ارمەنيا استاناسى ەرەۆاندا وپپوزيتسيا وكىلدەرى قاراباقتاعى سوعىس قيمىلدارىنىڭ اياقتالۋىنا ءبىر جىل تولۋىنا ارنالعان ميتينگتە شىقتى. ولار پرەمەر-مينيستر پاشينيان مەن ونىڭ ۇكىمەتى تولىقتاي وتستاۆكاعا كەتۋىن تالاپ ەتتى.

شەرۋگە شىققان بەلسەندىلەر ەلدىڭ ەكونوميكاسىنىڭ قۇلدىرۋى، تاۋار باعاسىنىڭ شارىقتاۋى، جەمقورلىقتىڭ جايىلا ءتۇسۋى، بەلسەندىلەردى قۋدالاۋ ارەكەتى مەن سوتقا قىسىم كورسەتۋ فاكتىلەرىنىڭ جالعاسۋىنا بيلىكتى كىنالادى.
ميتينگىدە حالىققا ۇندەۋ جولداعان ارمەنيانىڭ بۇرىنعى پرەزيدەنتى روبەرت كوچاريان: «قازىرگى بيلىك تاۋلى قاراباقتاعى سوعىس ءورتىنىڭ تۇتانۋىنا تىكەلەي اتسالىستى، ءارى پاشينيان سوعىستا جەڭىلۋ ءۇشىن بارىن سالدى»، - دەدى.

سوعىستان كەيىنگى شاكارانىڭ دەماركاتسياسى مەن دەليميتاتسياسى تۋرالى ايتقان ول، «ەرەۆان قازىر ەشقانداي قۇجاتقا قول قويا المايدى، بۇل ارمەنيانىڭ قاراباقپەن ءتىپتى يرانمەن بايلانىسىن ءبىرجولا ۇزۋگە اپاراتىن قادام بولۋى مۇمكىن ەكەنىن»، مالىمدەدى.

2020 جىلعى ارمەنيا مەن ءازىربايجان اراسىندا بولعان كەزەكتى ۇلكەن قاقتىعىستان كەيىن قاراباق شيەلەنىسىنە نۇكتە قويىلعان بولاتىن. مامىلەگە ءازىربايجان پرەزيدەنتى يلحام اليەۆ، ارمەنيا پرەمەر-ءمينيسترى نيكول پاشينيان جانە رەسەي پرەزيدەنتى ۆلاديمير پۋتين قول قويدى. كەلىسىم بىلتىر قاراشانىڭ ونىندا كۇشىنە ەندى. قاراباق ءوزىنىڭ ەجەلگى ءھام ادىلەتتى يەسى ازىربايجانعا قايتارىلدى. ال، كەلىسىم بويىنشا رەسەيدىڭ 1960 اسكەرى قاراباقتان ارمەنياعا جانە ناحيچەۆاننان ءازىربايجاننىڭ باتىس ايماقتارىنا وتەتىن دالىزدە «بەيبىتشىلىك كۇزەتۋشىسى» بولىپ بەس جىلعا قالدى. ارميانداردىڭ ەكى جاقتاعى شەكاراسىن دا باقىلاۋىندا ۇستاعان رەسەي ارمەنيانى وزىنە بۇرىننان بەتەر كىرىپتار ەتە ءتۇستى.

قاراباق جانجالىنان كەيىن دە نيكول پاشينياننىڭ پارتياسى پرەزيدەنت سايلاۋىندا جەڭىسكە جەتكەن بولاتىن. بىراق ەلدەگى سوعىستان كەيىنگى قيىندىقتار، ىشكى ساياساتتاعى داعدارىستى پاشينيان ۇكىمەتى ەڭسەرە المادى. ءوزارا ديالوگقا شاقىرعان پرەمەر-مينيسترمەن وپپوزيتسيا تەك بيلىكتەن كەتكەن كەزدە عانا سويلەسەتىنىن ايتتى. «ءبىز قالاي بولعاندا دا بيلىككە قارسىلىعىمىزدى توقتاتپاۋىمىز كەرەك، ەگەر وسى كۇشىمىزبەن قارسى تۇرساق از ۋاقىتتا ۇكىمەتتى ورنىنان تايدىرا الامىز. ءبىز قازىر بيلىكتە وتىرعانداردى قۋىپ شىعامىز»، - دەدى كوچاريان ميتينگىدە.

«اياستان» بلوگىنىڭ دەپۋتاتى گەگەم مانۋكيان: «بيلىكتە وتىرعاندار ارمەنيا مەن قاراباقتاعى ارميان حالقىنىڭ قالاۋىنا قاراي جۇمىس ىستەي المايدى»، - دەدى. «بۇگىن سەگىزىنشى قاراشادان باستاپ پاشينيان ۇكىمەتىمەن كۇرەسۋدىڭ جاڭا بەلەسىنە وتتىك. «قاراباقتاعى سوعىستا ماسقارا بولعاننان كەيىن-اق پاشينياننىڭ ەلارالىق كەلسىمدى جۇرگىزە المايتىنىنا كۋا بولدىق. قولدا باردان ايىرىلىپ قالماي تۇرعاندا، ءبىز ونى قالايدا وتستاۆكاعا كەتىرۋىمىز كەرەك»، - دەپ تۇيىندەدى دەپۋتات.

اۋقىمدى نارازىلىق شەرۋىندە بەلسەندىلەر ارمەنيانىڭ رەسەيمەن قارىم-قاتىناسىن ءۇزۋىن قالايتىنىن كورسەتتى.

ولار «ارمياندار مەن ورىس حالقىنىڭ اراسىندا ەشقاشان دوستىق بولماعانىن» العا تارتتى. ميتينگىگە قاتىسۋىشى الاڭدا لەرمونتوۆتىڭ «قوش بول، رەسەي كىرلەگەن» دەگەن ءسوزىن ۇرانداتتى.

ءبىر جىل بۇرىن، 10 قاراشادا 44 كۇنگە سوزىلعان ەكىنشى قاراباق سوعىسى اياقتالعان ەدى. ارمەنيا تاراپى جەڭىلىس تاۋىپ، ۇشجاقتى (رەسەي، ازەربايجان، ارمەنيا) كەلىسىم جاساستى. ارمەنيادا ءالى كۇنگە دەيىن جالعاسىپ جاتقان ساياسي داعدارىس باستالدى.

ايجان تەمىرحان 

Abai.kz