جولداۋ –  ۇلت بولاشاعىن جارقىن ەتەتىن ساياسي وقيعا. مەملەكەت باسشىسى جولداعان ماڭىزدى قۇجات ەلدىڭ قوعامدىق-ساياسي، الەۋمەتتىك-ەكونوميكالىق احۋالىن تالدايدى.

بيىلعى جولداۋدا قوزعالعان ماسەلەلەر كوپ-اق. سونىڭ ءبىرى مەديتسينا سالاسىنداعى ماڭىزدى مىندەتتەر مەن جۇزەگە اسىرىلۋى ءتيىس ماسەلەلەر. پرەزيدەنت قاسىم-جومارت توقاەۆ جولداۋدا دەنساۋلىق ساقتاۋ جۇيەسىنىڭ تيىمدىلىگىن ارتتىرۋ جونىندە ايتىپ، ستاتيستيكالىق مالىمەتتەر كەلتىرىپ ءوتتى. مەن وسى باستاماعا ايىرىقشا توقتالىپ وتكىم كەلىپ وتىر.

شىندىعىندا، حالقىمىز «ءبىرىنشى بايلىق – دەنساۋلىق» دەپ بەكەر ايتپاعان. مەملەكەت باسشىسى ايتقانداي، كوروناۆيرۋس دەنساۋلىق ساقتاۋ سالاسى ءۇشىن ۇلكەن سىناق بولدى. الەمدى جايلاعان ىندەتتىڭ بەتى ءالى قايتار ەمەس. ءتىپتى الەمدە كوروناۆيرۋستىڭ جاڭا شتامدارى شىعۋى مۇمكىن ەكەنىن، ساراپشىلار باسقا دا ىندەتتەر پايدا بولاتىنىن ايتىپ جاتقانىن ەسكەرتىپ وتىر.

بۇل تۋرالى پرەزيدەنت قاسىم-جومارت توقاەۆ: «ءبىز ونىڭ قاشان بولاتىنىن كۇتىپ، قاراپ وتىرا المايمىز. وسىنداي جاعدايدا ءومىر ءسۇرىپ، ءارى قاراي دامۋعا بەيىمدەلۋىمىز كەرەك. قازىر «بۋستەرلىك ۆاكتسينانى» ساتىپ الۋ وتە ماڭىزدى. دۇنيەجۇزىلىك دەنساۋلىق ساقتاۋ ۇيىمىندا تىركەلگەن ۆاكتسينالاردى تەزىرەك ساتىپ الۋ قاجەت. سونىمەن بىرگە، بۇكىل دەنساۋلىق ساقتاۋ سالاسىن تۇراقتى ەكپە الۋ جۇيەسىنە دايىنداعان ءجون»،- دەگەن ەدى.

ءيا، بۇگىندە، كوروناۆيرۋسپەن كۇرەستە قازاقستان كوروناۆيرۋسقا قارسى ۆاكتسينا جاساپ شىعارعان الەمدەگى ساناۋلى مەملەكەتتىڭ بىرىنە اينالىپ وتىر. قازىردىڭ وزىندە QazVac-تىڭ ءتيىمدى ءارى قاۋىپسىز ەكەنىنە شاك كەلتىرمەيتىن الەمنىڭ بىرقاتار ەلى ونى ساتىپ الۋعا پەيىل تانىتىپ وتىر. جالپى، ەلىمىزدىڭ QazVac-تان باسقا دا ۆاكتسينالاردىڭ قورى جەتكىلىكتى. ياعني، تۇرعىندارعا تاڭداۋ جاساۋ مۇمكىندىگى بەرىلگەن. قازىرگى ۋاقىتتا ەلىمىزدە ەكپە الۋعا اسىققان جۇرتشىلىقتىڭ قاتارى كۇن سايىن ارتىپ كەلە جاتىر.

الايدا، ماسەلەنىڭ بايىبىنا بارماي بايبالام سالعان «انتيۆاكسەرلەردىڭ» كەسىرىنەن كەيبىر ازاماتتاردىڭ بويىندا ۆاكتسيناعا سەنىمسىزدىك پايدا بولعانى دا جاسىرىن ەمەس. بىراق، سولاردىڭ جەلىكپە ءسوزىنىڭ جەتەگىنە ەرىپ، ۆاكتسينا پايدا بولعاننان كەيىن عانا ادامزات تاريحىندا ميلليونداعان جاننىڭ ءومىرىن جالماعان قاۋىپتى دەرتتەرگە توسقاۋىل قويىلعانىن ەستەن شىعارىپ الاتىنىمىز دا بار.

بۇل تۋرالى مەملەكەت باسشىسى: «ولار وزدەرى باس تارتىپ قانا قويماي، حالىقتى كەرى ۇگىتتەۋدە. سونىڭ كەسىرىنەن قانشاما جۇرتتى اداستىرۋدا. مۇنداي ادامدار ءوزىنىڭ عانا ەمەس، وزگەنىڭ ءومىرى ءۇشىن دە جاۋاپ بەرەتىنىن تۇسىنۋگە ءتيىس. سوندىقتان، ەكپە الۋعا قارسى ۇگىتتەپ جۇرگەندەردىڭ جەتەگىندە كەتپەگەن ءجون»، - دەپ ەسكەرتتى.

سونىمەن قاتار، مەملەكەت باسشىسىنىڭ اتاپ وتۋىنشە، مەديتسينا سالاسىنا قوماقتى قارجى قۇيىپ، ونى ينفراقۇرىلىمعا، مامان دايارلاۋعا جانە حالىقتى ءدارى-دارمەكپەن قامتاماسىز ەتۋگە جۇمساۋ قاجەت. فارماتسەۆتيكا ونەركاسىبىنە ەرەكشە كوڭىل ءبولىپ، مەديتسينا ونىمدەرىن زەرتحانالىق جانە تەحنيكالىق سىناقتان وتكىزەتىن ورتالىق قۇرۋ كەرەك. بۇگىندە وتاندىق نارىقتىڭ نە ءبارى 17 پايىزىن عانا قۇرايتىن ءدارى-دارمەك پەن مەديتسينالىق قۇرال-جابدىقتىڭ كولەمى 2025 جىلى 50 پايىزعا جەتكىزىلۋى ءتيىس. «دەنى ساۋ ۇلت» جوباسى اياسىندا كەمىندە 12 زەرتحانا جوعارى تەحنولوگيالىق قۇرالدارمەن جابدىقتالۋى ءتيىس. مەن، ارينە، مەديتسينا سالاسىنىڭ مامانى رەتىندە دەنساۋلىق ساقتاۋ جۇيەسىن ودان ءارى دامىتۋدىڭ ناقتى قادامدارىن قولدايمىن.

گۇلجاينات وستەمىروۆا، №36 قالالىق ەمحانانىڭ باس دارىگەرى

Abai.kz