وسىدان ون شاقتى جىل بۇرىن-اۋ شاماسى، ۇلكەن قىزبەن ءبىر توپ جۋرناليست الماتىداعى «دوستىق» ۇيىندە كەزدەستىك. ءارتۇرلى تاقىرىپتا اڭگىمە ءوربىپ جاتىر. «التىن استاۋعا» قاسىق باتىرىپ جۇرگەن ءورىستىلدى ارىپتەستەرىمىز بەلسەندى. داريعا سول قىزدىڭ كوزىنە ءتۇسىپ قالۋعا بارىن سالىپ، جانىعىپ-اق وتىر.

جيىن ۇستىندە توتاي قىز تاقىرىپتى توسىننان وزگەرتىپ، رەيتينگ تۋرالى ايتىپ قالدى. جەل سوقپاستان بۇرىن قوعاداي جاپىرىلاتىندار جامىراپ رەيتينگ دەگەننىڭ اسا كەرەك ەكەندىگىن قوشتاپ شىعا كەلگەن. ۇندەمەي قالعاندار دا بولدى. ەسىمدە، ءبىز باتىر ەكەۋمىز عانا رەيتينگتى قۋالاي بەرۋ ءباسپاسوزدىڭ مازمۇنىن جەڭىلدەتىپ جىبەرەتىنىن سىپايىلاپ جەتكىزگەن بولدىق. ورىسشا سويلەگەن باتىر كاكىمجانوۆ (جانى ءجانناتتا بولسىن) ەركىنىرەك سويلەپ، رەيتينگتىڭ قولدان جاسالاتىنىنا دەيىن جايىپ سالدى.

جيىن ءبىتتى. تارقادىق. مەنىڭ قاسىمدا تاياۋدا اتىن ايقايلاتىپ سايت اشقان ءبىر ءىنىم بولدى. سىرتقا شىققاننان كەيىن مەن الگى ىنىمە رەيتينگتىڭ باسپاسوزگە پالەندەي ابىروي اپەرمەيتىندىگىن ءبىراز ءسوز قىلدىم. جاقسى ءىنىم ىرجالاقتاپ كۇلە بەردى. ءسويتتى دە ەرتەڭىندە-اق سايتىنىڭ باستى تاقىرىبى ەتىپ بايان ماقساتقىزىنىڭ ءجۇرىس-تۇرىسىن، ىشكەن-جەگەنىن، جازعان-سىزعانىن بەكىتىپ قويدى.

ءىنىم اقىلدى ەكەن، ءىنىم سۇڭعىلا ەكەن. باياندى كورسە، باس سالاتىن وقىرماننىڭ قاتارىن كوبەيتۋ ارقىلى ول رەيتينگتىڭ ۇشار شىڭىنا كوتەرىلدى. ەل-جەر، كوشى-قون، ءتىل، تاريح، ادەبيەت، الەۋمەتتىك ماسەلەلەر، ساياسات، ءدىن جايى دەپ «زارلاعان» ءبىز سالپاقتاپ كوشتىڭ سوڭىندا قالىپ قويدىق. ءبىز دەپ وتىرعانىم - Abai.kz اقپاراتتىق پورتالى.

سول جىلدارى ءپا-دەگى پارمەنى كۇشتى بىرەۋلەر الاش ارداگەرلەرى مەن جالپى قازاق تاريحى تۋرالى جازىلعان ماقالالاردى جاريالاتپاۋعا تىرىستى. كوشى-قون دەگەن تاقىرىپتى مۇلدەم جاۋىپ تاستاۋعا ۇمتىلدى. بۇل كەزدە كەزەكتى رەت سىرتتان كوشىپ كەلىپ جاتقان اعايىندارىمىزدىڭ كوشىنە قارسى جىمىسقى ارەكەتتەر كوبەيىپ، كوش توقتاۋعا اينالعان. بىراق ءبىز ەلدىك، ۇلتتىق تاقىرىپتاردان تابان اۋدارماي جازا بەردىك، جازا بەردىك. سول كەزدە باياننىڭ ومىراۋقابى، باياننىڭ بەلدەمشەسى دەيتىن «حودوۆوي» تاقىرىپقا بارماعانىمىزدى كوزىقاراقتى وقىرمان جاقسى بىلەدى دەپ ويلايمىن.

قازىر دە بايان قارىنداس باسپاسوزدە - باس تاقىرىپتاردىڭ قاھارمانى. قازاق ءباسپاسوزى (سايتتار، پورتالدار، وزگە دە پلاتفورمالار) حالىقتىڭ باسىم بولىگىن تولعاندىراتىن ماسەلەلەردى جازا-جازا جالىققان سياقتى ما، قالاي؟... الدە كۇردەلى جايتتەردى ساراپتاپ، سالماقتاپ جازاتىن قازاق جۋرناليستيكاسى جۇرىسىنەن جاڭىلدى ما ەكەن... بالكىم، قازاق جۋرناليستيكاسىنداعى ءداستۇرلى مەكتەپتىڭ ىرگەتاسى سوگىلە باستاعان بولار؟.. بىلمەيمىن. بىلەتىنىم: قازىرگى جازارمانداردىڭ جازاتىندارى ۇساق-تۇيەك بىردەڭەلەر بولىپ كەتكەنگە ۇقسايدى. بۇرىنعى ادەبي كوركەم تىلگە جاقىن ءارى قانداي تاقىرىپقا بولسىن تەرەڭ ۇڭىلەتىن قازاق جۋرناليستيكاسى بۇل كۇندە پرەسس-رەليزدىك دەڭگەيدە قالىپ قويعانداي كورىنەدى ماعان. اناليتيكا، ەكسكليۋزيۆ ماتەريالدار Abai.kz باستاعان كاسىبي بىلىگى جوعارى سايتتاردا عانا قالىپتى.

ەرتەدەن كەشكە دەيىن ءلايلىپ لايفتانۋ، رەيتينگ قۋ، فەيكتەردەن سەنساتسيا جاساۋعا جاندى سالۋ - ۋاقىتشا نارسە. ءدال وسىنداي جۇعىمسىز نارسەلەردى باعالاپ، ونى ەندىگى ۇلتتىق ءباسپاسوزدىڭ كەلبەتىنە اينالدىرۋ - ۇيات تىرشىلىك.

ءباسپاسوزدىڭ بەدەلى - مەملەكەتتىڭ بەدەلى. سولاي ەكەن، ەندەشە، وقىرمانعا ويلى دۇنيە ۇسىنىپ كەلە جاتقان جاڭا مەديا سالاسىنداعى سالماقتى سايتتار مەن پورتالداردىڭ جۇمىسىن باعالاپ، مەملەكەتتىك ساياسات سولاردى قولداماسا، ءباسپاسوزىمىز باسىندا بايان، سوڭىندا باقا-شايان بولىپ قۇريتىن ءتۇرى بار.

داۋرەن قۋات

Abai.kz