سۋديا مارات سەيسەنعالي سوت وتىرىسى كەزىندە مارۋا ەسكەندىروۆانىڭ 25 قىركۇيەكتە "قازاق حالقىنىڭ اياۋلى قىزدارى" ەسكەرتكىشى ماڭىندا ءسوز سويلەگەنىن ايتتى. بەس ادام قاتىسقان اكتسيانى سول كەزدە بيلىك وكىلدەرى "زاڭسىز ميتينگ" دەپ اتاپ، حاتتاما تولتىرعان بولاتىن.

وعان اكىمشىلىك كودەكستىڭ 488-باپ 11-بولىگى ("بەيبىت جيىن وتكىزۋ ءتارتىبىن بۇزۋ") بويىنشا ايىپ تاعىلعان.

ەسكەندىروۆا سوت وتىرىسى كەزىندە ءوزى مەن بىرنەشە بەلسەندىنىڭ اكىمدىككە 23 قازاندا مانشۇك مامەتوۆا الاڭىندا بەيبىت جيىن وتكىزۋ تۋرالى حابارلاما تۇسىرگەنىن ايتتى.

- بىزگە جيىن وتكىزۋگە رۇقسات بەرمەدى، سول كۇنى ءدال سول ۋاقىتتا "جاستار جەمقورلىققا قارسى" اتتى شارا وتەدى دەپ ايتىلدى. بۇگىن جاستاردى قولدايىن دەپ الاڭعا بارماق بولعانمىن. جولدا كەتىپ بارا جاتقان كەزدە مەنى پوليتسەيلەر قۋىپ جەتىپ، قولىمدى قايىرىپ، اۆتوزاكقا يتەرىپ وتىرعىزدى، – دەدى ەسكەندىروۆا سوتقا.

وزگە بەلسەندىلەر دە بيلىك ۇيىمداستىرعان "جەمقورلىققا قارسى" شاراعا جەتە الماعان.

ءۇيىنىڭ ماڭىن بەلگىسىز كولىكتىڭ اڭدىپ جۇرگەنىنە شاعىمدانعان ورال تۇرعىنى ساندۋعاش مۇحامبەتجانوۆانىڭ ازاتتىققا ايتۋىنشا، ول سەنبى كۇنى كوشەگە شىققان كەزدە شتاتتىق كيىمدەگى بەيتانىس ەر ادام ىزىنە تۇسكەن.

- بالالارىممەن بىرگە ساياباق پەن ساۋدا ورتالىعىنا باردىق، ماسكا تاققان ادام ارتىمىزدان قالمادى. بىزگە تيىسكەن جوق، ەركىن جۇردىك. بىراق كۇنى بويى اڭدىدى، – دەدى مۇحامبەتجانوۆا.

اقساي قالاسىندا تۇراتىن بەلسەندى تىلەكقابىل كەلىكباەۆتىڭ ايتۋىنشا، وپپوزيتسيا ميتينگىسى قارساڭىندا ونى جەرگىلىكتى پوليتسيا بولىمشەسىنە شاقىرىپ، "زاڭسىز شاراعا قاتىسۋدىڭ سالدارى" جونىندە ەسكەرتكەن.

- ورالعا بارىپ، ميتينگىگە قاتىسساڭ، اكىمشىلىك جاۋاپقا تارتىلاسىڭ – نە ايىپپۇل تولەيسىڭ نە قامالاسىڭ دەپ ەسكەرتتى، - دەدى كەلىباەۆ ازاتتىققا.

ميتينگ قارساڭىندا بۇعان دەيىن بەلسەندى امانگەلدى ورازباەۆ تا 20 كۇنگە قامالعان. ونى 25 قىركۇيەكتە الاڭعا بارعانى ءۇشىن جاۋاپقا تارتتى. ورازباەۆ تاعىلعان ايىپتى تۇبەگەيلى جوققا شىعارادى.

بۇعان دەيىن قۋعىنداعى بۇرىنعى بانكير، وپپوزيتسيالىق ساياساتكەر شەتەلدە تۇراتىن مۇحتار ءابليازوۆ جاقتاستارىن 23 قازاندا ميتينگىگە شىعۋعا شاقىرعان. ميتينگىدە ساياسي تۇتقىنداردى بوساتۋ، جالاقى، زەينەتاقى جانە جاردەماقىنى ەكى ەسە ءوسىرۋ تالاپتارى ايتىلادى دەپ حابارلانعان.

ميتينگ قارساڭىندا جانە ميتينگ وتەدى دەگەن كۇنى قازاقستاننىڭ ءتۇرلى وڭىرىندە كەي ازاماتتار ۇيلەرىنىڭ ماڭىن پوليتسيانىڭ تورۋىلداپ جۇرگەنىن ايتتى، كەيبىرى ۇستالعان، كەيبىرى بولىمشەگە شاقىرتىلعان. ۇستالعاندار اراسىندا بەلسەندى اسەت ابىشەۆ تە بار.

الماتىدا ازاتتىق ءتىلشىسى "ميتينگ ورنىندا" كەمىندە بەس ادامنىڭ ۇستالعانىنا كۋا بولدى. اۋماقتا ءموبيلدى ينتەرنەت ءوشىرىلدى. الاڭعا كەلگەندەرگە پوليتسيا ءبىر جەرگە جينالۋىنا مۇمكىندىك بەرمەدى، بىراق سوعان قاراماستان كەي بەلسەندىلەر كەيبىرى تالاپتارىن ايتتى.

شىمكەنتتە كەمىندە ەكى ادام ۇستالدى. بىرنەشە قالادا پوليتسيا كۇزەتى كۇشەيدى.

Abai.kz