تالدىقورعان قالاسىنداعى وقۋشىلار سارايىندا تاۋەلسىزدىكتىڭ 30 جىلدىعى اياسىندا الماتى وبلىستىق ارداگەرلەر كەڭەسىنىڭ ۇيىمداستىرۋىمەن «قاسيەت تە، وسيەت تە قارتتاردا» اتتى سالتاناتتى جيىن ءوتتى. شاراعا ازاماتتىق باستامالاردى قولداۋ ورتالىعى جانىنداعى «اتامنىڭ اماناتى» قوعامدىق بىرلەستىگى جانە «اياۋلى الاقان» قوعامدىق قورىنىڭ قولداۋ كورسەتتى. بۇل تۋرالى "جەتىسۋ" گازەتىنىڭ ءتىلشىسى حابارلادى.

«قارتى بار ەل – قازىنالى» دەپ تەگىن ايتىلماعان عوي. جاستىق ءومىرىن وسى ەلدىڭ وركەندەۋى مەن كوركەيۋى جولىنا ارناعان، تاۋەلسىزدىكتىڭ العاشقى جىلدارىنداعى قيىن-قىستاۋ شاقتان قازاقستاندىقتاردى داۋىلعا دا، جاۋىنعا دا ۇرىندىرماي الىپ شىققان اعا بۋىننىڭ ورنى ەرەكشە. ولار بۇگىندە زەينەتكە شىعىپ، اتقارعان جۇمىستارىنىڭ راقاتىن كورەتىن جاسقا جەتتى. سوندىقتان بۇكىل قوعام ولاردىڭ مەرەيىن تاسىتىپ، قامقورلىق جاساپ، قولداپ-قۋاتتاسا ارتىق بولمايدى.

وسى رەتتە ايماقتاعى زەينەتكەرلەردىڭ باسىن قوسىپ، ولاردىڭ الەۋمەتتىك جاعدايىنا نازار اۋدارىپ، جەتىسپەي جاتقان جەرىن جەبەپ، ۇرپاق تاربيەسىنە قوسىپ جاتقان ۇلەسىن تارازىلاپ، قازاقستاندىق ءپاتريوتيزمنىڭ قالىپتاسۋىنا جەبەۋشى بولىپ كەلە جاتقان وبلىستىق جانە اۋدان-قالالارداعى اقساقالدار ۇيىمىنىڭ قىزمەتىنە ءدان ريزا بولاسىڭ. الداعى ۋاقىتتا ارداگەرلەردىڭ ەڭبەگى بۇگىنگىدەن دە جوعارى دەڭگەيدە ساۋلەلەنەتىن بولدى. بۇل تۋرالى كەزدەسۋ بارىسىندا وبلىستىق ارداگەرلەر كەڭەسىنىڭ توراعاسى ەرمەك كەلەمسەيىت ايتىپ بەردى.

– قىمباتتى قاۋىم، وزدەرىڭىزبەن وسىنداي تاربيەلىك ءمانى زور شارادا كەزدەسكەنىمە قۋانىشتىمىن. 1 قازان قارتتار كۇنى ەتىپ بەلگىلەنگەنىن بىلەمىز. الايدا وبلىستىق ارداگەرلەر ۇيىمى مەرەكەنى تەك ءبىر كۇنمەن عانا شەكتەمەي، قازان ايىنىڭ باسىنان سوڭىنا دەيىن ءتۇرلى شارا ۇيىمداستىرىپ، قارتتاردىڭ قادىرىن ارتتىرۋدى ماقسات ەتتىك. بۇگىنگى شارانىڭ وقۋشىلار سارايىندا ءوتۋىنىڭ دە سەبەبى بار. ويتكەنى، قارتتاردى قۇرمەتتەۋدى، سىيلاۋدى، ايالاۋدى، ەڭ الدىمەن، جاستاردان باستاعانىمىز ءجون. سونداي-اق، قارتتاردىڭ بىلىگى مەن ءبىلىمىن، تاجىريبەسىن جاستاردىڭ بويىنا ءسىڭىرىپ، ولاردى ەرتەڭگى ەلدىڭ تىرەگى بولۋعا باعىتتاۋىمىز قاجەت. جۋىردا رەسپۋبليكالىق ارداگەرلەر ۇيىمىنىڭ ءVىىى سەزىنە قاتىسىپ كەلدىم. وندا زەينەتكەرلەرگە قاتىستى جاڭالىقتار ايتىلدى. الداعى ۋاقىتتا ارداگەرلەرگە باعىتتالعان الەۋمەتتىك، مەديتسينالىق، تاعى دا باسقا كومەكتەر زاڭ اياسىندا اتقارىلاتىن بولادى. سونداي-اق، وسى كۇنگە دەيىن ءار باعىتتا جۇمىس ىستەپ كەلگەن ارداگەرلەر ۇيىمدارى ءبىر زاڭنىڭ اياسىندا بىرلەسە جۇمىس اتقارماقشى. بۇل ارداگەرلەر ۇيىمىنىڭ جۇمىس اۋقىمىن ۇلعايتا تۇسپەك. سونىمەن قاتار، بۇگىنگى شارا اياسىندا تاۋەلسىزدىكتىڭ 30 جىلدىعىنا ءتۇرلى سالادا ەڭبەك ەتىپ، ۇلكەن جەتىستىككە جەتكەن ارداگەرلەر ماراپاتتالىپ جاتىر، ءاربىرىڭىزدىڭ ەڭبەگىڭىز جەمىستى بولسىن، – دەدى ول.

ارينە، ۇرپاق تاربيەسى – ۇلت بولاشاعىنىڭ كەپىلى. اتا-بابالارىمىز ۇرپاققا امانات ەتىپ قالدىرعان ۇلتتىق قۇندىلىقتاردى بۇگىنگى وسكەلەڭ ۇرپاققا جەتكىزىپ، ولاردىڭ سۇيىسپەنشىلىگىن وياتىپ جۇرگەن ارداگەرلەرگە قانداي قۇرمەت كورسەتىلسە دە جاراسادى. وسىعان وراي «اتامنىڭ الاقانى» قوعامدىق بىرلەستىگى مەن «اياۋلى الاقان» قوعامدىق قورى جان-جاقتىلى سارالاپ، بىرقاتار ارداگەردى ءتۇرلى نوميناتسيا بويىنشا ماراپاتتاپ، سىي-سياپات تاپسىردى.

سول قاتاردا ءبىلىم سالاسى بويىنشا اۋكەن قازىباەۆ، دەنساۋلىق ساقتاۋ سالاسى بويىنشا تاتيانا ۋحانوۆا، مادەنيەت سالاسى بويىنشا مۇراتحان ەگىنباەۆ، ونەر، ادەبيەت، جۋرناليستيكا سالاسى بويىنشا ءالي ىسقاباي، اۋىلشارۋاشىلىق سالاسى بويىنشا ايداربەك جانتايلاقوۆ، قوعامدىق ىستەردەگى ۇلەسى ءۇشىن مۇرات حالىق، ىشكى ىستەر قىزمەتىنىڭ ارداگەرى بولات مولدابەكوۆ، مەملەكەتتىك قىزمەتتىڭ ارداگەرى سۆەتلانا گايتوۆا، ۇلتتىق قولونەردى ۇلىقتاپ جۇرگەندەر اراسىنان اۋەسحان ماجاي ماراپاتقا يە بولدى.

شارا اياسىندا ءالي ىسقاباي، اۋكەن قازىباەۆ، تاتيانا ۋحانوۆا، سۆەتلانا گايتوۆا ارداگەرلەردىڭ العىسىن جەتكىزدى. شارانىڭ سوڭىندا وبلىستىق ارداگەر اجەلەر حورى مەن وقۋشىلار سارايىنىڭ ونەرپازدارى اننەن شاشۋ شاشىپ، بۇرالا بي بيلەپ شارانىڭ كوركىن اشا ءتۇستى. ارداگەرلەر مەن جاستار اراسىنداعى بەرەكە-بىرلىك وسىلاي تاعى ءبىر بەلەسكە كوتەرىلدى.

قاجەت انداس

Abai.kz