قازاقستان سۋديا، دەپۋتات بولىپ جۇمىس ىستەگەن اۋعان ايەلدەرى مەن ولاردىڭ وتباسىنا ترانزيت ءدالىزىن ۇسىنادى. بۇل تۋرالى قر ءسىم حابارلادى.

«قازاقستان رەسپۋبليكاسىنىڭ گۋمانيتارلىق سالاداعى حالىقارالىق مىندەتتەمەلەرىنە بەيىلدىلىگىن نەگىزگە الا وتىرىپ، مەملەكەت باسشىسى اۋعان ايەل سۋديالارى مەن پارلامەنتشىلەرى جانە ولاردىڭ وتباسى مۇشەلەرى ءۇشىن ترانزيتتىك ءدالىز بەرۋ تۋرالى شەشىم قابىلدادى.

ترانزيت ءۇشىنشى ەلدەرگە ودان ءارى ۇشۋ ءۇشىن الماتى قالاسىنىڭ اۋەجايى ارقىلى حالىقارالىق ۇكىمەتتىك ەمەس ۇيىمدارمەن ىنتىماقتاستىقتا جۇزەگە اسىرىلدى»،- دەلىنگەن حابارلامادا.

Informburo مالىمەتىنشە، ترانزيت ءدالىزى ارقىلى 99 ادام ۇشۋى ءتيىس.

17 قازاندا قازاقستان تارابى "تاليبان" اكىمشىلىگىنىڭ جوعارى لاۋازىمدى تۇلعالارىمەن كەزدەسىپ، اۋعانستانعا گۋمانيتارلىق كومەك كورسەتۋ جانە ساۋدا-ەكونوميكالىق قارىم-قاتىناستى قالپىنا كەلتىرۋ ماسەلەلەرىن تالقىلاعان. قازاقستاندىق ديپلوماتتاردىڭ ارەكەتى الەۋمەتتىك جەلىدە سىنعا ۇشىرادى. اتاپ ايتقاندا، كەي سىنشىلار بەس مىڭ توننا ۇندى اۋعانستانعا گۋمانيتارلىق كومەك رەتىندە جىبەرۋدى تەرروريزمدى قارجىلاندىرۋ رەتىندە باعالاعان.

قازاقستان سىرتقى ىستەر ءمينيسترى مۇحتار تىلەۋبەردى نۇر-سۇلتاننىڭ "تاليبان" بيلىگىمەن قارىم-قاتىناسى جونىندە سۇراقتارعا جاۋاپ بەردى.

مينيستر "تاليبان" قوزعالىسىنىڭ حالىقارالىق تەرروريستىك ۇيىمدار تىزىمىندە ەكەنىن، سول سەبەپتى ازىرگە حالىقارالىق قاۋىمداستىق اۋعانستاننىڭ جاڭا بيلىگىن مويىنداماعانىن ايتىپ وتكەن.

"حالىقارالىق قاۋىمداستىق مويىنداۋ ءۇشىن بۇۇ قاۋىپسىزدىك كەڭەسى ارنايى رەزوليۋتسيا قابىلداۋى ءتيىس" دەدى ول.

مينيستردەن اقپارات قۇرالدارى ءسىم وكىلىنىڭ قارۋ ۇستاعان تالىپتەرمەن سۋرەتكە ءتۇسۋى تۋرالى دا سۇراعان.

"ول ء(سىم وكىلى) پرەزيدەنتتىڭ حالىقارالىق ماسەلەلەر جونىندەگى ارنايى ۋاكىلى جەتەكشىلىك ەتكەن قازاقستاندىق دەلەگاتسيانىڭ قۇرامىندا بولدى. دەلەگاتسيا اۋعانستانعا گۋمانيتارلىق كومەك كورسەتۋ بويىنشا ارنايى ميسسيامەن بارعان. سەبەبى حالىقارالىق قاۋىمداستىق اراسىندا اۋعانستاننىڭ گۋمانيتارلىق داعدارىسقا ۇشىراۋىنا جول بەرمەۋ تۋرالى ورتاق كەلىسىم بار. سەبەبى ونىڭ ەسىرتكى اينالىمى، ءدىني ەكسترەميزمنىڭ جاندانۋى سياقتى قاۋىپتى سالدارى بولۋى مۇمكىن" دەدى تىلەۋبەردى.

ونىڭ ايتۋىنشا، قازاقستان بيلىگى اۋعانستانعا 5 مىڭ توننا ۇن جىبەرۋدەن باسقا كومەك بەرۋ ماسەلەسىن قاراستىرىپ وتىرعان جوق.

"قازىر ماسەلە بۇل ەلمەن ساياسي كەلىسسوز جۇرگىزۋ ەمەس، اۋعان حالقىنا كومەك كورسەتۋدە بولىپ وتىر" دەدى ۆيتسە-پرەمەر.

قازاقستان جوعارعى سوتى 2005 جىلى 15 ناۋرىزدا "تاليبان" قوزعالىسىن تەرروريستىك ۇيىم دەپ تانىپ، قىزمەتىنە تىيىم سالعان. اۋعانستان بيلىگىن باسىپ العان ۇيىم 7 قىركۇيەكتە جاڭا ۇكىمەت قۇرامىن جاريالاعان. مينيسترلەر كابينەتىندە بىردە ءبىر ايەل جوق، باسىم بولىگى تەررورشىلار تىزىمىنە ەنگەن "تاليبان" سودىرلارىنان قۇرالعان. اقش تالىپتەر ۇكىمەتىن ۋاقىتشا نەمەسە اۋىسپالى كابينەت دەپ اتاعان.

Abai.kz