جاس ساياساتتانۋشىلار توبىن قالىپتاستىرۋ ماقساتىندا ءال-فارابي اتىنداعى قازاق ۇلتتىق ۋنيۆەرسيتەنىنىڭ فيلوسوفيا جانە ساياساتتانۋ فاكۋلتەتىندە «جاستاردىڭ ساياسي مادەنيەتتىن ارتتىرۋ جولدارى» اتتى كوشپەلى سەمينار-ترەنينگ ءوتتى.

ساياساتتانۋشىلاردىڭ قارا شاڭىراعىندا وتكەن سەمينار-ترەنينگتى ساياساتتانۋ PhD دوكتورى، "تۇران" ۋنيۆەرسيتەتى "ايماقتانۋ جانە حالىقارالىق قاتىناستار" كافەدراسىنىڭ مەڭگەرۋشىسى، 2013-2014 جىلدارى گۋمبولد ۋنيۆەرسيتەتىندە (گەرمانيا، بەرلين) عىلىمي تاعىلىمدامادان وتكەن جەڭىسبەك تولەن، ساياساتتانۋ عىلىمدارى كانديداتى، دوتسەنت، 2010-2011 جىلدارى سانتياگو ۋنيۆەرسيتەتiندە (يسپانيا) عىلىمي تاعىلىمدامادان وتكەن ءشارىپ يشمۋحامەدوۆ، الەۋمەتتىك عىلىمدار ماگيسترى، شەت تىلدەر جانە ىسكەرلىك كارەرا ۋنيۆەرسيتەتىنىڭ وقىتۋشىسى ەلميرا نازيروۆا،  ساياساتتانۋشى، “بولاشاق” باعدارلاماسىنىڭ تۇلەگى (اۆستراليا، The University of Queensland), حالىقارالىق قاتىناستار بويىنشا PhD كانديداتى نۇربولات نىشانباي جۇرگىزدى.

العى ءسوزدى فاكۋلتەت دەكانى بەكجان مەيىرباەۆ الىپ، بارلىق قاتىسۋشىلارعا ساتتىلىك تىلەدى.

ودان كەيىن ءسوز تىزگىنى تيگەن ساياساتتانۋ عىلىمدارىنىڭ دوكتورى، پروفەسسور، ساياساتتانۋ جانە ساياسي تەحنولوگيالار كافەدراسىنىڭ مەڭگەرۋشىسى گۇلنار ناسيموۆا جوبانىڭ ماڭىزدىلىعىن اتاپ ءوتتى. «الماتى قالاسى قوعامدىق دامۋ باسقارماسىنىڭ «حالىقتىڭ ساياسي مادەنيەتىن ارتتىرۋعا باعىتتالعان تاقىرىپتىق ءىس-شارالار وتكىزۋ» جوباسى شىنىندا دا جاقسى ءارى تىڭ جوبا ەكەن. وسى جوبادان ءوزىمىنىڭ بۇرىنعى شاكىرتتەرىمدى كورگەنىمە قۋانىپ وتىرمىن. بۇگىنگى سەمينار-ترەنينگتى فاكۋلتەتتىڭ بۇرىنعى ستۋدەنتتەرى مەن قازىرگى ستۋدەنتتەرى اراسىنداعى تاجىريبە الماسۋ دەسە دە بولادى. دەگەنمەن مۇنداي سەمينار-ترەنينگتى تەك ساياساتتانۋ ماماندىعى بويىنشا ءبىلىم الاتىن ستۋدەنتتەرگە ەمەس، باسقا ماماندىق يەلەرىنە دە وتكىزۋگە كەڭەس بەرەمىن» دەدى ول.

سەمينار-ترەنينگ جەڭىسبەك تولەننىڭ ساياسي مادەنيەتتىڭ تەوريالىق نەگىزدەرى جونىندەگى پرەزەنتاتسياسىمەن باستالدى. ايتا كەتەيىك، ول «ساياسي مادەنيەت قازاقستاندا تۇراقتىلىقتى قامتاماسىز ەتۋدىڭ فاكتورى رەتىندە» اتتى ديسسەرتاتسيالىق جۇمىستىڭ اۆتورى. ج.تولەن دوكتورلىق عىلىمي ديسسەرتاتسيانى وسى تاقىرىپتا قورعاعان مامان بولعاندىقتان، ساياسي مادەنيەتتىڭ اسپەكتىلەرىن ستۋدەنتتەرگە وڭاي ءتۇسىندىردى.

ال ش.يشمۋحاممەدوۆ ساياسي مادەنيەتتىڭ پراكتيكالىق نەگىزدەرى تۋرالى ءسوز قوزعاپ، ونىڭ ادام ومىرىنە تىكەلەي قاتىستى جاعىنا باسا نازار اۋداردى. ونىڭ پرەزەنتاتسياسىندا ساياسي مادەنيەتتىڭ دەۆالۆاتسيامەن، پاتەر باعاسىمەن، جالپى ەكونوميكامەن، كۇندەلىكتى تىرشىلىكپەن اراقاتىناسى كورىنىس بەردى.

ە.نازيروۆا ءوز پرەزەنتاتسياسىندا ساياسي مادەنيەتتىڭ قازىرگى تاڭداعى كورىنىس بەرىپ جاتقان تۇرلەرىنە توقتالدى. ستۋدەنتتەرگە ساياسي مادەنيەت پەن ساياسي بەلسەندىلىكتىڭ ارا-جىگىن اشىپ كورسەتىپ، ەكەۋىن شاتاستىرىپ الماۋعا شاقىردى. ونىڭ ويىنشا ەلىمىزدە ساياسي ءومىر ۋاقىت وتكەن سايىن جاڭارىپ جاتقانى جاسىرىن ەمەس. مۇنداي جاعدايدا ءاربىر ازامات ءوزىنىڭ ساياسي مادەنيەتىنە جاۋاپكەرشىلىكپەن قاراۋى ءتيىس.

«بولاشاق» باعدارلاماسىنىڭ تۇلەگى ن.نىشانباي قازىر ساياساتقا ارالاسۋدىڭ جولى كوپ ەكەنىن، بۇرىن ادامدار ساياساتقا ارالاسۋ ءۇشىن مىندەتتى تۇردە ءبىر پارتياعا مۇشە بولىپ كىرۋ كەرەك بولسا، ال بۇگىنگى تاڭدا الەۋمەتتىك جەلى ارقىلى، اكتسيا ارقىلى، ءتىپتى شاش ۇلگىسىن وزگەرتۋ ارقىلى دا ساياسي ومىرگە ارالاسۋعا بولاتىنىن ايتتى.

كوشپەلى سەمينار-ترەنينگ سوڭىندا بارلىق قاتىسقان ستۋدەنتتەرگە سەرتيفيكاتتار تابىس ەتىلدى.

جوبانى الماتى قالاسى اكىمدىگىنىڭ قولداۋىمەن «ماڭگىلىك قازاقستان» قوعامدىق قورى ۇيىمداستىردى.

ق.قاراباەۆ

Abai.kz