ءماجىلىس توراعاسى نۇرلان نىعماتۋللين بۇگىن پالاتانىڭ جالپى وتىرىسىندا ءبىرىنشى وقىلىمدا ماقۇلدانعان بيرجالىق ساۋدانى دامىتۋ جانە جەتىلدىرۋ ماسەلەلەرى بويىنشا ۇسىنىلعان تۇزەتۋلەر تۋرالى ايتتى.

زاڭ جوباسى تاۋار بيرجالارى قىزمەتىنىڭ تالاپتارىن جانە اشىقتىعىن ارتتىرۋعا، بيرجالىق ساۋدانى دامىتۋ ءۇشىن باسەكەلەس ورتا مەن جاعدايلار جاساۋعا، سونداي-اق بيرجالىق ساۋدا كولەمىن ۇلعايتۋعا باعىتتالعان.
قۇجاتتى تالقىلاۋ بارىسىندا دەپۋتاتتار بىرقاتار زاڭنامالىق نورمالارعا اتاپ ايتقاندا، ساۋدا جانە ينتەگراتسيا مينيسترلىگىنىڭ ساۋدا-ساتتىققا قاتىسۋشىلاردان بيرجالىق الىمنىڭ ەڭ تومەنگى مولشەرىن شەكتەۋ قۇقىعىن كوزدەيتىن وزگەرىستەر مەن تولىقتىرۋلار ەنگىزىلەدى. دەپۋتاتتاردىڭ پىكىرىنشە، بۇل نورما بيرجالاردىڭ كاسىپكەر – كليەنتتەرىنە تەرىس اسەر ەتۋى مۇمكىن.
وسىعان ساي، وتىرىستا نۇرلان نىعماتۋلين دەپۋتاتتاردىڭ ۇسىنىسىن قولدادى، ەگەر زاڭ جوباسى ۇكىمەت رەداكتسياسىندا قابىلدانسا باعا سۇرانىس پەن ۇسىنىسپەن رەتتەلەتىن كەزدە باسەكەلەستىكتىڭ نەگىزگى قاعيداسى بۇزىلاتىنىن اتاپ ءوتتى.

پالاتا سپيكەرى اتاپ وتكەندەي، بيرجالىق الىم مولشەرىنە قاتىستى دەمپينگ تۇرىندەگى بيرجالاردىڭ جاۋاپكەركەرشىلىكتەن تىس ارەكەتتەرىنە كەلەتىن بولساق، وندا بۇل جەردە زاڭ جوباسىندا كورسەتىلگەن باسقا دا تاسىلدەر جەتكىلىكتى.

سونىمەن قاتار، وتىرىستا نۇرلان نىعماتۋلين دەپۋتاتتارعا «كومىرتەگى بىرلىكتەرى»» ساتۋ ءۇشىن ارنايى بيرجالاردىڭ جەكە ءتۇرىن ءبولۋ تۋرالى ۇسىنىس ايتىپ، اعىمداعى جىلدىڭ باسىندا ەكولوگيالىق كودەكس قابىلدانىپ، وندا كومىرتەگى بىرلىكتەرىن ساتۋ مۇمكىندىگى قاراستىرىلعانىن ايتتى.

بۇگىندە بارلىق ەلدەر شامادان تىس شىعارىندىلارمەن بەلسەندى كۇرەس جۇرگىزە باستادى. نۇرلان نىعماتۋليننىڭ ايتۋىنشا، وسىعان بايلانىستى بىزدە دە ونەركاسىپ كاسىپورىندارىنا «تەگىن» كۆوتالار كەزەڭ-كەزەڭىمەن قىسقاراتىن بولادى. كۆوتادان تىس بارلىق شىعارىندىلار ءۇشىن كاسىپورىندار تولەمەك. ياعني، ولار جاڭا تومەن كومىرتەكتى تەحنولوگيالار ءۇشىن اقى تولەۋدى نەمەسە قوسىمشا كۆوتالار ساتىپ الۋدى تاڭداۋى كەرەك.

وسى رەتتە، ءماجىلىس توراعاسى دامىعان ەلدەردە مامانداندىرىلعان بيرجالار شىعارىندىلارعا كۆوتالار ساتاتىنىن، سوندىقتان «كومىرتەگى بىرلىكتەرى» ساۋداسى بويىنشا مامانداندىرىلعان بيرجالار قۇرىپ، الەمدىك تاجىريبەنى ۇستانۋ كەرەكتىگىنە نازار اۋداردى.

نۇرلان نىعماتۋليننىڭ پىكىرىنشە، مۇنداي ءتاسىل بولاشاقتا ءبىزدىڭ بيرجالىق قاتىسۋشىلارعا حالىقارالىق نارىققا شىعۋعا مۇمكىندىك بەرەدى.
وسىعان سايكەس، پالاتا توراعاسى اتالعان زاڭ جوباسى بويىنشا جۇمىس توبىنا جاۋاپتى مينيسترلىكپەن بىرگە ەكىنشى وقىلىمعا دەيىن وزگەرتۋلەر ەنگىزىپ، قاجەت بولعان جاعدايدا نورمالاردى ەكولوگيالىق كودەكسپەن سايكەستەندىرۋدى ۇسىندى.

Abai.kz