بوپ ءۇن قاتادى. جۋرناليستيكاداعى قىزداردىڭ ءتىلى وتە ءوتىمدى، تارتىمدى. ءبىر ايتسا ءدوپ ايتادى، ناقتى ايتادى. بىراق وعان قاراپ، مەكتەپتەردەگىدەي گازەت-جۋرنالدارىمىز قىزمىنەزدى بولىپ كەتتى دەۋدىڭ قاجەتى جوق. ويتكەنى جەلتوقسان كوتەرىلىسىنىڭ «جەلتوقسان» بولعانى قىزداردىڭ قايراتىنىڭ ارقاسى! سەبەبى، ەكى كۇن بويى سول توپتىڭ ىشىندە بولىپ، قىزداردىڭ كەتىپ بارا جاتقان جىگىتتەرگە: «جىگىتتەر، نامىستارىڭ قايدا؟ ءبىز قالىپ بارا جاتىرمىز عوي...» دەپ ايقايلاعانىن ەستىدىم، كوردىم. سول الاڭداعان جاناشىر داۋىس ءالى كۇنگە گازەت-جۋرنالداردان ەستىلىپ تۇراتىن سياقتى. قىزداردىڭ سول داۋسى جۋرناليستيكادان ەستىلىپ وتىرادى. ءورىستىلدى باسىلىمداردا ونداي جوق. ولاردى اشساڭىز، جامان سۋرەتتەردى جارقىراتىپ، ادام ۇيالاتىن تاقىرىپتاردى كوتەرىپ جاتادى. ال ءبىزدىڭ قىزدار نەگىزىنەن الەۋمەت، قوعام، ۇلت ماسەلەلەرىن قوزعايدى. مۇنىڭ ءبارى قوعامعا انىق، اششىراق ەستىلىپ، قوعام وعان قۇلاق ءتۇرىپ، نازار اۋداراتىن سەكىلدى. ءبىر الاڭدايتىنىم، ءبىزدىڭ كوپتەگەن جۋرناليست قىزدىرىمىز بويداق بولىپ قالادى. ولار وتباسى قۇرىپ، بالا ءسۇيۋ كەرەك قوي. سونداي جۋرناليستيكادا ءوزىن-ءوزى قامشىلاپ جۇرگەن قىزدار ۇرپاق وسىرسە، جاقسى بالا تاربيەلەر ەدى. مىنە، وسى ماسەلە مەنى عانا ەمەس، باسقالاردى دا الاڭداتادى. ماسەلەن «اق جەلكەن» جۋرنالىن ءۇش قىز شىعارسا، «تۇركىستاندى» دا كىلەڭ قىزدار جارقىراتىپ جاتىر. بۇكىل باق-تى اينالىسقا شىعارىپ جاتقان - قىزدار. قىزداردان زيان شەگىپ جاتقان جوقپىز، بىراق قىزدارعا قارىزدار سياقتىمىز. قازاق جۋرناليستيكاسىنىڭ دامۋىنا قىزداردىڭ قوسقان ۇلەسى كوپ.

سەرىك جانبولات،
«الاش ايناسى» گازەتىنىڭ
باس رەداكتورى:

- تاۋمان اعانىڭ بۇل پىكىرىن قىزدارعا قارسىلىق دەپ ەمەس، تۇرسىنبەك كاكىشەۆتىڭ تىلىمەن ايتساق، «قىزداردىڭ العان وقۋ-ءبىلىمى كوبىنە جايالىقپەن جۋىلىپ كەتەدى» دەگەن ماعىنادا قابىلدايتىن ەدىك. ول كەزدەرى جۋرناليستيكادا قانشاما قىزدار وقۋ بىتىرگەنىمەن، كەيىن اقىرىنداپ، تىرشىلىكتىڭ قام-قارەكەتىمەن، ءومىردىڭ اعىمىمەن كەتىپ قالاتىن ەدى. باسقا سالاعا كەتەدى. بالا-شاعانىڭ قامىمەن كەتىپ قالعاندار دا بولدى. وسى تۇرعىدان ايتىلعان پىكىر بولار دەپ ويلايمىن. ايتپەسە، جۋرناليستيكادا ەش ۋاقىتتا ادامداردى جىنىسقا بولۋگە بولمايدى. بۇگىنگى جۋرناليستيكانىڭ ءوزى دالەلدەپ وتىر مۇنى. «جاس الاش» گازەتى دۇرىلدەپ تۇرعان شاعىندا قانداي تالانتتى قىزدار جۇمىس ىستەدى. «ايقىن» گازەتىندە دە، «تۇركىستان» گازەتىندە دە دارىندى قىزدار جۇمىس اتقارادى. قازاق جۋرناليستيكاسىندا قىزداردىڭ ءرولى تومەن دەپ ايتۋعا كەلىسپەس ەدىم، سوندىقتان. ارينە، قىز بالانىڭ تاۋقىمەتى كوپ ەكەنى راس. وتباسىنىڭ بەرەكەسى ەكەنى راس. ولاردىڭ ەڭ ۇلكەن مىندەتى - انا بولۋ ەكەنى راس. ءارى ول قىزداردىڭ يىعىندا جۋرناليستيكانىڭ اۋىر جۇگى دە تۇر. قىزدارىمىز ودان دا كەندە بولىپ وتىرعان جوق. سوندىقتان بۇگىنگى قوعامداعى قازاق قىزدارىنىڭ جۋرناليستيكاداعى ورنىن ەشكىم جوققا شىعارا المايدى.

عالىمجان مەلدەش،
«قازاق راديوسى»
ديرەكتورىنىڭ ورىنباسارى:

- تاۋمان اعادان ءدارىس العان شاكىرتتەردىڭ ءبىرىمىن. بىزدە پايىزدىق كورسەتكىش، شامامەن الپىس تا قىرىق بولاتىن. تاۋمان اعانىڭ تۇسىندا قىزدارىمىزدان ءبىر توپ مىقتى جۋرناليستەر شىقتى. جۇماگۇل سولتيەۆا، ءاليا بوپەجانوۆا، ءشاربانۋ بەيسەنوۆا سياقتى اپالارىمىز بولدى. باياعىدا ماكسيم گوركيگە ۇستازى: «سەنەن جازۋشى شىقپايدى» دەپ ايتقان ەكەن. سەبەبى ونىڭ مىقتى جازۋشى بولاتىنىن بىلە تۇرا، قامشىلاۋ ءۇشىن ادەيى ايتقان. تاۋمان اماندوسوۆتىڭ شاكىرتى رەتىندە، مەنىڭ دە ويىم وسى. تاۋمان اعا قىزداردى ادەيى قايراپ ايتىپ وتىردى. سوندىقتان، قۇدايعا شۇكىر، قازىر قازاق قىزدارىنىڭ كوبىنىڭ قالامى توسەلگەن. باسپاسوزدە بولسىن، ەلەكتروندى اقپارات قۇرالدارى بولسىن، قىزدارىمىز ەر ازاماتتاردان قالىسپاي، قوعامدىق ماسەلەلەرگە ءۇن قاتىپ كەلەدى.

دايىنداعان
گۇلزينا بەكتاسوۆا،
دينارا مىڭجاسارقىزى

«تۇركىستان» گازەتى