نيۋ-يورك فەدەرالدى سوتى مۇحتار ابليازوۆ پەن ءىلياس حراپۋنوۆتىڭ بارلىق نارازىلىقتارىن قابىلداماي، ولارعا ايىپپۇل سانكتسيالارىن سالدى. بۇل تۋرالى قر ادىلەت مينيسترلىگىنىڭ رەسمي سايتى حابارلادى. 

2021 جىلعى 18 قازاندا نيۋ-يوركتىڭ وڭتۇستىك وكرۋگى بويىنشا اقش وكرۋگتىك سوتىنىڭ سۋدياسى ەليسون دج. ناتان م.ابليازوۆ پەن ي.حراپۋنوۆ بەرگەن ءتۇرلى قارسىلىقتاردى قابىلداماي، «بتا بانكى» اق مەن الماتى قالاسى اكىمدىگىنىڭ (بۇدان ارى – بىرلەسكەن تالاپكەرلەر) بىرلەسكەن تالاپ-ارىزى بويىنشا باستالعان سوت قاراۋى كەزىندە زاڭسىز ارەكەتتەرى ءۇشىن ولارعا سانكتسيالار سالدى.

سۋديا ناتاننىڭ شەشىمىندە ابليازوۆ پەن حراپۋنوۆقا سانكتسيالار سالعان اقش ءبىتىستىرۋشى سوتىنىڭ بۇرىنعى بىرنەشە قاۋلىلارى (2019 جىلعى 3 شىلدە، 2019 جىلعى 15 شىلدە، 2020 جىلعى 7 اقپان، 2020 جىلعى 19 مامىر جانە 2020 جىلعى 3 قىركۇيەك) راستالدى.

بۇل شەشىم سوتتىڭ الدىڭعى شەشىمدەرىمەن قاتار، ابليازوۆ، ۆيكتور حراپۋنوۆ جانە ءىلياس حراپۋنوۆتىڭ بىرلەسكەن تالاپكەرلەردىڭ اقش-تا ونداعان ميلليون دوللاردى جىلىستاتقانى ءۇشىن ابليازوۆقا، حراپۋنوۆقا جانە Triadou SPV SA جالعان كومپانياسىنا قويىلاتىن تالاپتارى ءۇشىن «ۇلكەن ماڭىزى بار» دالەلدەمەلەردى تابۋىنا كەدەرگى كەلتىرگەنىن انىقتادى.

سوت جاۋاپكەرلەردىڭ جاسىرعان جانە قاساقانا جويعان دالەلدەرى بولعاندىعىن، جالعان ايعاقتار بەرگەندىگىن، سوت بۇيرىقتارىن بۇزعاندىعىن جانە سوت پروتسەسىن «مىسىق-تىشقان ويىنى» رەتىندە قابىلداعاندىقتارىن انىقتادى.

اتالعان شەشىمدە ايتىلعان ناقتى زاڭسىزدىقتاردىڭ ىشىندە سوت مىنالاردى اتاپ ءوتتى:

- ابليازوۆ «سوتتىڭ ودان دالەلدەمەلەر ۇسىنۋدى تالاپ ەتكەن قاۋلىسىن ورىندامادى»;

- «ابليازوۆ وزىندە جوعارىدا اتالعان دالەلدەردىڭ جوق ەكەندىگىن مالىمدەدى، بىراق بۇل مالىمدەمە ونىڭ ءوزىنىڭ انت بەرۋ ارقىلى بەرگەن ايعاقتارىنا قايشى كەلدى»;

- حراپۋنوۆتار «ەشقانداي سەبەپسىز ءبىر دە ءبىر قارجىلىق ەسەپ بەرگەن جوق»;

- سوت «اقپاراتتى اشۋ ءتارتىبىنىڭ نەگىزگى بۇزۋشىسى» دەپ اتاعان ءىلياس حراپۋنوۆ بىرلەسكەن تالاپكەرلەر وزدەرىنىڭ بىرلەسكەن تالاپ-ارىزىن بەرۋدەن ازعانا بۇرىن ءوزىنىڭ بارلىق حاتتارىن ءوشىرىپ تاستاپ، ونىڭ ورنىنا «جۇزدەگەن» شيفرلانعان ەلەكتروندىق پوشتا ادرەستەرىن قولدانا باستادى، سودان كەيىن ولاردىڭ ەشقايسىسىنا قول جەتكىزە المايتىندىعى تۋرالى «ويعا قونبايتىن» مالىمدەمەلەر جاسادى;

- يلياس حراپۋنوۆ سونىمەن بىرگە ءوزى ءۇشىنشى تۇلعالارعا جىبەرگەن ەلەكتروندىق حاتتارىن مويىنداۋدان باس تارتتى جانە «ونداعان نەمەسە جۇزدەگەن ميلليون دوللارلارعا قاتىستى قارجىلىق وپەراتسيالار تۋرالى ەشتەڭە بىلمەيمىن»، دەپ مالىمدەدى;

- ابليازوۆ ءوزىنىڭ مەنشىكتى كاپيتالى 20 ميلليارد اقش دوللارىنان اساتىنىن ايتىپ، بىراق وعان وسى اقشانى تابۋعا جانە باسقارۋعا جاردەمدەسكەن ادامداردى اتاي المايتىنىن مالىمدەدى;

زاڭسىز ارەكەت تۋرالى وسى جانە وسىعان ۇقساس تۇجىرىمداردىڭ نەگىزىندە سوت بىرلەسكەن تالاپكەرلەردىڭ پايداسىنا ابليازوۆتىڭ 140 115,16 اقش دوللارى مولشەرىندە ايىپپۇل تولەۋ قاجەتتىگى تۋرالى شەشىم شىعاردى.

سوت ي.حراپۋنوۆقا قاتىستى سانكتسيانىڭ مولشەرىن ونىڭ مىنەز-قۇلقىنىڭ سالدارىنان بولعان شىعىندار تۋرالى بىرلەسكەن تالاپكەرلەردەن قوسىمشا دالەلدەر العاننان كەيىن انىقتايدى.

سوت سونىمەن بىرگە «ونىڭ شەشىمىنە كەز-كەلگەن اپەللياتسيا بەرىلگەن جاعدايدا، بۇل ارەكەت «شەشىمدى ءوز ەركىمەن ورىنداۋدان باس تارتۋ» رەتىندە قابىلدانادى» دەپ قاۋلى ەتتى.

نيۋ-يورك ءىسى بىرلەسكەن تالاپكەرلەر اتىنان بەس جىل بۇرىن م.ابليازوۆتىڭ جانە ونىڭ سىبايلاستارىنىڭ ۇرلانعان اقشانى اقش-تا جىلىستاتقانى ءۇشىن ايىپتاۋى بويىنشا باستالعان.

بۇكىل الەم بويىنشا سوتتار انىقتاعانداي، ابليازوۆ جالعان نەسيەلەر بەرۋ ارقىلى بتا بانكىنەن ميللياردتاعان دوللار ۇرلادى – بۇل ءۇشىن ول قازاقستاندا سوتتالىپ، ۇلىبريتانيانىڭ سوتتارىندا ازاماتتىق جاۋاپكەرشىلىككە تارتىلدى.

اقش-تاعى سوت تالقىلاۋى بارىسىندا تالاپكەرلەر ابليازوۆ قىلمىستارىنىڭ قوسىمشا ەلەۋلى دالەلدەرىن جينادى، سونداي-اق وسى قىلمىستاردىڭ كوپتەگەن كۋالەرىنىڭ ايعاقتارىن قامتاماسىز ەتتى. قازىرگى ۋاقىتتا اقش-تىڭ نيۋ-يوركتەگى القابيلەرىنە قاتىستى سوت ءىسىن 2022 جىلدىڭ اقپان ايىندا باستاۋ جوسپارلانۋدا.

Abai.kz