«رۋحاني جاڭعىرۋ» بارىنشا قارقىنمەن ءوتىپ جاتىر. قالالار مەن اۋىلداردىڭ ەسكەرتكىشتەرى مەن مۇسىندىك قۇرىلىمدارى ولكە تاريحى مەن مادەنيەتىنىڭ كورنەكى كورىنىسى ەكەنى انىق. قوستانايدا بۇل تۇرعىدان 127 نىسان بولسا، ونىڭ 64-ءى، ياعني جارتىسىنا جۋىعى ەگەمەن قازاقستان جىلدارىندا بوي كوتەرگەن. ەل تاۋەلسىزدىگىنىڭ تاڭى اتقان شاقتا قوستانايدا ءبىر عانا ەسكەرتكىش – بەيىمبەت ءمايليننىڭ ءبيۋستى تۇرعىزىلعان ەدى.

2000 جىلدىڭ باسىنان بەرى جاعداي كۇرت وزگەردى: ەندى ەكى-ءۇش جىل سايىن قوستانايدا باتىرلاردىڭ، عالىمداردىڭ، اقىنداردىڭ، اعارتۋشىلاردىڭ جاڭا مۇسىندەرى پايدا بولا باستادى، سول ارقىلى ولاردىڭ ەسىمدەرى ماڭگىلىككە قالدى. بيۋستتەر مەن مۇسىندەردى ورناتۋ نەگىزىنەن بەلگىلى ءبىر وقيعاعا ورايلاستىرىلعان. ماسەلەن، قازاق حاندىعىنىڭ 550 جىلدىعىنا وراي قالادا قوبىلاندى باتىردىڭ ەسكەرتكىشى اشىلسا، اراعا ءبىر جىل سالىپ، 2017 جىلى «رۋحاني جاڭعىرۋ» باعدارلاماسى اياسىندا شاقشاق جانىبەككە ەسكەرتكىش ورناتىلدى.

بۇل تۇرعىدان الىپ قاراساق 2019 جىل ەڭ جەمىستى جىل بولدى. سودان كەيىن ۇلى جەڭىستىڭ 75 جىلدىعىن مەرەكەلەۋ ماقساتىندا قوستانايدا «داڭق اللەياسى» اشىلىپ، وعان كەڭەس وداعىنىڭ باتىرلارى مەن داڭق وردەنى يەگەرلەرىنىڭ 41 ءبيۋستى ورناتىلدى.

جۋىردا عانا بوي كوتەرگەن ەسكەرتكىشتەردىڭ قاتارىندا ورتالىق الاڭعا كىرە بەرىستەگى ىبىراي التىنسارين ءمۇسىنى مەن بيىلعى جىلى جاڭا جاعالاۋعا ورناتىلعان عالىم كەنجەعالي ساعاديەۆتىڭ ەسكەرتكىشى بار. بىرەگەي ەسكەرتكىشتەردىڭ قاتارىندا تراكتورشى، سوتسياليستىك ەڭبەك ەرى كامشات دونەنباەۆانىڭ ءبيۋستى بار. بۇل قوستانايداعى ەسىمى قولامەن ماڭگىلىككە قالعان جالعىز ايەل.

شىنىندا دا، جالپى العاندا، ەسكەرتكىشتەر قالانىڭ ساۋلەتتىك بەزەندىرۋى عانا ەمەس، مادەني مۇرانىڭ ەڭ ماڭىزدى قۇرامداس بولىگى بولىپ تابىلادى. ول پاتريوتتىق سەزىمدى قالىپتاستىرادى، ادامگەرشىلىككە شاقىرىپ، ەستەتيكالىق قابىلداۋعا ۇيرەتەدى.

Abai.kz