بار بولعانى 45 جىل ءومىر ءسۇرىپ، «ويانباي قالعان» بارد-اقىن تابىلدى دوسىموۆتىڭ ولەڭ-جىرلارى وقىرمانىنىڭ ارقايسىسىنىڭ جۇرەگىن ءالى دە جىلىتىپ ءجۇر. اقىنىن ساعىنعان جۇرتى اتىراۋ مەن الماتى اراسىنداعى شاھارلاردا ءتۇرلى شارالار ۇيىمداستىرىپ، ەسكە الۋمەن كەلەدى.

جۋىردا جۋرناليست ارمان سقابىلۇلى ءوزىنىڭ الەۋمەتتىك جەلىدەگى پاراقشاسىندا تابىلدى دوسىموۆتىڭ بۇرىن جاريالانباعان ولەڭ حاتى تابىلعانىن سۇيىنشىلەدى.

«ابۋباكىر سمايلوۆ ماعان حات جازىپتى. قازاقتىڭ تۇڭعىش بارد اقىنى تابىلدى دوسىموۆتىڭ وسىدان وتىز جەتى جىل بۇرىن ولەڭمەن ورگەن حاتىن تاۋىپ العان ەكەن. تاكەمنىڭ تانىس جازۋى... تانىس ەسىمدەر... دومبىراسىن ساعىنعان بوزبالا... ون سەگىزدەگى تابىلدىڭ ولەڭى قانداي! تۇپنۇسقادان وقىپ كورىڭىزدەرشى!

**** **** **** ****

ارمان!

حات جازۋ ءداستۇرى قالدى عوي. سوندا دا تابىلدى دوستىڭ سارعايعان حاتىن تاۋىپ الىپ، حات جازىپ وتىرمىن. وتىز جەتى جىل بۇرىن گەرمانيادان كەلگەن حاتتاعى 18 جاسار بوزبالانىڭ ويلى دا شىمىر شۋماقتارى جۇرەكتى شىمىرلاتادى. كوپشىلىك تە وقىسىن، سول زاماننىڭ تىنىسى مەن تاكەڭنىڭ ەلگە دەگەن ساعىنىشىن سەزىنسىن دەگەن تىلەك مەنىكى. دوسىمىزدىڭ رۋحى شات بولسىن!

بىزدەر نوكەر بولعاندا سەن - سەرى ەدىڭ،
سەرتتەن تايىپ كەتپەيتىن سەمسەر ەدىڭ!
وتىز جەتى جىلدان سوڭ ورالدىڭ با،
ەسكەرتكىش بوپ ەلىڭە ەڭسەلى ەرىم؟!
ورناتار دەپ ەسكەرتكىش حالقىم بىردە،
ويلادىڭ با جاس داۋرەن، سال كۇندەردە؟!
سالەممەن اۋباكىر»، - دەپ جازدى ارمان سقابىلۇلى.

تابىلدىڭ ولەڭ-حاتى

اۋباكىر، امانسىڭ با؟ مەن دە سول كۇيبىڭ تىرلىك، «سلۋجبا».

كۇندەردى ويلاپ، تۇندەردى ويلاپ بوس وتكەن،
دوڭبەكشيمىن، القىنادى قوس وكپەم.
ويلار، ويلار مەنى جۇلىپ الادى،
كەي تۇندەرى توسەكتەن...

بىلە المادىم، جىرعا قانداي كۇش كەرەك،
كوڭىل قۇرعىر قانداي ايلا ىستەمەك؟!
قارتايعاندا قالام با دەپ قورقامىن،
قارانداشتىڭ ارتىن عانا تىستەلەپ؟..

دومبىرا بار دەپسىڭ. باسقا نە ارمان بار؟ ىشەككە قول تيگىزىپ، كۇڭىرەنتىپ، ءۇن شىعارماي ارماندا ءجۇرمىن... ارمان، بوريادان حات الىپ تۇرامىن. سۆەتقالي، نۇرىم باۋىرجان ء(ۇس.) ت.ب. ءبىز كەتكەن سوڭ كازگۋ-ءدىڭ 50 جىلدىعىندا ايتىسىپتى. بۇل ارماننىڭ ءسوزى.  نۇرىم ەرلەگەن ەكەن دەپ ويلاپ جاتىرمىن. ويعا الدەنەلەر تۇسەدى. (مەن كەتەر ءتۇنى جاتاقتاعى شاعىن وتىرىستى (كۋرستاستارمەن) نۇكەڭ ولەڭ وقىپ ەدى. ەسىمدە جوق. قالعىپ كەتىپ وتىرعانبىز...)

سۆەتقالي جۇرگەن شىعار:

ايتىستا ارقاڭ قوزباس پا،
تۋعاننان كەيىن اداي بوپ.
جەڭىسپەن قايتساڭ ءسوز باسقا،
جەڭىلىپ قالساڭ... (نە داي بوح...), - دەپ...

بۇل جەردە اۋىلدان گورى الماتىنى كوبىرەك ويلايمىن. وسىدان ءبىر جىل بۇرىن اۋىلدا پراكتيكانى اياقتاپ جاتىر ەدىك-اۋ! تەز وتكەن سياقتى.

كەتسەم بە دەيمىن بالا بوپ،
شابادى كوڭىل شالعايعا.
قايدا سول كازگۋ – گورودوك،
الماتى قايدا، ەل قايدا؟!

Abai.kz