قر دەنساۋلىق ساقتاۋ ءمينيسترى الەكسەي تسوي ەڭبەك دەمالىسىنا شىقتى. بۇل تۋرالى ۆيتسە-مينيستر مارات شورانوۆ مالىمدەدى.

ۇكىمەت وتىرىسىنان كەيىن جۋرناليستەر سۇراقتارىنا جاۋاپ بەرگەن دسم ۆيتسە-ءمينيسترى مارات شورانوۆ: «الەكسەي ۆلاديميروۆيچ ەڭبەك دەمالىسىندا. كەلەسى اپتاعا، دۇيسەنبىگە دەيىن ءبىر اپتالىق قىسقا ەڭبەك دەمالىسى»، - دەپتى.

ايتپاقشى، ۆيتسە-مينيستر شورانوۆ قازاقستانعا «Pfizer» ەكپەسىنىڭ كەلەسى اپتادا اكەلىنەتىنىن دە ايتىپتى. «Pfizer ۆاكتسيناسى قازاقستانعا وسى جىلدىڭ 8-14 قاراشاسى ارالىعىندا جەتكىزىلەدى دەپ كۇتىپ وتىرمىز»، - دەيدى كىشى مينيستر.

وسىعان دەيىن مينيستر تسويدىڭ امەريكاندىق كومپانيا وكىلدەرىمەن كەلىسسوزدەردى باستاعانىن مالىمدەگەن. كەيىن، «Pfizer» ەكپەسى تەك جۇكتى ايەلدەر مەن بالالارعا سالىناتىنى ايتىلدى. ونان سوڭ، قر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا «Pfizer» ەكپەسىنىڭ 4 ملن دوزاسى ەلگە جەتكىزىلەتىنىن حابارلاپ ايتتى.

امەريكالىق «Pfizer» جانە گەرمانيالىق «BioNTech» كومپانيالارىنىڭ بىرلەسە ازىرلەگەن ۆاكتسيناسىنىڭ تيىمدىلىگى 95 پايىزدان اسادى. «Pfizer» - ددسۇ مەن ەۋروپا العاش مويىنداعان ۆاكتسينالاردىڭ ءبىرى.

سونىمەن، مينيستر تسوي قىسقا مەرزىمدى ەڭبەك دەمالىسىنا شىقتى. ال ەلدەگى ەپيدەميولوگيالىق احۋال قانداي؟ «Coronavirus2020.kz» سايتىنىڭ ماتىمەتىنشە، وتكەن تاۋلىكتە (3 قاراشا) كوروناۆيرۋس ىندەتىن جۇقتىرۋ فاكتىسى كوبەيگەن.

وتكەن تاۋلىكتەگى سovid-19  ستاتيستيكاسى:

جۇقتىرعاندار سانى – 1396.

قايتىس بولعاندار سانى – 29.

تاۋلىك ىشىندەگى كوروناۆيرۋستىق پنەۆمونيا ستاتيستيكاسى:

جۇقتىرعاندارى سانى – 109.

قايتىس بولعاندار سانى – 8.

ايتپاقشى، اتالعان ماتەريال دايىندالىپ جاتقاندا پرەزيدەنت توقاەۆ قازاقستاندا قايتا ۆاكتسيناتسيالاۋ ناۋقانىن باستاۋ تۋرالى تاپسىرما بەرىپتى.

«مۇنىڭ ءبارى ەكپە سالۋ قارقىنىنىڭ تومەندەۋىنەن بولىپ وتىر. 9 ايدا حالىقتى قامتۋ شامامەن 40 پايىزعا جەتتى. الەم ەلدەرى حالىقتى قايتا ۆاكتسيناتسيالاۋعا كىرىستى. ءبىز بەلسەندى ناۋقاندى ناۋرىز ايىندا باستاعانىمىزدى، رەۆاكتسيناتسيا مەرزىمى جاقىنداعانىن ەسكەرىپ، ۇكىمەت پەن اكىمدەر حالىقتى رەۆاكتسيناتسيالاۋ ناۋقانىنا كىرىسۋى كەرەك»، - دەدى پرەزيدەنت مونوقالالاردى دامىتۋ جونىندەگى كەڭەستە.

Abai.kz